• “Ta azinay darotoo wodiraa laammidabadan qoppaas.”

• “Taani kawuyyidabadan, loˈˈennabadaaninne pattenna asa gididabadan qoppaas.”

• “Hegaabaa oonaaranne haasayana danddayabeykke. Taani tarkka waayettaas.”

• “Yihooway tawu qoppennabadan taayyo siyettiis.”

Issi machchiyaa I azinay pornograafiyaa a beˈiyo wode A ay keenaa unˈˈettanaakko qommoora deˈiya qofay qonccissees. Geella I daro aginatussi woy layttatussi hegaa geeman oottikko, A ba azinaa mule ammanettennan aggana danddayawusu. Issi machchiyaa hagaadan gaasu: “Ta azinaa mule erennabadaaninne I taappe qottido harabay deˈiyaabadan qoppaas.”

Ha huuphe yohoy azinay pornograafiyaa beˈiyo machcheessi giigiis. b A minettanaadan Yihooway O siiqiyoogaanne maaddanawu koyiyoogaa A ammanettanaadan, qassi sarotettaa demmanaadaaninne Yihoowakko shiiqada deˈanaadan maaddana danddayiya Geeshsha Maxaafay yootiyo maarata ha huuphe yohoy qonccissees. c

Ne azinay oottiyo ubbabaa neeni teqqana danddayennaba gidikkonne, sarotettaa demmanawu neeni oottana danddayiyoobay deˈees. Kaallidi deˈiyaabata beˈa.

Nena mooranchchadan xeelloppa. Issi machchiyaa ta azinay pornograafiyaa beˈiyoy taani mooridobay deˈiyo gishshataassa gaada qoppana danddayawusu. Aliisa A loˈˈenna gishshawu I azinay pornograafiyaa beˈiyaabadan qoppaasu. A, ‘Ta azinay tana aggidi hara maccaasaa xeellanawu koyiyoy aybissee?’ gaada qoppaasu. Issi issi machchoti hanotay yaa iitanaadan oottididabadan qoppiyoogan banttana mooranchchadan xeelloosona. Daaniyeela d hagaadan gaasu: “Taani Kiristtaanetuppe koyettenna iita eeshshaa bessiya, nu aqo deˈuwaa laaliya iita macca asadan tana xeellaas.”

Neenikka hegaadan qoppikko, ne azinay oottidobawu Yihooway nena oychchennaagaa akeeka.  Yaaqooba 1:14y hagaadan gees: “Asi huuphiyan huuphiyan ba huuphe iita amuwan gooshettiyo wodenne cimettiyo wode paacettees.” (Roo. 14:12; Pili. 2:12) Yihooway nena mooranchchadan xeelliyoogaappe neeni awu ammanettada deˈiyoogaa nashshees.—2 Odi. 16:9.

Issi machchiyaa taani loˈˈenna gishshawu ta azinay pornograafiyaa beˈees gaada qoppana danddayawusu. Hegaabaa xannaˈida eranchchati pornograafee issi uri inddan gayttiyoogan ay maccaasankka ufayttennaadan oottiyoogaa yootidosona.

Keehi unˈˈettoppa. Katirina I azinay pornograafiyaa beˈiyoogaabaa ubbatoo qoppiyoogaa yootaasu. Franssa hagaadan gaasu: “Ta azinaa hanotaa taani mule erenna gishshawu unˈˈettaas. Taani ubba galla keehi hirggays.” Issi issi machchoti bantta azinatu metuwaa erana danddayiya ishanttuura woy michchonttuura gayttiyo wode yeellatidoogaa yootidosona. Harati eta hanotaa akeekiya ooninne baa giidi qoppiyo gishshawu banttarkka attidabadan etawu siyettiyoogaa yootidosona.

He ubbabay wottin deˈiyaaba. SHin neeni hegaabaa qoppiyoogan ne wodiyaa ubbaa wurssikko, keehi unˈˈettana. Yaatiyoogaappe, Yihoowaara neeni dabbotido dabbotaabaa ubbatoo qoppanawu baaxeta. Yaatiyoogee neeni genccanaadan maaddana.—Maz. 62:2; Efi. 6:10.

Yihoowa woossiyoogan minttettuwaa demmida maccaasatubaa Geeshsha Maxaafay yootiyo taarikiyaa nabbabiyoogeenne wotti dentti qoppiyoogee nena maaddana danddayees. I eta metuwaa ubbatoo qaarana xayikkonne, eti woppu gaanaadan oottiis. Leemisuwawu, Haanna bana gakkidaban ‘keehi mishettaasu.’ SHin A sinttappe aybi hananaakko erana xayikkonne, Yihoowa ‘adussa woosaa woossa’ simmada woppu gaasu.—1 Sam. 1:10, 12, 18; 2 Qor. 1:3, 4.

Gubaaˈe cimata maaduwaa oychcha. Eti “carkkuwaappe geemmiyo soho, gotiyaappe baqatiyo soho gidana” danddayoosona. (Isi. 32:2) Xuuraa naagananne nena minttettana danddayiya issi michcheera neeni gayttanaadan eti yootana danddayoosona.—Lee. 17:17.

Pornograafiyaa beˈiyo meeziyaa agganaadan neeni ne azinaa maaddana danddayay? Geella maaddana danddayaasa. Metuwaa pagalanawu woy wolqqaama morkkiyaa xoonanawu, “issuwaa gidiyoogaappe naa77a gidiyoogee lo77o” gidiyoogaa Geeshsha Maxaafay yootees. (Era. 4:9-12)  Azinaynne machchiyaa hashetidi oottiyo wode, darotoo azinay pornograafiyaa beˈiyo meeziyaa aggana danddayiyoogaanne machchiyaa zaarettada an ammanettana danddayiyoogaa eranchchati akeekidosona.

Hegee ne azinay pornograafiyaa beˈennan agganawu wozanappe baaxetanawu koyiyoogaara woy koyennaagaara gayttidaba. I minotettaa demmanawu Yihoowa mintti woossidee, qassi maaduwaa cimata oychchidee? (2 Qor. 4:7; Yaaq. 5:14, 15) I pornograafiyaa beˈiyoogaa agganawu maaddiyaabaa halchchidee? Leemisuwawu, I ba elektronike miishshaa goˈettiyoogaara gayttidaagaaninne A paacciya hanotaappe naagettii? (Lee. 27:12) I ne maaduwaa ekkanawu koyii, qassi neessi tumaa yootii? Yaatikko, neeni A maaddana danddayaasa.

Waatada? Issi hanotaa beˈa. Feelisha naatettaappe doommidi pornograafiyaa beˈiyoogee awu amale gidido Eetaana gelaasu. Feelisha I pornograafiyaa beˈanawu qaaqqatiyo wode hegaabaa iira haasayanawu metootennaadan oottaasu. Eetaani hagaadan giis: “Taani ta machcheera qoncciyan haasayays. Paacciyaabaappe naagettanaadan A tana siiquwan maaddawusunne taani oottaydda deˈiyoobaa A tana ubbatoo oychchawusu. Qassi taani Interneettiyaa daro wodiyawu goˈettennaadan maaddaasu.” Eetaani pornograafiyaa beˈanawu qaaqqatiyoogan Feelesha qohettiyoogee attennaba. A hagaadan gaasu: “SHin taani yiillotiyoogeenne azzaniyoogee I ha iita meeziyaa agganaadan oottenna. Nuuni A metuwaabaa haasayi simmin, I taani azzaniyoogaa agganaadan maaddanawu koyiis.”

Hegaadan haasayiyoogee, issi azinay pornograafiyaa beˈiyoogaa agganaadan oottiyoogaa xalla gidennan, A machchiyaa zaarettada an ammanettanaadankka maaddees. Qassi I shugo gididobaa, I biyoosaanne oottiiddi deˈiyoobaa ba machcheessi yootiyo wode, ippe aybanne qosenna gishshawu machchiyaa an ammanettanawu metootukku.

Hegaadan neeni ne azinaa maaddana danddayays gaada qoppay? Yaatikko, ha huuphe yohuwaa issippe nabbabananne tobbana danddayeeta. I pornograafiyaa beˈiyoogaa agganawu halchchiyoogee neeni an ammanettanaadan oottees. Nena qofissiyaaban yiillotiyoogaappe he metoy nena ay keena qofissidaakko I akeekanaadan ootta. He meeziyaa agganawu I baaxetiyo baaxiyan neeni maaddana koshshees; qassi I ammanettiya asa gidanaadan hanotaa injjeya. Asay pornograafiyaa beˈanawu koyiyo gaasuwaanne he metuwaa xoonana danddayiyo ogiyaa intte naaˈˈaykka erana bessees. e

 Neeninne ne aqo laggee hegaabaa haasayiyo wode ooshshay merettaneeshsha gaada yayyikko, intte hegaabaa haasayiyo wode intte dosiyo cimay amarida wodiyawu inttenaara issippe gidanaadan oychchana danddayaasa. Aqo laggee pornograafiyaa beˈiyo meeziyaa aggi simminkka, zaarettidi an ammanettiyoogee adussa wodiyaa ekkiyaaba gidana danddayiyoogaa akeeka. Gidikkonne hidootaa qanxxoppa. Intte issippetettay minnanaadan oottiya guuttabaakka koya. Intte danddayanchcha gidikko, wodeppe intte aqo deˈoy zaarettidi minnanaagaa hidootan naaga.—Era. 7:8; 1 Qor. 13:4.

Ne aqo laggee pornograafiyaa beˈiyoogaa amarida wodiyawu aggi simmidi, beˈiyoogaa zaaretti doommikko hegaa giyoogee I zilˈˈettibeenna woy he amaliyaa mule aggana danddayenna giyoogee? Gidennan aggana danddayees. Ubba pornograafiyaa beˈiyoogee awu amale gidikko, ba deˈo ubban hegaa agganawu baaxetana danddayees. I daro layttawu aggi simmidikka zaarettidi pornograafiyaa beˈana danddayees. He metuwaa xoonidaba milatiyo wodekka ubbatoo bana naaganawu, elekitronke miishshaa goˈettiyoogaara gayttidaagaaninne paacciya hanotaappe naagettanawu baaxetana koshshees. (Lee. 28:14; Maa. 5:29; 1 Qor. 10:12) I ba wozanaanne qofaa muleera ooraxissana koshshees; qassi pornograafiyaanne mastterbeeshiniyaa mala hara tunabaa gujjin, ‘iitabaa ixxana’ koshshees. (Efi. 4:23; Maz. 97:10; Roo. 12:9) I hegaadan baaxetana koyii? Yaatikko, I wodeppe ha amaliyaa muleera aggana danddayees. f

Yaatin, ne aqo laggee ba metuwaa xoonanawu koyennaba gidikkoshin? Neeni darotoo unˈˈettiyoogee, hanqqettiyoogee qassi ne aqo laggee nena kaddidabadan neeyyo siyettiyoogee garamissiyaaba gidenna. Nena hirggissiyaabaa Yihoowa bolli oliyoogan sarotettaa demmana danddayaasa. (1 PHe. 5:7) Xannaˈiyoogan, woossiyoogaaninne wotta dentta qoppiyoogan Yihoowakko shiiqada deˈa. Neeni yaatikko, ikka neekko shiiqanaagaa ammanettana danddayaasa. Mazamure 34:18y yootiyoogaadan, Yihooway “wozanai me77idoogeetussi mataana;” qassi eti zaarettidi ufayttanaadan maaddanawu koyees. Neessi danddayettida keenan gooba Kiristtaane gidanawu baaxeta. Cimata maaduwaa oychcha. Qassi amarida wodiyaappe simmin ne azinay wozanappe laamettana danddayiyoogaa hidootan naaga.—Roo. 2:4; 2 PHe. 3:9.