Jesosy anjely tandan̈itry tan̈y, talohany naviany tambony tany teto. (Jaona 8:23) Izy voanalohany raha niasainy Zan̈ahary, ke iro ndreky Jehovah niaraka niasa raha jiaby. Zanaka Zan̈ahary lelahy “tokana” ikahian̈a izy, fotony Jehovah zaraiky fo niasa izy. (Jaona 1:14) “Hafatra” koa an̈arany tamy zen̈y, fotony izy pitondra hafatra Zan̈ahary.”—Vakia Ohabolana 8:22, 23, 30; Kolosianina 1:15, 16.

Zan̈ahary nan̈iraka Jesosy tambony tany teto. Fahin̈ana Jesosy nafindrany tan̈aty kibony Maria virijiny. Dikanizen̈y, babany Jesosy tsy olombelon̈o. (Lioka 1:30-35) Diany Jesosy tambony tany teto nampianatra olo ny marin̈y mikasiky Zan̈ahary, nampianatra atsika hanompo Zan̈ahary fo ndray misy raha manahiran̈a ndreky nan̈avotro atsika.—Vakia Matio 20:28.

Izikoa mila han̈avotro olombelon̈o tsy hofoaty eky, misy raha mila hifain̈y. Zen̈y fan̈avotan̈a zen̈y. (Eksodosy 21:29, 30) Fahafatesan̈a ndreky hatoezan̈a io tsy lahatra Zan̈ahary. Izy efa nampitandrin̈y Adama fa izy koa tsy man̈araka volan̈anany, hofoaty. Amy Baiboly ao, dikany “manota” zen̈y tsy man̈araka volan̈a Zan̈ahary. Adama koa tsy nanota, izy tsy naty. (Genesisy 2:16, 17; 5:5) Izikoa Baiboly zahan̈a,  baka aminy Adama nahavy atsika maty io. Zen̈y nahavy atsika mila pan̈avotro.—Vakia Romanina 5:12; 6:23.

Azovy amy zay ma mahavita man̈avotro atsika? Tsisy olombelon̈o mahavita man̈avotro atsika.—Vakia Salamo 49:7-9.

Jesosy tsy mira atsika, fotony izy tsisy fahotan̈a. Dikanizen̈y, izy tsy tokony hofoaty foeky. Baka amy fahotan̈anolombelon̈o fo nahafaty izy. Zan̈ahary tia atsika. Zen̈y nahavy izy nan̈iraka Zanany han̈avotro atsika. Fitiavany Jesosy atsika koa nahavy izy nan̈eky nirahiny Babany, ndreky nan̈amia ain̈inany, baka atsika avotro.—Vakia Jaona 3:16; Romanina 5:18, 19.

Zahava video Nan̈ino ma Jesosy Naty?

Tamy Jesosy tambony tany teto, nampahivan̈a olo marary ndreky namelon̈o olo maty. Raha jiaby nataony in̈y, ahitan̈a fa ho vitany ankitin̈y han̈adoso raha ratsy jiaby mahazo atsika. (Matio 15:30, 31; Jaona 5:28) Jesosy naty. Izy koa fa nivilominy Zan̈ahary, nanjary anjely. Izy baka tio nipody andan̈itry an̈y. (1 Petera 3:18) Tsy niaraka izy navy tan̈y efa nanjaka edy, fa mbala niambin̈y tankavanan̈a Zan̈ahary antsendriky. (Hebreo 10:12, 13) Izy izioty efa manjaka andan̈itry an̈y. Zen̈y vaovao tsara ambarany Kristianin̈y olo jiaby.—Vakia Daniela 7:13, 14; Matio 24:14.

Tsy ho ela Jesosy han̈adoso jaly ndreky olo ratsy fan̈ahy jiaby. Lan̈iany olo mino Jesosy ndreky man̈eky izy, ho ravoravo hiain̈y amy paradisa ambony tany eto.—Vakia Salamo 37:9-11.