Vaovao Tsara Nisoratin’i Matio 28:1-20
28 Tafaran’ny Sabata, tamin’ny andra voanalohany tamin’ny herin̈iandra,* izikoa fa nahainazava andra, navy Maria Magdalena ndreky Maria araiky in̈y hizaha fasan̈a io.
2 Ke nisy hôrohôron-tany mare, fôtony nisy anjelin’i Jehovah nijotso baka tan-dan̈itry tan̈y nandeha nan̈adoso vato namody fasan̈a io, aviô izy nipetraka tan̈abon’izio tiô.
3 Anjely io nazava karaha pelakandra, aviô lambanany fotsy mangatsakatsaka.*
4 Irô mpiambin̈y aby io navozo mare salakady nangôrohôro izikoa fa nahita izy, ke irô tsy tafihetsiky miran̈a olo maty.
5 Anjely io nivolan̈a tamy man̈angy aby io karaha ty: “Anarô aza mavozo. Haiko tsarabe fa Jesosy, araiky nivonen̈a tamy pôtô in̈y izy tadiavinarô io.
6 Izy efa tsy ato fôtony izy efa natsangana, eraka raha efa nambarany. Mavia baka anarô, zahava tany nisy fatinany.
7 Mindao malaky anarô mivolan̈a amy mpianatranany karaha ty: ‘Izy efa natsangana tamy maty, aviô izy efa amy lalan̈a handeha a Galilia, ke an̈y anarô hahita izy.’ Hivolan̈a zen̈y aminarô antony naviako eto.”
8 Ke irô roe vavy niala tam-pasan̈a tiô nalaky. Irô navozo salakady ravoravo mare. Irô nilomoay han̈ambara raha zen̈y tamy mpianatran’i Jesosy.
9 Tiô fo, Jesosy nan̈aton̈o irô sady nivolan̈a karaha ty: “Mbalatsara!” Irô man̈angy aby io nan̈aton̈o, baka iô irô nankôhoko nan̈oloan̈a izy aviô namihin̈y izy tamy vitinany.
10 Ke ho Jesosy tamindrô: “Anarô aza mavozo! Mindao anarô mandeha amindrô rahalahiko aby an̈y, ke iraha mandeha a Galilia irô fa ho hitandrô an̈y zaho.”
11 Irô man̈angy aby io mbala tan-dalan̈a fo, sasany tamindrô mpiambin̈y aby in̈y nandeha tan-tanàna tan̈y, ke nitantaraindrô tamindrô lohandohan’ny mpisôron̈o aby io raha jiaby nandalo.
12 Irô lohandohan’ny mpisôron̈o ndreky irô anti-pan̈ahy aby io koa fa niaraka nivory ndreky niaraka nandiniky, namezandrô vola* be irô maramila aby io,
13 aviô ho irô: “Karaha ty volàn̈a amin’olo: ‘Navy alin̈y in̈y mpianatranany nangalatra fatinany, tamy zahay mbala nandry.’
14 Izikoa avy amy sofin̈in’ny governera raha zen̈y, zahay hikoran̈a aminany* fa anarô aza miasaloha.”
15 Ke nalaindrô maramila aby io vola aby io, aviô nataondrô raha jiaby nan̈irahan̈a irô. Niparitaka tamindrô Jiosy aby io tantara zen̈y firaka ziôty.
16 Fa irô mpianatra 11 aby io ndraiky nandeha ta Galilia, tamy bongo nivolan̈in’i Jesosy fa hifanojiandrô in̈y.
17 Irô koa fa nahita izy, irô nankôhoko. Fa sasany ndraiky mbala nisalasala.
18 Ke Jesosy nan̈aton̈o irô sady nivolan̈a karaha ty: “Fahifan̈a jiaby an-dan̈itry an̈y ndreky ambony tany eto efa namian̈a zaho.
19 Ke anarô mandihana, ataova mpianatra olo baka amy firenena jiaby, baka iô irô ataova batisa amin’ny an̈aran̈an’ny Baba, ndreky Zanaka, aviô fan̈ahy masin̈y.
20 Ampianara irô hitandrin̈y raha jiaby nan̈irahako anarô. Tsaraova fa hiaraka aminarô fo zaho isan’andra, firaka amy faran’ny donia ty.”*
Lamariky amy Pazy Ambany
^ Dimansy izio. Tamy Jiosy, io andra voanalohany amin’ny herin̈iandra.
^ Na: “fotsy karaha lanezy.”
^ Izio vola vita amy volafotsy.
^ Abt: “zahay handresy lahatra izy.”
