ამერიკაშ შეერთებულ შტატეფიშ დაავადებეფიშ კონტროლიშ დო პრევენციაშ ცენტრეფშე მეღებულ ინფორმაციათ, 15-შე 19 წანაშახ გამოკითხულ ახალგაზრდეფშე სოდგარენ გვერდის ართშა იშენ ნოღვე ორალურ სექს. „თინეიჯერეფს ქოკითხე, მუს ფიქრენა ორალურ სექსიშ გურშენ, გიწინა, ნამდა თეს მუთუნ გლახა ვა რე. თინეფ ფიქრენა, ნამდა თენა სინამდვილეს სექს ვა რე“ — იჩიებ შარლინ აზამ მუშ წიგნის (Oral Sex Is the New Goodnight Kiss).

•  სი მუჭო ფიქრენქ?

•  მუ იძირე ფაქტეფშე?

•  მუშენ ღირჷ თეშე დაფიქრება?

 ქუპასუხ მოჩამილ კითხვეფს:

1.   შეიოლებერ რენო ორალურ სექსიშ შედეგო დაფეხმძიმება?

   1.   ქო

   2.   ვარ

2.   შილებენო ორალურ სექსიშ შედეგო დაავადებათ ინფიცირება?

   1.   ქო

   2.   ვარ

3.   შილებენო სექსო ჩეთვალას ორალურ სექსიქ?

   1.   ქო

   2.   ვარ

 ქეშუდარ სქან პასუხეფ თუდო მოჩამილ პასუხეფს.

1.   შეიოლებერ რენო ორალურ სექსიშ შედეგო დაფეხმძიმება?

    პასუხ: ვარ. თენა რე ართ-ართ მიზეზ, მუდგაშ გურშენ ბრელ არასწორო ფიქრენს, ნამდა ორალურ სექსის გლახა მუთუნ ვა რე.

2.   შილებენო ორალურ სექსიშ შედეგო დაავადებათ ინფიცირება?

    პასუხ: ქო. ორალურ სექსიშ შედეგო პიროვნებას შილებე გეგნადვას A დო B ჰეპატიტიქ, გონორეაქ, ჰერპესიქ, აივ-ქ დო სიფილისიქ; ორალურ სექსიშ შედეგო შილებე გორჩქინდას ლახალაქ, კონდილომაქ (სასქესო ორგანოეფწკუმა მეჭეჭეფიშ გორჩქინა).

3.   შილებენო სექსო ჩეთვალას ორალურ სექსიქ?

    პასუხ: ქო. ნებისმიერ მოქმედება, იჸუაფ თენა სქესობრივ ურთიერთობა, პარტნიორიშ მასტურბაცია, ორალურ ვარდა ანალურ სექს, ნამდგაშ დროს შხვაშ სასქესო ორგანოეფიშ შეხება ხვადუ, სექსო ითვალუ.

 გუვარჩუათ მუსხირენ ბიბლიურ მუხლ, ნამუთ შემლებნა თე საკითხის დუკავშირათ.

 ბიბლიას ჭარჷ: „ღორონთიშ ნება რე, … ვემიქცუათ უზნეოთ“ (1 თესალონიკელები 4:3).

 ორიგინალ ნინაშე ნათარგმნა სიტყვა „უზნეოთ“ ნიშნენს ირნერ ინტიმურ ურთიერთობას ქორწინებაშ უმშო, თინეფ შქას სქესობრივ ურთიერთობას, ორალურ დოვარ ანალურ სექსის დო შხვა ადამიანიშ მასტურბაციას. თინა, მით უზნეოთ იქციებ, გლახა შედეგეფს მიღენს დო, მუთ არძაშ უმოს სანარღო რე, ღორონთწკუმა გილელუანს ურთიერთობას (1 პეტრე 3:12).

 ბიბლიას ჭარჷ: „მით გარყვნილო იქციებ, მუშ სხეულს აუწმინდურენს“ (1 კორინთელები 6:18).

 ორალურ სექსიშ შედეგო შილებე ადამიანიშ მუჭოთ ფიზიკურ, თეშ სულიერ ჯამრთელობაქ ქიგედირთას საფრთხეშ თუდო. თეს შილებე ემოციურ ჭუაქ ქუმაჸუნას. ართ წიგნის ბკითხულენთ: „მუჭოთ წესინ, ვაგინალურ სექსიშ შემთხვევას ადამიან თეშ ვა გინაფლენს დუდის, ითამ მიდგარენქ გეგმირინუ დო ვართ სინანულიშ გრძნობა ურჩქინდუ“. თე წიგნის თეცალ მუდგარენ ხოლო ჭარჷ: „გლახა ემოციეფ ხვალე დაუქორწინებელეფ შქას არძანერ სქესობრივ ურთიერთობას მოჸუნს. დაუქორწინებელეფს ართიან შქას მუდგანერ ინტიმურ ურთიერთობა ვა უღუდანინ, თექ იშენ შილებე ჩეთვალას სექსო (Talking Sex With Your Kids).

 ბიბლიას ჭარჷ: „მა, იეჰოვა, სქან ღორონთ ვორექ, სქან საჯგირობუოთ გოგურუანქ“ (ესაია 48:17).

 სქან აზრით გემგოდირთუნო სქესობრივ ურთიერთობაშ გურშენ ღორონთიშ სიტყვას მოჩამილ კანონეფ? ხომ ვა ფიქრენქ, ნამდა თე კანონეფ მუდგარენეფიშ უფლებას მიდმაიღანს? წერმიდგინ, ნამდა მანქანათ მეურქ გინოხარგელ შარას, სოდეთ საგზაო ნიშნეფ გილადგ; რე შუქნიშან დო სიჩქარეშ შეზღუდვაშ ნიშან ხოლო. თქუანდიო, ნამდა თე ნიშნეფ დაცვებაშ მანგიორო უფლებეფს მიდმაიღანს? მუქ შილებე მოხვადას, სი ვარდა ნამდგაინ შხვა შოფერ თე ნიშნეფს ყურადღებას ვემიაქციენდ-და?

 თეშ რაგად შილებე ღორონთიშ ნორმეფიშ გურშენ ხოლო. თინეფს ყურადღებას ვემიაქციენქ-და, რჯერდას, თის მიღენქ, მუდგას თასუნქ (გალატელები 6:7). ართ წიგნის ჭარჷ: „მუთ უმოსო იჩიებუქ ვარიას სქან ფასეულობეფშე დო თიშე, მუდგას სქან რელიგია გოგურუანს დო თიცალ მუდგაინს ორთუქ, მუთ გიჩქჷ, ნამდა ვა რე სწორ, თით უმოსო ოდინუანქ სქან დუდიშ პატიცემას“ (Sex Smart). ღორონთიშ პრინციპეფიშ თანახმას ქიმიქციებუქ-და, ირკოჩ ქოძირუნს, ნამდა მაღალზნეობრივ ნორმეფით ცხოვრენქ. მუთ არძაშ უმოს მნიშვნელოვან რე, სუფთა სინდის გაღვენუ (1 პეტრე 3:16).