Emosyonal nga Kahimsog
An Biblia nagpapahamangno kontra ha nakakadaot nga mga emosyon ngan nag-aaghat nga kultibaron an positibo nga mga pagbati.
KASINA
PRINSIPYO HA BIBLIA: “An tawo nga diri madagmit masina mas maopay kay han makusog nga tawo.”—Proberbios 16:32.
AN KARUYAG SIDNGON: Nakakaopay ha aton kon ginkukontrol naton an aton emosyon. Bisan kon usahay may rason kita nga masina, an diri nakukontrol nga kasina nakakadaot gud. An mga parasaliksik nasiring nga kon nasisina an usa, nakakayakan o nakakabuhat hiya hin mga butang nga pagbabasolan niya ha urhi.
AN IMO PUYDI HIMOON: Hibaroi an pagkontrol han imo kasina antes ka pa makontrol hito. May mga natoo nga makusog an masisinahon nga tawo, pero ha pagkamatuod maluya hiya. “Pariho hin syudad nga gin-guhangan an pader an tawo nga diri nakakapugong han iya kasina,” siring han Biblia. (Proberbios 25:28) An usa nga praktikal nga paagi basi makontrol an imo kasina amo an paghibaro anay han bug-os nga detalye antes magreak. “An hilarom nga pagsabot han usa nga tawo nabulig ha iya nga diri masina dayon.” (Proberbios 19:11) Maopay gud nga pamatian anay naton an duha nga bahin, kay maghahatag ito ha aton hin pagsabot nga makakapakalma ha aton.
PAGIN MAPASALAMATON
PRINSIPYO HA BIBLIA: “Ipakita an iyo pagkamapasalamaton.”—Colosas 3:15.
AN KARUYAG SIDNGON: May mga nasiring nga malipayon an mapasalamaton nga mga tawo. Makakapamatuod hini bisan adton nawad-an hin hinigugma o presyoso nga mga butang. Iginsumat nira kon ano an nakabulig ha ira nga maatubang ito—an pagpasalamat ha mga butang nga aada pa ha ira imbes nga magpokus ha mga butang nga nawara ha ira.
AN IMO PUYDI HIMOON: Kada adlaw, ilista an mga butang nga imo iginpapasalamat. Diri man kinahanglan nga dagku ini nga butang. Hunahunaa bisan an simple nga mga butang sugad han mahusay nga pagsirang han adlaw, makalilipay nga pakiistorya ha imo hinigugma, o bag-o nga adlaw ha imo kinabuhi. Inin mag-opay nga butang daku an mahihimo ha imo emosyonal nga kahimsog—kon maghahatag ka la hin panahon ha pagpamalandong hito ngan magin mapasalamaton hito.
Daku nga bulig an paghunahuna kon kay ano nga mapasalamaton ka ha imo pamilya ngan kasangkayan. Kon nahunahuna mo na kon ano an imo iginpapasalamat ha ira, isumat ito ha ira hin personal o pinaagi hin surat, e-mail, o teks. Makakaparig-on ini han imo relasyon ha ira ngan maieksperyensyahan mo an kalipay ha paghatag.—Buhat 20:35.
IBA PA NGA PRINSIPYO HA BIBLIA
Mahimo ka mag-download hin audio recording han Biblia ha Ingles o ha iba pa nga mga 40 nga yinaknan ha jw.org
LIKYI AN PAKIGDISKUSYON.
“An pagpatikang hin away pariho han pag-abri hin ganghaan han tubig; antes magtikang an away, baya na.”—PROBERBIOS 17:14.
LIKYI AN PAGKINABARAKA HA IMO KABUBUWASON.
“Ayaw gud kamo kabaraka mahitungod han sunod nga adlaw, kay an sunod nga adlaw may kalugaringon nga mga kabaraka. An tagsa nga adlaw may kalugaringon nga mga problema.”—MATEO 6:34.
PAGHUNAHUNA ANAY IMBES NGA MAGPADARA HA IMO EMOSYON.
“An abilidad ha paghunahuna padayon nga magbabantay ha imo, ngan an husto nga pagturotimbang magpapanalipod ha imo.”—PROBERBIOS 2:11.
Bangin Maruyagan Mo Liwat
PAGPAMATA!
Panlantaw
An kinaadman ba nga mababasa ha Biblia makakabulig ha imo nga magin mas malipayon?
PAGPAMATA!
Kon Ano an Bubuhaton Kon Naiistres
Hibaroi an pipira nga praktikal nga prinsipyo nga mabulig ha imo nga makaya an istres ngan maibanan pa ngani ito.
