Diri ginagamit han Biblia an pulong nga “aborsyon,” o an pagpunit hin diri pa natatawo nga bata. Pero damu nga bersikulo ha Biblia an nagsusumat han panhunahuna han Dios ha kinabuhi han tawo, pati na ha kinabuhi han diri pa natatawo nga bata.

 An kinabuhi regalo tikang ha Dios. (Genesis 9:6; Salmo 36:9) Presyoso ha iya an ngatanan nga kinabuhi, pati na an kinabuhi han bata ha tagoangkan. Salit kon may magpunit hin diri pa natatawo nga bata, pagpatay ito.

 Ini an siring han Balaud han Dios ha mga Israelita: “Kon may mga tawo nga mag-aragway ngan makaigo hira hin burod nga babaye ngan mag-anak hiya nga diri pa panahon pero waray magresulta hin kamatayon, kinahanglan baydan han nakasala an mga danyos nga gin-aaro ha iya han bana han babaye; ngan kinahanglan baydan niya ito sumala ha desisyon han mga hukom. Pero kon magresulta ito hin kamatayon, kon sugad kinahanglan maghatag ka hin kinabuhi para ha kinabuhi.”​—Exodo 21:22, 23. a

•  San-o nagtitikang an kinabuhi han tawo?

•  Papasayloon ba han Dios an usa nga nagpapunit hadto?

•  Sayop ba an aborsyon kon naninelikado an kinabuhi han nanay o han bata?

 Para ha Dios, an kinabuhi han tawo nagtitikang ha takna mismo nga iginburod an usa nga bata. Ha iya Pulong, an Biblia, an diri pa natatawo nga bata pirme gintatagad han Dios sugad nga usa nga indibiduwal. Tagda an pipira nga ehemplo nga nagpapakita nga para ha Dios, waray kaibahan an kinabuhi han bata ha tagoangkan ngan han bata nga natawo na.

•   Hi Hadi David nagsiring ha Dios: “An imo mga mata nakakita ha akon han nakadto pa ako ha tagoangkan.” (Salmo 139:16) Para ha Dios, tawo na hi David bisan han waray pa hiya ig-anak.

•   Dugang pa, antes matawo hi propeta Jeremias, maaram na an Dios nga may espesyal hiya nga buruhaton nga ihahatag kan Jeremias. An Dios nagsiring ha iya: “Antes ko ikaw pormahon ha tagoangkan kilala ko na ikaw, ngan antes ka matawo ginbaraan ko na ikaw. Ginhimo ko ikaw nga propeta ha mga nasud.”​—Jeremias 1:5.

•   An parasurat han Biblia nga hi Lucas, nga usa nga doktor, naggamit hin uusa la nga Griego nga pulong ha paghulagway ha diri pa natatawo nga bata ngan ha paghulagway ha katatawo pa la nga bata.​—Lucas 1:41; 2:12, 16.

 An mga nagpapunit hadto mahimo mapasaylo han Dios. Kon ginkakarawat na nira yana an panhunahuna han Dios ha kinabuhi, diri na hira kinahanglan umabat hin pagin salaan. “Hi Jehova maloloy-on ngan mapinairon . . . Pariho han kahirayo han ginsisirangan han adlaw ha gintutunoran hito, sugad kahirayo niya iginbubulag tikang ha aton an aton mga pagtalapas.” b (Salmo 103:8-12) Papasayloon ni Jehova an ngatanan nga sinsero nga nagbabasol han ira mga sala hadto, upod na an pagpapunit.​—Salmo 86:5.

 Basado ha ginsisiring han Biblia mahitungod han kinabuhi han diri pa natatawo nga bata, an posibilidad nga mameligro an kahimsog han nanay o han bata diri puydi himoon nga rason nga magpapunit.

 Ano man kon magkaada emergency ha panahon han pag-anak nga tungod hito kinahanglan mamili kon hin-o an sasalbaron​—an nanay o an bata? Hito nga kahimtang, an mga nahidadabi kinahanglan magdesisyon kon kan kanay kinabuhi an sasalbaron.