„პენსილვანიაშ გინაჯინალ კოშკიშ, ბიბლიაშ დო ტრაქტატეფიშ საზოგადოება“ არაკომერციულ კორპორაცია რე, ნამდგაქ 1884 წანას პენსილვანიაშ შტატის (აშშ) კანონმდებლობაშ საფუძველშა დეარსჷ. თეშ საშვალებათ ასრულენა იეჰოვაშ მოწმეეფ მსოფლიო სამქადაგებლო საქმეს, მუდგაშა ბიბლიეფიშ დო ბიბლიაშა გერსხილ ლიტერატურაშ გიშაშქუმალა ხოლო მიშურს.

 თე კორპორაციაშ წესდებას რაგადებულ რე, ნამდა კორპორაციაშ მიზან რე „რელიგიურ განათლებაშ მეღება დო ქველმოქმედება“, ნამდა „ადამიანეფქ მირჩქილუან დო ქიდიგურუან ჭეშმარიტება ღორონთიშ სამეფოშ გურშენ, ნამდგას იესო ხემძღვანელენს“. თე კორპორაციაშა გაწევრიანება მოწვიებათ ხვადუ დო ვართ ხოლო შესაწირავეფიშ რაოდენობათ. კორპორაციაშ წევრეფ დო დირექტორეფ თანამშრომლენა იეჰოვაშ მოწმეეფიშ ხემძღვანელ საბჭოწკუმა.

 „პენსილვანიაშ გინაჯინალ კოშკიშ, ბიბლიაშ დო ტრაქტატეფიშ საზოგადოებაშ“ გარდა, იეჰოვაშ მოწმეეფ მუსხირენ იურიდიულ პირს ირინუანა შხვადოშხვა ქიანას. ნამთინე იურიდიულ პირიშ სახელწოდება რე „Watch Tower-ი“, „Watchtower-ი“ ვარდა თე სახელწოდებეფიშ ართ-ართიშ თარგმან.

 თიშ უკულ, მუთ შხვადოშხვა იურიდიულ პირიშ გიმორნაფა დიბჭყით, ბრელ მნიშვნელოვან საქმეეფს ვორთუთ, მუნერით რე:

•   ბეშტუა დო გიშაშქუმალა. ჩქი სოდგარენ 220 მილიონ ბიბლია დო ბიბლიაშა გერსხილ 40 მილიარდ ლიტერატურა 900-შე მეტ ნინაშა გიშვაშქვით. ჩქინ ვებგვერდ jw.org ხალხის არზენს შესაძლებლობას, 160-შე მეტ ნინაშა ონლაინ რეჟიმს წეკითხან ბიბლია დო მიღან პასუხეფ თიცალ კითხვეფშე, მუნერით რე: „მუ რე ღორონთიშ სამეფო?“.

•   განათლება. ჩქი შხვადოშხვა ბიბლიურ სკოლეფს ვატარენთ. მაგალთო, 1943 წანაშე მოჸუნაფილ 9 000 იეჰოვაშ მოწმექ მიკორთ „გინაჯინალ კოშკიშ“ ბიბლიურ სკოლა „გალაად“, მუდგაქ საშვალება მეჩჷ თინეფს, იმსახურესკო მისიონერეფო ვარდა შხვანერო დუკინესკო ხუჯ მსოფლიო სამქადაგებლო საქმეს. თეწკუმა ართო, ირმარას მილიონობით კათა ღებულენს ბიბლიურ განათლებას კრებაშ შეხვალამეფს; თე კათა შქას თიცალეფ ხოლო რენა, მით ვა რე იეჰოვაშ მოწმე. თეს გეძინელ, ჩქი ვატარენთ ჭარუაშ დო კითხირიშ დაგურაფალ კურსეფს დო თეშო 120 ნინაშა გიშვაშქვანთ სპეციალურ სახემძღვანელოს.

•   ქველმოქმედება. ჩქი მატერიალურო ვოხვარუთ თინეფს, მით მუდგარენ ტრაგედიაშ მსხვერპლ რე. თე დროს მნიშვნელობა ვა უღჷ, მუ რე ტრაგედიაშ მიზეზ, ადამიან დოვარ სტიქია. თაშ მიფქცით მაგალთო, 1994 წანას რუანდას მოხვალამირ გენოციდიშ დროს დო 2010 წანას ჰაიტის მოხვალამირ მანგარ მიწიშძვრაშ დროს.

 მართალ რე, კორპორაციეფიშ დო იურიდიულ პირეფიშ საშვალებათ ბრელ მუდგარენს მივოჭირინეთ, მარა ჩქინ საქმიანობა წარმატებულ იჸუაფ დო ვარ, თინეფშა ვა რე დამოკიდებულ. თითოულ ქრისტიან პირადო რე პასუხიშმგებელ ღორონთიშ წოხოლე, ნამდა შეასრულას დავალებურ საქმე დო ირდიხას იქადაგას სახიოლო ამბე (მათე 24:14; 28:19, 20). მუშო ოკო რაგად, ჩქი ბჯერა, ნამდა ღორონთ ხემძღვანელენს თე საქმეს დო ზუსტას თინა „რდუნს“ (1 კორინთელები 3:6, 7).