ხემძღვანელ საბჭო რე მოწიფულ ქრისტიანეფიშ ჯგუფ, ნამუთ მუსხირენ პიროვნებაშე შითმოდირთუ. თინა ხემძღვანელენს იეჰოვაშ მოწმეეფიშ საქმიანობას მთელ მსოფლიოს. თუდო მოშინაფილ რე, მუ როლს ასრულენს ხემძღვანელ საბჭო:

•   ზედამხედველენს ბიბლიაშა გერსხილ მითითებეფიშ მომზადებას, ნამუთ იეჰოვაშ მოწმეეფს გინაჩამუ პუბლიკაციეფიშ, ქრისტიანულ შეხვალამეფიშ დო შხვადოშხვა სკოლაშ საშვალებათ (ლუკა 12:42).

•   ზედამხედველენს იეჰოვაშ მოწმეეფიშ საქმიანობას მთელ მსოფლიოს. თეშა მიშურს სამქადაგებლო საქმეშ ხემძღვანელობა დო შემოწირულ თანხეფიშ გიმორნაფა.

 ხემძღვანელ საბჭო მეჸუნს პირველ საუკუნეშ მოციქულეფიშ დო უხუცესეფიშ მაგალითის, მით მნიშვნელოვან გადაწყვეტილებეფს ღებულენდეს მთელ ქრისტიანულ კრებაშ საჯგირობუოთ (საქმეები 15:2, 6). თე ართგურ ქომოლკათა ვა რდეს ქრისტიანულ კრებაშ უნჩაშეფ; თეშნერო ვართ ხემძღვანელ საბჭოშ წევრეფ რენა იეჰოვაშ მოწმეეფიშ ორგანიზაციაშ უნჩაშეფ. თინეფ ბიბლიათ ხემძღვანელენა დო ჯგირო არჩქილენა, ნამდა კრებაშ დუდ ქრისტე რე, ნამუთ იეჰოვა ღორონთიქ დანიშნჷ (1 კორინთელები 11:3; ეფესოელები 5:23).

 2018 წანაშ იანარიშ მონაცემეფით, ხემძღვანელ საბჭოშ წევრეფ რენა გერიტ ლოში, გეიჯ ფლიგლი, დეივიდ სპლეინი, კენეთ კუკი, მარკ სანდერსონი, სამუელ ჰერდი, სტივენ ლეტი, ჯეფრი ჯექსონი დო ჯეფრი ვინდერი. თინეფ მსახურენა იეჰოვაშ მოწმეეფიშ მსოფლიო მთავარ სამმართველოს, უორიკის (ნიუ-იორკი, აშშ).

 ხემძღვანელ საბჭოქ დაფუძნჷ ამშვ კომიტეტ, ნამუთ ზედამხედველენს იეჰოვაშ მოწმეეფიშ საქმიანობაშ შხვადოშხვა მხარეს. ხემძღვანელ საბჭოშ თითოულ წევრ მსახურენს ართ ვარდა ართშე მეტ თეცალ კომიტეტის.

•   კოორდინატორეფიშ კომიტეტი: თე კომიტეტ ხემძღვანელენს იეჰოვაშ მოწმეეფწკუმა დაკავშირებულ იურიდიულ საკითხეფს, გინოჭყვიდუნს თი პრობლემეფს, ნამუთ მოჸუნს სტიქიურ უბედრობეფს, რწმენაშ გურშენ თხოზინს დო იეჰოვაშ მოწმეეფწკუმა დაკავშირებულ შხვა მნიშვნელოვან საკითხეფს.

•   კადრეფიშ კომიტეტი: თე კომიტეტ მიკაჯინე ბეთელიშ ოჯახიშ წევრეფიშ საჭიროებეფს.

•   საგამომცემლო კომიტეტი: თე კომიტეტ ხემძღვანელენს ბიბლიაშა გერსხილ პუბლიკაციეფიშ ბეშტუას დო ტრანსპორტირებას. თეს გეძინელ, თინა ხემძღვანელენს ქრისტიანულ შეხვალამეფიშ შენობეფიშ, მთარგმნელობით ოფისეფიშ დო ფილიალეფიშ შენებას.

•   სამსახურებრივ კომიტეტი: თე კომიტეტ ზედამხედველენს სამეფოშ გურშენ „სახიოლო ამბეშ“ ქადაგებაშ საქმეს (მათე 24:14).

•   სასწავლო კომიტეტი: თე კომიტეტ ხემძღვანელენს სულიერ საზრდოშ მომზადებას, ნამუთ იეჰოვაშ მოწმეეფს გინაჩამუ ქრისტიანულ შეხვალამეფიშ, სკოლეფიშ დო აუდიო-ვიდეო პროგრამეფიშ საშვალებათ.

•   სამწერლო კომიტეტი: თე კომიტეტ ხემძღვანელენს სულიერ საზრდოშ მომზადებას, ნამუთ იეჰოვაშ მოწმეეფს გინაჩამუ ბეშტელ დო ელექტრონულ ფორმატით. თეს გეძინელ, თინა ზედამხედველენს თარგმნუაშ საქმეს.

 მუჭოთ ჟიშე მიფშინეთ, ხემძღვანელ საბჭოშ წევრეფ თე კომიტეტეფს მსახურენა დო თეწკუმა ართო, ირ მარას იშაყარნა, ნამდა გარჩუან ორგანიზაციაშ საჭიროებეფწკუმა დაკავშირებულ საკითხეფ. თე დროს ხემძღვანელ საბჭოშ წევრეფ მსჯელენა ბიბლიურ პრინციპეფშე, მეჸუნა ღორონთიშ წმინდა შურიშ ხემძღვანელობას დო ირნერო ოცადნა, თითოულ წევრ ოთანხმუნ ფერ გადაწყვეტილება მიღან (საქმეები 15:25).

 ხემძღვანელ საბჭოს ოხვარნა ართგურ ქრისტიანეფ, მით ჟიშე მოშინაფილ კომიტეტეფს მსახურენა (1 კორინთელები 4:2). თინეფს უღნა უნარ დო გამოცდილება, ნამდა შეასრულან დავალებურ საქმე. თეწკუმა ართო, თინეფ ოსწრუნა კომიტეტეფიშ ირმარიან შეხვალამეფს. მართალ რე, თინეფ ვა ღებულენა გადაწყვეტილებეფს, მარა მნიშვნელოვან დო გიმორკვიებულ ინფორმაციას გინოჩანა ხემძღვანელ საბჭოს, ასრულენა მეღებულ გადაწყვეტილებეფს დო რეგულარულო ოკვირნა თე გადაწყვეტილებაშ შედეგეფს. თეს გეძინელ, შილებე ხემძღვანელ საბჭოქ თე ჯიმალეფს ქუდავალას მსოფლიოშ შხვადოშხვა კუნთხუს და დო ჯიმალეფიშ მონახულება ვარდა მოხსენებათ გიშულა თიცალ ღონისძიებეფს, მუნერით რე, ირწანიან შეხვალამა დო გალაადიშ გამოსაშვებ პროგრამა.