Valiny baka amy Baiboly

 Dikan’ny batisa zen̈y ajibiky tanteraka an̈aty rano. a Baiboly mikoran̈a momba olo maro natao batisa. (Asan’ny Apostoly 2:41) An̈isan’izen̈y Jesosy. Izy natao batisa tamy Ten̈aranon’ny Jordana. (Matio 3:13, 16) Taon̈o maromaro tafara tatỳ, nisy lelahy etiopianin̈y araiky koa natao batisa tan̈aty ‘rano’ tsy lavitry lalan̈a nisy izy tiô.​—Asan’ny Apostoly 8:36-40.

 Jesosy nivolan̈a fa olo man̈ara-dia izy tsy maintsy atao batisa. (Matio 28:19, 20) Nankamafisin’i apostoly Petera tsarabe koran̈a zen̈y.​—1 Petera 3:21.

Ty aby raha ho hitanao amy lahatsoratra ty:

•  Ino ma dikan’ny batisa zen̈y?

•  Ino raha koran̈in’ny Baiboly mikasiky fan̈anaovan̈a batisa tsaiky hely?

•  Ino ma dikan’ny atao batisa amin’ny an̈aran’ny Baba, Zanaka, ndreky fan̈ahy masin̈y zen̈y?

•  Fahotan̈a ma man̈ano batisa fan̈indroeny?

•  Batisa hafa koran̈in’ny Baiboly

•  Hevitry diso mikasiky batisan’ny Kristianin̈y

 Ino ma dikan’ny batisa zen̈y?

 Batisa io raha ataon’olo araiky baka han̈aboahan̈a amin’olo fa izy efa nibebaka tamy fahotan̈anany ndreky nampan̈anten̈a tamy Zan̈ahary fa izy han̈ano sitraponany fo ndray ino ndray ino raha mandalo. Tafiditry amy zen̈y koa man̈araka volan̈an’ny Zan̈ahary ndreky Jesosy fo amy fiain̈ana jiaby. Olo araiky vita batisa mandeha amy lalan̈a mengo amy fiain̈ana tsisy farany.

 Fan̈ajibian̈a an̈aty rano io fomba ten̈a tsara an̈aboahan̈a fa olo araiky efa niova. Nan̈ino? Baiboly mivolan̈a fa olo araiky atao batisa miran̈a olo araiky alevin̈y. (Romanina 6:4; Kolosianina 2:12) Lera izy an̈aty rano ao in̈y, izy miran̈a man̈aboaka fa izy karaha efa naty fôtony nialany fomba fiain̈ananany taloha. Fa lera izy miboaka baka an̈aty rano ao amy zay, izy man̈aboaka fa izy efa manomboko fiain̈ana vaovao, fôtony izy efa Kristianin̈y nanokan-ten̈a amy Zan̈ahary.

 Ino raha koran̈in’ny Baiboly mikasiky fan̈anaovan̈a batisa tsaiky hely?

 Amy Baiboly ao tsy ahitan̈a volan̈a “batisan’ny tsaiky.” b Izio koa tsy mampianatra fa tsaiky hely tôkony hatao batisa.

 Baiboly tsy mampianatra fa zazamena tôkony hatao batisa. Mampianatra izio ao fa misy raha sasany tsy maintsy hataon’olo araiky man̈iry atao batisa. Ohatra, farafahaheliny mila mazava aminany tsarabe fampianaran̈a fôtotro amy Volan̈an’ny Zan̈ahary ao, aviô izy tsy maintsy man̈araka irô io amy fiain̈ananany. Izy mila mibebaka amy fahotan̈anany. Tsy maintsy mivavaka koa izy, ke manokan-ten̈a amy Zan̈ahary. (Asan’ny Apostoly 2:38, 41; 8:12) Zazamena na tsaiky hely tsy afaka man̈ano raha aby zen̈y.

 Ino ma dikan’ny atao batisa amin’ny an̈aran’ny Baba, Zanaka, ndreky fan̈ahy masin̈y zen̈y?

 Jesosy nan̈iraka mpan̈ara-dia izy karaha ty: ‘Ataova mpianatra olo …, ataova batisa amin’ny an̈aran’ny Baba ndreky amin’ny an̈aran’ny Zanaka aviô amin’ny an̈aran’ny fan̈ahy masin̈y irô. Ampianara irô hitandrin̈y raha jiaby nan̈irahako anarô.’ (Matio 28:19, 20) Dikan’ny “amin’ny an̈aran’ny” zen̈y, olo araiky atao batisa io man̈eky fahifan̈a ndreky toeran̈an’ny Baba ndreky Zanaka, aviô ikeny koa asan’ny fan̈ahy masin̈in’ny Zan̈ahary. Ty misy ohatra an̈azavan̈a zen̈y: Apostoly Petera nivolan̈a karaha ty tamy lelahy araiky nalemy vity rango tan-kibo: ‘Amin’ny an̈aran’i Jesosy Kristy baka Nazareta, mandihana!’ (Asan’ny Apostoly 3:6) Mazava dikan’izen̈y. Hain’i Petera sady nikeny fahifan̈an’i Kristy, aviô naboakany fa Kristy nan̈ano fahagagan̈a nampajanga lelahy io.

•   “Baba” io Zan̈ahary Jehovah. c Izy Mpamôron̈o, Mpan̈amia Fahin̈ana, ndreky Zan̈ahary Farany Mahery, ke izy manan̈a fahifan̈a farany an̈abo.​—Genesisy 17:1; Apokalypsy 4:11.

•   “Zanaka” io Jesosy Kristy, izy nan̈amia ain̈inany han̈avotan̈a atsika. (Romanina 6:23) Tsy ho avotro atsika izikoa tsy mahay sady man̈eky andraikitry maventy anan̈an’i Jesosy amy fikasan̈an’ny Zan̈ahary amin’olombelon̈o.​—Jaona 14:6; 20:31; Asan’ny Apostoly 4:8-12.

•   “Fan̈ahy masin̈y” io angôvon’ny Zan̈ahary. d Fan̈ahy masin̈inany io nampiasain’ny Zan̈ahary niasan̈a zavaboary ndreky nan̈amezan̈a fahin̈ana irô. Izio koa nampiasainy hikoran̈ana hafatranany tamy mpaminan̈inany ndreky olo hafa, aviô nan̈amezan̈a angôvo irô nan̈anaovan̈a sitrapônany. (Genesisy 1:2; Joba 33:4; Romanina 15:18, 19) Zan̈ahary koa nampiasa fan̈ahy masin̈y io han̈ampian̈a mpanoratra Baiboly aby io hahavita hanoratra hevitrinany.​—2 Petera 1:21.

 Fahotan̈a ma man̈ano batisa fan̈indroeny?

 Maro olo manapa-kevitry hiova fivavahan̈a. Fa karakôry izikoa irô efa vita batisa tamy fivavahan̈a nisy irô taloha? Manota ma irô izikoa mimpody man̈ano batisa ndraiky? Olo sasany mivolan̈a ‘ia’, ke raha koran̈in’ny Efesianina 4:5 indesindrô man̈aporofo hevitrindrô zen̈y. Izio mivolan̈a: “Tompo araiky fo, finoan̈a araiky fo, batisa koa araiky fo.” Kanefa, andinin-teny io tsy mivolan̈a fa olo araiky tsy mety mimpody man̈ano batisa fan̈indroeny. Nan̈ino?

 Volan̈a man̈odidin̈y. Izikoa volan̈a man̈odidin̈y Efesianina 4:5 io zahavan̈a, apostoly Paoly mankamafy fa ten̈a ilain’ny Kristianin̈y marin̈y miray sain̈y amy raha inoandrô. (Efesianina 4:5, 1-3, 16) Hiray sain̈y irô izikoa man̈araka Tompo araiky fo, tsy azôvy zen̈y fa Jesosy Kristy. Hiray sain̈y koa irô izikoa mitovy raha inoandrô, dikan’izen̈y mitovy fazahoandrô raha ampianarin’ny Baiboly, baka iô man̈araka fitsipiky mitovy fo baka amy Soratra Masin̈y momba batisa.

 Apostoly Paoly nandrisiky olo sasany efa vita batisa himpody hatao batisa ndraiky, fôtony tamin’irô natao batisa voanalohany mbala tsy ten̈a nahay fampianaran̈a Kristianin̈y.​—Asan’ny Apostoly 19:1-5.

 Raha takin̈y amin’olo atao batisa. Mila mahay tsarabe fahamarin̈ana an̈aty Baiboly olo araiky izikoa tiany hankasitrahan’ny Zan̈ahary batisanany. (1 Timoty 2:3, 4) Tsy iken’ny Zan̈ahary batisanany izikoa fampianaran̈an’ny fivavahan̈a fo hain’olo io kanefa fampianaran̈a aby io mifanohitry amy raha ampianarin’ny Baiboly. (Jaona 4:23, 24) Ndray tsara antony nahavy olo io hatao batisa, izy tsy nahay fahamarin̈ana. (Romanina 10:2) Ke izikoa tiany hahazo fankasitrahan̈a baka amy Zan̈ahary, izy tsy maintsy mianatra fahamarin̈ana amy Baiboly, man̈araka raha nianarany, manokan-ten̈a amy Zan̈ahary, baka iô mimpody atao batisa ndraiky. Amy fotoan̈a zen̈y, batisanany fan̈indroeny io tsy fahotan̈a. Efa zen̈y edy ny raha tôkony hataony.

 Batisa hafa koran̈in’ny Baiboly

 Baiboly mikoran̈a batisa hafa. Hafa dikan’ny batisa aby io, fa tsy miran̈a amy batisa an̈aty rano ataon’ny mpan̈ara-dia Kristy in̈y. Ty sasany amy zen̈y:

 Batisa nataon’i Jaona Mpan̈ano Batisa. e Irô Jiosy ndreky olo nan̈araka fivavahan̈a jiosy aby io nataon’i Jaona batisa baka han̈aboahan̈a fa irô efa nibebaka tamy fahotan̈andrô tamin’irô nandika Lalàn̈an’i Mosesy, tsy ino zen̈y fa Lalàn̈a namezan’ny Zan̈ahary i Mosesy handeha amindrô Israelita aby io. Batisa nataon’i Jaona in̈y nan̈ampy olo aby io ho vôn̈ono han̈eky Mesia, tsy azôvy fa Jesosy baka Nazareta.​—Lioka 1:13-17; 3:2, 3; Asan’ny Apostoly 19:4.

 Batisan’i Jesosy. Jaona Mpan̈ano Batisa nan̈ano batisa Jesosy, fa batisanany tsy miran̈a amy batisan’olo hafa. Jesosy baka lavorary sady tsy nanota foeky. (1 Petera 2:21, 22) Ke batisanany io tsy midika fa izy nibebaka na izy ‘mangataka eritreritry madio amy Zan̈ahary.’ (1 Petera 3:21) Fa izio man̈aboaka fa izy nan̈amia ain̈inany han̈anaovan̈a sitrapon’ny Zan̈ahary eraka raha efa nambara momba Mesia, na Kristy. An̈isan’izen̈y koa, izy nan̈amia ain̈inany han̈avaotan̈a atsika.​—Hebreo 10:7-10.

 Batisa amy fan̈ahy masin̈y. Jaona Mpan̈ano Batisa ndreky Jesosy Kristy samby nikoran̈a momba batisa amy fan̈ahy masin̈y. (Matio 3:11; Lioka 3:16; Asan’ny Apostoly 1:1-5) Izio tsy miran̈a amy batisa atao amin’ny an̈aran’ny fan̈ahy masin̈y. (Matio 28:19) Nan̈ino?

 Vitsy fo mpan̈ara-dia Jesosy natao batisa tamy fan̈ahy masin̈y. Irô io voahosotro fan̈ahy masin̈y fôtony irô nikahian̈a hiaraka hanompo amy Kristy an-dan̈itry an̈y ke hanjary mpisôron̈o ndreky mpanjaka amy tany. f (1 Petera 1:3, 4; Apokalypsy 5:9, 10) Irô hanjaka amy mpan̈ara-dia Kristy an-tapitrisany, tsy azôvy zen̈y fa olo man̈anten̈a hiain̈y tsisy farany amy Paradisa ambony tany.​—Matio 5:5; Lioka 23:43.

 Batisa amy Kristy Jesosy ndreky amy fahafatesan̈anany. Lan̈iany natao batisa tamy fan̈ahy masin̈y, ‘natao batisa tamy Kristy Jesosy’ koa. (Romanina 6:3) Dikan’izen̈y izio batisa atao amy voahosotro mpan̈ara-dia Jesosy handeha hanjaka hiaraka aminany an-dan̈itry an̈y. Irô koa fa natao batisa tamy Jesosy, irô lôso an̈isany fiangonan̈an’ny Kristianin̈y voahosotro. Izy Lohany, fa irô ndraiky vatan̈a.​—1 Korintianina 12:12, 13, 27; Kolosianina 1:18.

 Kristianin̈y voahosotro koa ‘natao batisa tamy fahafatesan̈an’i [Jesosy].’ (Romanina 6:3, 4) Irô mangala tahaka Jesosy ke mifen̈y man̈araka volan̈an’ny Zan̈ahary amy raha jiaby ataondrô, fa tsy man̈ano raha tiandrô tômpiny fo. Karaha Jesosy koa, haindrô fa fan̈antinan̈andrô tsy handeha hiain̈y mandrakizay ambony tany eto. Miran̈a vita batisa tamy fahafatesan̈an’i Jesosy irô lera irô maty ndreky hatsangana ho zavaboary ara-pan̈ahy hiain̈y an-dan̈itry an̈y.​—Romanina 6:5; 1 Korintianina 15:42-44.

 Batisa amy môtro. Jaona Mpan̈ano Batisa nivolan̈a karaha ty tamin’olo nitandren̈y izy: “Izy [Jesosy] han̈ano batisa anarô amy fan̈ahy masin̈y ndreky amy môtro. Efa amy tan̈anany raha handeha hampiasainy hikorôko vary, ke hidioviny tsara tany fikorohany vary. Vary havoriny an̈atin’ny riha, fa angafony ndreky mololo hiroany amy môtro tsy mety maty.” (Matio 3:11, 12) Asa hitanao tsy mampitovy batisa amy fan̈ahy masin̈y ndreky batisa amy môtro? Ino raha tian’i Jaona koran̈iny tamy ohatra nampiasainy io?

 Vary io manondro irô olo mitandren̈y Jesosy ndreky man̈araka volan̈anany. Irô olo aby io mety afaka hatao batisa amy fan̈ahy masin̈y. Angafony ndreky mololo ndraiky manondro olo aby tsy mitandren̈y Jesosy. Irô hatao batisa amy môtro, dikan’izen̈y irô haripaka mandrakizay.​—Matio 3:7-12; Lioka 3:16, 17.