Atus 10:1-48
10 Cézaréia na ꞌri nhoꞌõmo nhisi ãma hã te ꞌre hâimana Cornéliu na aibâ nhisi hã, dasiꞌwapéi ꞌmanharĩꞌwa norĩ wadaꞌuriꞌwa hã. Ta hã romanu. Dasiꞌwapéi ꞌmanharĩꞌwa norĩ, isimiꞌubumro norĩ hã Italianu na iwaptẽrẽ.
2 Ta hã ꞌRe ihâimana uꞌâsi mono nhimiroti ꞌmadâꞌâꞌwa. Duré uburé ihawi aꞌuwẽ norĩ hã ꞌRe ihâimana uꞌâsi mono ãma si, te ꞌre wata zaꞌra. Cornéliu hã Zudeu isimarĩꞌõ norĩ hã ma tô te te ꞌre apawapto. Ma tô duré te te ꞌre rowaptẽrẽ, õne uꞌâsi.
3 Nimahã bâtâ na hâiwahâ, bâtâ pibuzé hã siꞌubdatõ ãma*, ma tô sõtõ ꞌrowim ne ꞌmadâ, sõꞌawi hâiwa hawi ꞌRe ihâimana uꞌâsi mono ma romhuriꞌwa hã. Ma tô itẽme sina rotété. Ãne te ꞌmahâ:
— Cornéliu!
4 Pahi uptabi sina ma tô ꞌmadâ pese. Tahawa te ãne sadanha:
— E marĩ.
Tawamhã hâiwa hawi romhuriꞌwa hã ma sadaꞌâ, ãne:
— ꞌRe irowaptẽrẽ mono zé duré isimarĩꞌõ norĩ ꞌre iꞌapawapto mono zé hã ma tô saiꞌuri zahuré ꞌRe ihâimana uꞌâsi mono nhoꞌre u hã, tahawa aiꞌãma poꞌre si âri õ di.
5 Tahawa, maꞌãpé satõrĩ zaꞌra na nima norĩ aibâ norĩ hã, ꞌri nhoꞌu Zopi u, te te we siwi saprõni da Simau hã. Duré ta hã dama waihuꞌu pese di, Pedru na isisi na hã.
6 Tinhipsara romhâ suꞌuꞌwa nhorõwa ãma te nhamra. Isõrõwa hã âporé zaihâ na te ꞌre sa.
7 Hâiwa hawi ꞌRe ihâimana uꞌâsi mono ma romhuriꞌwa hã te te tãma inharĩ hã oto morĩ pari, Coneliu hã maparane tite romhuriꞌwa norĩ zô ma tô tihârâ zahuré, duré dasiꞌwapéi ꞌmanharĩꞌwa tãma iromhuriꞌwa ꞌRe ihâimana uꞌâsi mono nhimiroti ꞌmadâꞌâꞌwa zô zama.
8 Cornéliu hã ma tô tãma rowasuꞌu pese zaꞌra iromhâimanazém na hã. Taha pari ma tô satõrĩ zaꞌra, Zopi u siꞌabaꞌré da hã.
9 Awẽm na hã abzuma waꞌwa, zahadu bâdâdi na siꞌabaꞌréi ré, duré ꞌri nhoꞌõmo u te te sina rotété zaꞌra ré hã, Pedru hã ma tô saiꞌu hâiwi ꞌri nhisi u, te te rowaptẽrẽ da.
10 Pedru hã mra ma tô azâri pese. Tahawa ma tô aré sima wẽ, marĩ te te ꞌrẽne da. Abzuma waꞌwa dasa hã sebre zaꞌra ré hã, ma tô marĩ hã ꞌmadâ, sõtõ ꞌrowim ne.
11 Hâiwa ꞌridawa haré ma tô ꞌmadâ, duré zazahâ hâi wawẽ ne hã, iwasi hã maparane siꞌuiwa na ihâ ꞌrãsutu na, hâiwa hawi we te te isiꞌra hã tiꞌai u.
12 Iꞌremhã sipuꞌu pese na abaze norĩ hã iwamri mono bâ te dabaꞌwara, maparane siꞌuiwa na ipara hã, abaze diꞌi na ꞌre inomro mono duré si norĩ hâiwi ꞌre isisaꞌrei mono norĩ zama.
13 Tawamhã Pedru hã, ma tô wapa damreme hã. Ãne te tãma tinha:
— Pedru, aiwahutu! Asima ꞌmaiwĩrĩ, ꞌrẽne da!
14 Tane nherẽ, Pedru hã ma sadaꞌâ, ãne:
— Mare uptabi di, Ĩnhibꞌapito! Niwa te ꞌrẽne õ di, ꞌRe ihâimana uꞌâsi mono nhimiroti zahi na Mozési te te irobꞌuiꞌérézé te te wawi isawi zahi zaꞌra hã, iwasétére hã.
15 Damreme hã te duré tãma tinha, ãne:
— Sisi tõ iwasété na, ꞌRe ihâimana uꞌâsi mono wẽ na hâimana da, te te iꞌmanharĩ hã.
16 Ãne hã ma tô ãma tãma sahu siꞌubdatõ. Taha parimhã zazahâ hâi wawẽ ne hã ma tô âri ni apâ, hâiwa u.
17 Pedru hã te te sadaihuꞌu da, te te ãma rosaꞌrata pese ré, aibâ norĩ Cornéliu te te isatõrĩ zaꞌra hã ma tô siwi uwaimra, Simahã nhorõwa hã. Tahawa ꞌridawa ãma te oto aimasa.
18 Ma tô dazô tiꞌmaihârâ zaꞌra. Te duré anharĩ zaꞌra, ãne:
— E Simau Pedru na aibâ nhisi hã te ãme nhamra.
19 Pedru hã sõtõ ꞌrowim ne te te iꞌmadâꞌâzém na zahadu te te ãma rosaꞌrata ré hã, ꞌRe ihâimana uꞌâsi mono Pẽꞌẽzani hã ma tô ãne tãma tinha:
— Simau, siꞌubdatõ aibâ norĩ hã te asô ꞌre rĩtĩ zaꞌra.
20 Tahawa, maꞌãpé aiwahutu. Siꞌra na, isiré aimorĩ zaꞌra da. Aihâtâꞌâ ãna isiré aimorĩ zaꞌra na. E marĩ wa. Wa hã wa we satõrĩ zaꞌra ãwa, we siꞌabaꞌré da hã.
21 Tawamhã Pedru hã ma tô siꞌra. Aibâ norĩ ma, ma tô siwasuꞌu, ãne:
— Wa hã, ĩzô te we airĩtĩ zaꞌra waꞌwa. E marĩ zô te we aiꞌabaꞌréi waꞌwa.
22 Aibâ norĩ ma siwi sadaꞌâ, ãne:
— Cornéliu dasiꞌwapéi ꞌmanharĩꞌwa norĩ wadaꞌuriꞌwa hã te wei wazatõrĩ zaꞌra. Ta hã aibâ iwẽ, ꞌRe ihâimana uꞌâsi mono si te te ꞌre umnhasi. Duré uburé Zudeu norĩ ꞌremhã dama wazé pese di. Hâiwa hawi ꞌRe ihâimana uꞌâsi mono ma romhuriꞌwa hã ma tô tãma tinha, tinhorõwa u asô hârâ da, te te aiwapari da, marĩ na tãma inharĩzém na hã.
23 Tawamhã Pedru hã ma tô tãma nharĩ zaꞌra, ꞌri para u sisisi da, sõtõ zaꞌra da aꞌâ.
Awẽm na hã Pedru hã ma tô isiré timorĩ zaꞌra. Tawamhã nima norĩ isazeiꞌwa norĩ Zopi ꞌre, ꞌre ihâimana zaꞌra mono hã te isiré aiꞌabaꞌré.
24 Awẽm na si ma tô aihutu, Cézaréia u hã. Cornéliu hã te sô mapari zaꞌra, tisiwadi norĩ ré duré isiwaihuꞌu norĩ ꞌrâwi tãma ꞌre ihâimana zaꞌra mono norĩ te te iꞌapoꞌre puꞌu ré.
25 Pedru hã ꞌri para u isébrézéb u, ma tô Cornéliu hã sina uzusi ꞌridawa u. Hiꞌrãtitõ ma ipapara aime, ãma wata da. Coneliu hã.
26 Tane nherẽ, Pedru hã ma tô wahutu. Ma tô tãma tinha, ãne:
— Aiwahutu. Wa hã tarére hã aibâ asine hã.
27 Te te tãma robzanhamri zahuré sina, ma tô Pedru hã ãzé ꞌri para u. Tame ma tô daꞌanhopẽtẽ, daꞌahâ na idasiꞌrãꞌõno hã.
28 Tawamhã Pedru hã te tãma nharĩ zaꞌra, ãne:
— Aima waihuꞌu pese zaꞌra waꞌaba di, Zudeu norĩ nhimizaze hã te te iꞌrui õ na hã zudeuꞌõ norĩ na ꞌre siwaihuꞌu zaꞌra mono tõ da, duré isõrõwa u ꞌre sisisi mono tõ da hã. Tane nherẽ, ꞌRe ihâimana uꞌâsi mono hã ma tô ĩma hâiꞌré, niꞌwa hã te sisi tõ da, iwasété na duré niwamhã iꞌuꞌre na hã.
29 Tahawa, ãma ĩzô aihârâ zaꞌra waꞌaba wamhã, wa tô wei mo, ĩsiwapsari ãna. Tahawa wa ĩsima wẽ, te waihuꞌu da. E marĩ da, te ãma ĩzô aihârâ zaꞌra waꞌwa.
30 Cornéliu hã ma sadaꞌâ, ãne:
— Siꞌubdatõ bâdâ ma tô aiꞌutõ, te irowaptẽrẽzém na hã ĩnhorõwa ãma, ãne bâtâ na siꞌubdatõ ãma bâtâ pibuzém na hâiwahâ. Tawamhã rosaꞌrese õ ré, ĩnhoꞌre ma tô za, aibâ iꞌuza ihâirã uptabi hã.
31 Ta hã te ãne ĩma tinha: “Cornéliu, ꞌRe ihâimana uꞌâsi mono hã ma tô wapa, tiwi irowaptẽrẽzé hã. Ma tô duré ãma sipoꞌre puꞌu, isimarĩꞌõ ꞌre iꞌapawapto mono zém na hã.
32 Maꞌãpé niꞌwa hã satõrĩ Zopi u, Simau Pedru na isisi zô. Ta hã te tihâiba tinhipsara Simau romhâ suꞌuꞌwa nhorõwa ãma, â poré zaihâ na ꞌre isãmra mono ãma.”
33 Tahawa, wa tô ãma asô satõrĩ zaꞌra awaꞌawi na, we te te siwi asaprõni da. Tahawa wẽ di, we iꞌaiwisizé hã. Ãhã na hã ãme wa oto wahâimana zaꞌra ni ꞌRe ihâimana uꞌâsi mono nhoꞌre, wa te aiwapari zaꞌra da, Uburé Danhibꞌapito, te te aima iwaihuꞌuzém na hã.
Pedru hã te te irowasuꞌuzé, Cornéliu norĩ ma
34 Tawamhã Pedru hã ma timreme na oto tãma sãnaꞌrata zaꞌra, ãne:
— Ãhã na hã wa tô oto waihuꞌu pese, ꞌRe ihâimana uꞌâsi mono hã aiwapsi te te ꞌre idaꞌaꞌmadâꞌâ mono na hã.
35 Uburé dapoto mono bâ te te ꞌre awaibui wẽ, niꞌwam norĩ te te ꞌre iwazé pese zaꞌra mono norĩ hã duré marĩ iꞌuwaibaba si te te ꞌre iꞌmanharĩ zaꞌra mono norĩ hã.
36 Aima waihuꞌu pese zaꞌra waꞌaba di, ꞌRe ihâimana uꞌâsi mono zadawa wasuꞌu, tinhibꞌaꞌuwẽ Izaraéu nhihudu norĩ ma, te te isõmri hã, Rowasuꞌuwẽ ité hã rowẽ uꞌâsi ꞌre idahâimana zaꞌra mono zé hã Wanhibꞌapito Zezu Cristuhu ãma, Uburé Danhibꞌapito ãma hã.
37 Aima waihuꞌu pese zaꞌra waꞌaba di, iromhâimanazé hã uburé Izaraéu ꞌremhã, Galiléia ãma isãnaꞌratazé hã, â dawabzuri na Zuã hã te te dama ꞌre rowahutu mono pari.
38 Aima waihuꞌu pese zaꞌra waꞌaba di duré, ãne: ꞌRe ihâimana uꞌâsi mono hã ma tô ꞌmanha, Zezusi Nazaré ãma aré ꞌre isãmra mono ma, Ipẽꞌẽzani hã itẽme wisi da. Ma tô duré tãma tisõ, iwaihuꞌu pe hã. Ta hã Zezusi hã ma tô ꞌre mo, daro mono bâ. Marĩ iwẽ hã te te ꞌre abꞌmanharĩ. Te duré te te ꞌre apese waꞌuburé te te ꞌre iwati pese zaꞌra mono norĩ hã, ꞌRe ihâimana uꞌâsi mono isiré ꞌre hâimana mono wa.
39 Wa norĩ hã watõmo na iꞌmadâꞌâꞌwa, uburé marĩ te te ꞌre iꞌaꞌmanharĩ mono zém na hã Zudeu norĩ nhiptiꞌai ꞌremhã duré Zeruzalẽ ꞌremhã. Tame ma tô dasiwi wĩrĩ ni, wedepoꞌo nhonhiꞌrãmi na da te dasiwi isasõmrizém na.
40 Tane nherẽ, ꞌRe ihâimana uꞌâsi mono ma tô apâ hâiwaꞌutu, siꞌubdatõ bâtâ ãma. Ma tô duré tãma pisutu, wa te wasiwi ꞌmadâꞌâ da hã.
41 Uburé aꞌuwẽ norĩ hã da te dasiwi ꞌmadâꞌâ õ di. Wa norĩ si, wa tô ꞌmadâꞌâ zaꞌra ni, ꞌRe ihâimana uꞌâsi mono duréi te te iwapisutu siromo zaꞌra hã. Dâꞌâ nherẽ, apâ hâiwaꞌutu parimhã, wa tô isiré wasaihuri ni. Duré isiré wa âhuri ni.
42 Zezusi hã ma tô wama ꞌru zaꞌra, Rowasuꞌuwẽ itém na wa te dama ꞌre rowahutu zaꞌra mono da, duré ta hã wa te ꞌre wasuꞌu zaꞌra mono da, ꞌRe ihâimana uꞌâsi mono te te ipisutu na hã daꞌãma rowairébéꞌwa na hâiba ré ꞌre ihâimana zaꞌra mono norĩ ma, duré idâꞌâ zaꞌra norĩ ma.
43 Duréihã uburé ꞌRe ihâimana uꞌâsi mono zadawa ꞌmahârâꞌwa norĩ hã ma tô Zezusi te te dama ꞌre wasuꞌu zaꞌra, niꞌwam norĩ te te ꞌre isaze zaꞌra mono hã dawasédé te te daꞌãma ꞌre iꞌabꞌmadâꞌâ mono õ zé, za te te sima ꞌre iwaibui mono na hã, õhõ nhisi zarina.
Zudeuꞌõ norĩ hã ꞌRe ihâimana uꞌâsi mono Pẽꞌẽzani te te iwaibuzé
44 Pedru hã zahadu te te tãma rowasuꞌu zaꞌra ré, ma tô ꞌRe ihâimana uꞌâsi mono Pẽꞌẽzani hã siꞌra, uburé Pedruhu nhimirowasuꞌu te te iwapari zaꞌra norĩ nhisiwimhã.
45 Tawamhã Zudeu norĩ, Zezusihi zazeiꞌwa norĩ Zopi hawi Pedruhu siré isiꞌabaꞌré hã ma tô ãma titobꞌuzui pese zaꞌra, ꞌRe ihâimana uꞌâsi mono tinhoprubzé iwẽ uptabi hã Tipẽꞌẽzani, zudeuꞌõ norĩ nhisiwi te te isaꞌwarizém na.
46 E marĩ wa. Ma tô wapari zaꞌra zudeuꞌõ norĩ hã, damreme aimawi na imreme zusi na hã, duré ꞌRe ihâimana uꞌâsi mono hã danhipaiꞌu waihuꞌu pese uptabi wa, ãma iwata zaꞌra zé hã.
Tawamhã Pedru hã te tinha, ãne:
47 — E ꞌwa hã te te tiwi sawi zaꞌra da bâ bété, ã norĩ hã â dawabzuri te te iꞌmanharĩ zaꞌra da hã. ꞌRe ihâimana uꞌâsi mono Pẽꞌẽzani hã ma tô waibu, wa te iwaibu ne.
48 Tawamhã ma tô tãma ꞌru zaꞌra, Zezu Cristuhu nhisi na, â dawabzuri hã te te ꞌmanharĩ zaꞌra da. Taha parimhã Pedruhu wi ma tô waptẽrẽ zaꞌra, aꞌâ niha bâtâ na iꞌrata sãmra zaꞌra da hã.
Ĩwaꞌõtõ piꞌreba watsuꞌu mono
^ 10:3 Hâiwahâ siꞌubdatõ ãma bâtâ pibuzém na Zudeu norĩ te te ꞌre irowaptẽrẽ zaꞌra mono zé hã
