FIANARAN̈A 2
Azovy ma Zan̈ahary Zen̈y?
1. Nan̈ino ma atsika mila mivavaka aminany?
Zan̈ahary niasa raha jiaby fo ten̈a Zan̈ahary. Izy efa nisy fo letrizay. Izy koa tsy mahay maty. (Salamo 90:2) Baka aminany vaovao tsara amy Baiboly ao. (1 Timoty 1:11) Atsika mila mivavaka aminany, fotony izy niasa atsika.—Vakia Apokalypsy 4:11.
2. Karakory ma Zan̈ahary zen̈y?
Zan̈ahary zen̈y fan̈ahy, ke tsisy olo mahita izy. (Jaona 1:18; 4:24) Ndray izy man̈ano zen̈y, baka amy raha niasainy ahaizantsika izy. Ohatra, izy niasa manga ndreky folera isankarazany. Hitantsika baka amy zen̈y fa izy ten̈a tia atsika ndreky mahay raha. Habezan̈a lan̈itry io koa ahitantsika fa izy mahery marin̈y.—Vakia Romanina 1:20.
Baka amy Baiboly koa ahaizantsika Zan̈ahary tsarabe. Atsika koa mamaky izio, ho haintsika raha tiany ndreky tsy tiany, fitondrasany olonany, ndreky fomba fandaminany raha.—Vakia Salamo 103:7-10.
3. Zan̈ahary ma misy an̈aran̈a?
Jesosy nivolan̈a: “Anao Babanay andan̈itry ao, hankamasin̈iny an̈aranao.” (Matio 6:9) Maro an̈aran̈a fan̈ajan̈a Zan̈ahary, fa araiky fo ten̈a an̈arany. Olo jiaby samy amy fanon̈onany izy. Karaha ataony amintsika eto, sasany man̈ano “Jehovah”, sasany man̈ano “Yaveh.”—Vakia Salamo 83:18.
Maro Baiboly tsisy an̈aran̈a Jehovah io. Matetiky izio soloandro Tompo na Zan̈ahary fo. Tamy voanalohany nanoratan̈a Baiboly tan̈y,an̈aran̈a Jehovah io nisy im-7 000 mipody. Jesosy koa nampianatra olo an̈aran̈a Zan̈ahary io.—Vakia Jaona 17:26.
Zahava video Zan̈ahary ma Misy An̈aran̈a?
4. Jehovah ma mba mijery atsika?
Zan̈ahary ten̈a tia atsika, karaha ataony lelahy tia zanaka in̈y
Izio ma olo jiaby mijaly io tsy jireny Zan̈ahary? Misy olo mivolan̈a fa Zan̈ahary mitsapa jery fo mahavy olo mijaly io. Tsy marin̈y zen̈y.—Vakia Jakoba 1:13.
Zan̈ahary man̈ambela atsika hifidy raha tiantsika, fotony izy man̈aja atsika. Tokony hamparavoravo atsika mifidy hanompo Zan̈ahary zen̈y. (Josoa 24:15) Ankamarozanolo mifidy han̈ano ny ratsy. Zen̈y mahavy jaly mahaimare io. Mampalahelo Jehovah mahita olo man̈ano raha ratsy io.—Vakia Genesisy 6:5, 6.
Jehovah ten̈a mikarakara atsika. Tiany atsika ho sambatra fo. Tsy ho ela izy han̈adoso jaly jiaby ndreky olo jiaby mampijaly olo. Misy dikany mahavy izy mbala tsendriky man̈ano zen̈y. Amy fianaran̈a faha-8 atsika mahay izy.—Vakia 2 Petera 2:9; 3:7, 13.
5. Akory ma ataontsika han̈aton̈o Zan̈ahary?
Izikoa tianao han̈aton̈o Jehovah, anao mila mivavaka aminany. Izy mitandren̈y atsika tsiaraikiaraiky. (Salamo 65:2; 145:18) Izy von̈ono hamafa helokontsika. Ravoravo izy mahita atsika mifen̈y han̈ano raha tiany. Atsika ndray panota, mety hanjary naman̈a Zan̈ahary fo.—Vakia Salamo 103:12-14; Jakoba 4:8.
Tsisy raha tokony ho tiantsika mandilatra Jehovah, fotony izy niasa atsika. (Marka 12:30) Anaro hanjary pinaman̈a, izikoa mianatra raha momba izy ndreky man̈araka raha volan̈iny.—Vakia 1 Timoty 2:4; 1 Jaona 5:3.
