“Nuuni azallennaba gidikko wodee gakkin cakkana deˈiyo gishshawu, hidootaa qanxxidi likke gididabaa oottiyogaa aggokko.”—Galaatiyaa 6:9, Ooratta Alamiya Birshshettaa.

 “Ane lo77o oosuwaa oottanau azalliyoogaa aggoos. Aissi giikko, nuuni azallennan aggikko, cakkiyo wodee sinttappe yaana.”—Galaatiyaa 6:9, Wolayttatto Geeshsha Maxaafaa.

 Kiitettida Phawuloosi Kiristtaaneti Xoossaa sinttan likke gididabaa, woy loˈˈobaa oottiyogaa aggennaadan minttettiis. Eti hegaadan oottikko, Xoossay eta woytanaagaa ammanettana danddayoosona.

 ‘Hidootaa qanxxokko.’ Ha qofay ‘azallokko’ geetettanakka danddayees. Koyro xaafettido doonan he qofay hidootaa qanxxennaagaa woy yeemottiyogaa aggennaagaakka qonccissees. Kiitettida Phawuloosi banakka gujjidi yootiyogan, hidootaa qanxxissiyabay akka issi issitoo gakkidoogaa yootiis.—Roome 7:21-24.

 “Likke gididabaa,” woy loˈˈobaa geetettiday issi Kiristtaanee Xoossawu haggaaziyo wode oottana bessiya ubbabaa qonccissees. Hegeetu giddon, issi uri ba mala Kiristtaaneta woy harata maaddanawu oottiyobay deˈees.—Galaatiyaa 6:10.

 “Nuuni azallennaba gidikko wodee gakkin cakkana.” Issi goshshanchchay zerido kattay diccanawu wodee koshshiyogaadan, loˈˈobaa oottiyogee demissiyo goˈˈaa akeekanawukka wodee koshshiyogaa Phawuloosi hegaa nabbabiyageeta hassayissiis. Phawuloosi cahaabaa yootiyogan, paydo 7n odettida, “asi ba zeriyoogaa zaarettidi cakkana” giya tuma gididabaara gattidi ha xiqisiya qofaa yootiis. Hara ogiyan qonccissanawu, issi Kiristtaanee Xoossaa sinttan loˈˈo gididabaa oottikko, merinaa deˈuwa gujjin, gita woytuwa cakkana.—Roome 2:6, 7; Galaatiyaa 6:8.

 Kiitettida Phawuloosi ha dabddaabbiya Galaatiyan deˈiya Kiristtaanetussi 50-52 M.L. gakkanawu deˈiya wodiyan xaafiis. I yaatidoy banttana Kiristtaane giikkonne, Yesuusabaa tumaa geellayidi tamaarissiyageetuppe Kiristtaaneta naaganaassa. (Galaatiyaa 1:6, 7) Ha worddo asttamaareti, Xoossay Muuse baggaara beni Israaˈeelatussi immido Higgiyawu Kiristtaaneti azazettana koshshees giidi yootoosona. (Galaatiyaa 2:15, 16) Higgee koyettidabaa poliichchidoogaanne Xoossawu goynniyageeti he higgiya garssan deˈennaagaa Phawuloosi qonccissiis.—Roome 10:4; Galaatiyaa 3:23-25.

 Kiitettida Phawuloosi ba mala Kiristtaaneti “likke gididabaa oottiyogaa” aggennaadan yootiyo wode, Muuse Higgiyawu azazettiyogaabaa yootiiddi deˈenna. I, haratussi loˈˈobaa oottiyogaabaa Yesuusi tamaarissido ubbabaa qonccissiya ‘Kiristtoosa higgiya’ polanaadan eta minttettiiddi deˈees.—Galaatiyaa 6:2; Maatiyosa 7:12; Yohaannisa 13:34.

 Galaatiyaa maxaafaa erissiya ha qantta biiduwa beˈa.