Atus 24:1-27
24 Bâdâ hã 5 na siꞌutõrĩ parimhã, Anania sasedoti tisiré norĩ nhipaiꞌu ipire hã ma tô mo Cézaréia u hã, nima norĩ Zudeu norĩ nhibꞌihâꞌa norĩ me duré daꞌwawi isimapaꞌwa Tértulu na isisi zama. Ta norĩ hã ma tô Paulu hã siwi wasuꞌu wasété, apito Félisihi ma hã.
2 Pauluhu zô oto dahârâ wamhã, Tértulu hã ma tô wasuꞌu wasété, ãne:
— Rotiꞌwa, wa tô rowẽ sina ꞌre wahâimana zaꞌra bâtâ ahâ na hã, rotiꞌwa na ꞌre iꞌaihâimana mono ꞌremhã. Duré aima robꞌmadâꞌâ waihuꞌu pese wa, ma tô marĩ hã ꞌre iꞌapese mo, asibꞌaꞌuwẽ norĩ ma hã.
3 Uburé marĩ hã ꞌre iꞌabꞌmanharĩ mono zé hã wẽ uptabi di, wama zaꞌra. Duré daro mono bâ wa wasiwi aiwẽsãmri ni.
4 Tane nherẽ, te ĩsima wẽ õ di, bâdâ saꞌẽtẽ na te aiwi iꞌuprosi da hã. Tahawa wa za aiwi waptẽ, iwẽ na suru na aꞌâ wawapari zaꞌra da.
5 Wa waihuꞌu zaꞌra ni, ã hã aibâ tô iwasédé hã, roꞌwaꞌrutuꞌwa Zudeu norĩ ropâ ꞌre ihâimana zaꞌra mono norĩ ꞌremhã. Duré daꞌrã na ꞌre ihâimana mono, nazarenu na dasina dasipoꞌozém nhisi niwĩ ꞌre ihâimana zaꞌra mono norĩ ma hã.
6 Te aré duré sima wẽ, ꞌRe ihâimana uꞌâsi mono nhorõwa ꞌri ꞌrãihâ hã te te wawi wasété zaꞌra da hã. Tahawa wa wasiwi âri ni, wa te aré duré ãma rowairébé zaꞌra da, wate roti zahi zarina.
7 Tane nherẽ, apito Lizia hã ma tô watẽme tiwisi zaꞌra. Ta hã ma tô wawi wazere zaꞌra, tinhiptete na.
8 Sadanharĩ pese wamhã, te za iwaihu, tô sena hã marĩ wa, wa te wasiwi iwasuꞌu wasété zé hã.
9 Tawamhã Zudeu norĩ hã ma tô ãma dazaze zaꞌra, tô sena na da te dasiwi iwasuꞌu na hã.
Paulu hã siꞌwawi timreme na isimapazé Félisihi nhoꞌremhã
10 Taha pari apito hã ma tô tinhibꞌrada ꞌmanha, Paulu hã siwasuꞌu da oto. Ãne ma tô siwasuꞌu:
— Ĩma aiwaihuꞌu pese di, wahub ahâ na ꞌre iꞌaihâimana mono na hã, daꞌãma rowairébéꞌwa na aꞌuwẽ norĩ ma hã. Tahawa ĩsima iwẽ na wa za ĩsiꞌwawi aimapa, ĩmreme na hã.
11 Asiꞌuihâ na te za iwaihu, nimosi 12 na bâdâ isiꞌutõrĩ na si wa tô mo Zeruzalẽ u, ꞌRe ihâimana uꞌâsi mono ãma ĩwata da hã.
12 Ĩwasuꞌu wasété ꞌwa norĩ hã te te siwi ĩnhopẽtẽ õ di, niꞌwa te wasui ré hã ꞌRe ihâimana uꞌâsi mono nhorõwa ãma, ꞌri ꞌwawi waꞌra ꞌremhã, duré te dawi roꞌwaꞌrutu ré, rowahutuzéb ãma hã duré siwaꞌru nimame ꞌri waꞌõtõ ꞌremhã.
13 Tahawa, tô sena te te siwi ĩwasuꞌu wasété zé hã, marĩ te te siwi hâiꞌré waihuꞌu õ di, ĩꞌãma hã.
14 Tazahã, wa za aima ĩsiwasuꞌu, ãne: Wahiꞌrata norĩ te ꞌRe ihâimana uꞌâsi mono ãma, wa ꞌre ĩwata tô. Bâdâdi ꞌre idanomro mono zép tém na wa oto ꞌre mo, Zudeu norĩ senaiꞌõ na te te siwi iwasuꞌu hã. Wa tô saze, uburé ꞌRe ihâimana uꞌâsi mono nhimiroti zahi na Mozési te te ãma irobꞌuiꞌérézé hã, duré isadawa ꞌmahârâꞌwa norĩ nhimiꞌuiꞌéré zama.
15 Wa hã duré ĩwasuꞌu wasété ꞌwa norĩ me ꞌRe ihâimana uꞌâsi mono apâ te te idaꞌahâiwaꞌutuzéb zô wa mapari zaꞌra ni, uburé iwẽ norĩ hã duré iwasété norĩ zama.
16 Tahawa, wa ĩsima sô ꞌre ĩrĩtĩ uꞌâsi, rosaꞌrata ꞌre, marĩ te te ĩwi ꞌre roꞌwaꞌré mono tõ da, ꞌRe ihâimana uꞌâsi mono nhoꞌremhã duré uburé danhoꞌremhã.
17 Paulu hã ma ãma uzusi tisiwasuꞌu na hã, ãne:
— Wahub ahâ na Zeruzalẽ nhiti ꞌre ĩmorĩ pari, wa tô ĩsina siri apâ, robꞌuiprazé hã te âri da, ĩnhibꞌaꞌuwẽ norĩ ma, duré ĩnhoprubzé hã te saꞌra da, ꞌRe ihâimana uꞌâsi mono ma.
18 Ã hã te ꞌmanharĩ ré, duré ꞌRe ihâimana uꞌâsi mono ma, ꞌre idasihâiba pese zaꞌra mono zé hã te ꞌrãsutu pari, nima norĩ Zudeu norĩ hã ma tô siwi ĩnhopẽtẽ, ꞌRe ihâimana uꞌâsi mono nhorõwa ãma ꞌri ꞌwawi waꞌra ꞌre. Tame te te ĩꞌmadâꞌâ zaꞌra wamhã, ĩꞌrata dasiꞌrãꞌõtõ õ di. Duré te daꞌawasui õ di.
19 Tane nherẽ, nima norĩ Zudeu norĩ Azia na danhiptiꞌa nhoꞌõmo nhisi hawi isihudu hã te tame tihâimana zaꞌra. Ta norĩ hã te aré we atẽme aihutu, asõꞌre simasab da, te te siwi ĩwasuꞌu wasété da hã, marĩ iré wamhã.
20 Duré niwamhã, ãté ã hã aibâ norĩ hã asõꞌa isimasam norĩ si te za aima ĩwasuꞌu zaꞌra, dama rotiꞌwa norĩ nhoꞌre ĩzab ré, marĩ iꞌupa te iꞌmanharĩzé te te siwi isõpẽtẽ na hã.
21 Isõꞌreb zaꞌra ĩzab ré hã, ãne si wa tô tinha, ĩmreme ꞌrãihâ na: “Ã bâtâ na ĩꞌãma rowairébé te tihâiba, ĩnhimizazei wa, idâꞌâ zaꞌra norĩ hã za apâ ihâiwaꞌutu zaꞌra na.”
22 Tawamhã apito Félis, Bâdâdi ꞌre idanomro mono zép té wasuꞌu hã te te waihuꞌu pese wamhã, ma tô ãne tãma nharĩ zaꞌra:
— Apito Lizia wei wisi wapsi, wa za waihuꞌu niha hã, ate zaꞌra waꞌwa romhâimanazé hã.
23 Taha pari dasiꞌwapéi ꞌmanharĩꞌwa norĩ wadaꞌuriꞌwai ma, ma tô tiꞌru, misi Pauluhu ꞌmadâꞌâꞌwa da hã te te pisutu da, dasiꞌwapéi ꞌmanharĩꞌwa hã. Ma tô duré tiꞌru, sima iwẽ na hâimana da, duré isiwaihuꞌu norĩ marĩ na ãma sina da wamhã.
Paulu hã Apito Félis duré Druzilaha nhoꞌre isabzé
24 Nimahã bâtâ na ronomro pari, ma tô apito Félis hã wi, timro Druzilaha ré. Ta hã Zudeu nhipiꞌõ. Ma tô hâ Pauluhu zô, te te tãma rowasuꞌu zahuré da, Cristu Zezusi hã da te dasina ꞌre iꞌumnhasi zaꞌra mono zém na.
25 Tane nherẽ, Paulu hã dahâimanazé iꞌuwaibaba wasuꞌu na te te ãma tãma sãnaꞌrata wamhã, duré marĩ wi ꞌre idanhiptete zaꞌra mono zé wasuꞌu na, duré Robꞌrãsutu ãma ꞌRe ihâimana uꞌâsi mono za daꞌãma isipoꞌozé wasuꞌu na zama te te tãma rowasuꞌu wamhã, Félis hã ma tô tipahi pese. Tahawa ma tô, ãne tãma tinha:
— Aimorĩ oto. Te ĩsima rowairébé wapsi, wa za ãma asô hâ za.
26 Taha siré hã Félis ma tô rosaꞌrata, Paulu hã robꞌuiprazé te te tãma sõmri da newa. Tahawa ma tô nasi sima sô hâ, te te tãma robzanhamri da.
Paulu hã Festuhu ma isiwasuꞌuzé
27 Maparane wahu siꞌutõrĩ parimhã, Porciu Festu hã ma tô ãzé, Félisihi nhibrobꞌre. Félis ma tô sima wẽ, Zudeu norĩ ma, te te sina rowẽ wazere da. Tahawa watobro wamhã, Paulu ma tô tirẽ, dazazéb ꞌre sab ré.
