“Tana xeesa, taani neeyyo zaarana; qassi neeni erenna gitabaanne akeekanawu waayissiyabaa taani neeyyo yootana.”—Ermmaasa 33:3, Ooratta Alamiya Birshshettaa.

 “Neeni tana xeesa; taani neeyyo koyana; neeni erenna gitabaanne wolqqaamabaa taani neeyyo yootana.”—Ermmaasa 33:3, Wolayttatto Geeshsha Maxaafaa.

 Xoossay he qofaa yootiyogan, asay woosan A xeeganaadan shoobbiis. Hegaa siyiyageeti he shoobiya ekkidi Xoossaa woossikko, eti demmanabaa I etawu qonccissiis.

 “Tana xeesa, taani neeyyo zaarana.” “Tana xeesa” giya qofay, Xoossaa sunttaa coo xeesiyogaa woy waassidi xeesiyogaa bessiyaba gidenna. Ha sohuwan, Xoossaa xeesiyogee maaduwanne kaaletuwa demmanawu akko woossiyogaa qonccissees.—Mazamure 4:1; Ermmaasa 29:12.

 Ha shoobee shiiqidoy beni Israaˈeela deriyassa gidennan aggenna. Ha deree Xoossawu ammanettibeenna gishshawu, Baabiloone wotaaddarati eta qohidosona. (Ermmaasa 32:1, 2) Yihooway a Israaˈeelati woosan A xeegiyogan akko simmanaadan shoobbiis.

 “Neeni erenna gitabaanne akeekanawu waayissiyabaa taani neeyyo yootana.” Xoossay qonccissanawu qaalaa gelidobati, ‘akeekanawu waayissiyabata’ (woy metiyabata); hegeeti asay barkka mule akeekana danddayennabata. “Akeekanawu waayissiyabaa” giya qofay “geemettidabata” geetettanakka danddayees.

 Xoossay qonccissiyo “geemettidabati” aybee? Sinttappe hananabata, hegeetikka beni Yerusalaame katamay xayanaagaanne baysa gidanaagaa, qassi guyyeppe zaarettidi keexettanaagaa qonccissiis. (Ermmaasa 30:1-3; 33:4, 7, 8) Gidikkonne, Xoossay awu goynniya deree muleera xayennaagaakka yootiis.—Ermmaasa 32:36-38.

 Kawuwa Sedeqiyasi kawotido tammantta layttan, 608 K.K., Yihooway I erissidobaa yootiya Ermmaasawu hagaa yootiis. Yaatin, Ermmaasi Yerusalaame kunddanaagaanne Sedeqiyasi omoodettidi baanaagaa yootiis. Kawoy he odettidabaa dosibeenna gishshawu, Ermmaasa qashissiis.—Ermmaasa 32:1-5; 33:1; 37:21.

 Ermmaasa 33:3n deˈiya shoobiya Xoossay yootiyo wode haniiddi deˈiyabay hegaa. Azzanttiyabay, Kawuwa Sedeqiyasinne hara daroti makkaliyogaa aggibookkona. (Ermmaasa 7:26; 25:4) Eti kaaletuwa demmanawu Xoossaa xeesibookkona. Amarida layttaappe simmin, Sedeqiyasappe A maatay ekettiis, Yerusalaame xayiis, qassi paxa aattida daroti omoodettidi Baabiloone biidosona.—Ermmaasa 39:1-7.

 Ermmaasa 33:3n deˈiya qofay, Xoossay akko woossiyageetuyyonne A Qaalaa, Geeshsha Maxaafaa minttidi nabbabiyageetuyyo ‘A sheniya eriyo tumu eratettaa’ immanaagaanne ‘geemettida yohuwa’ qonccissanaagaa ha wodiyan hegaa nabbabiyageeti hassayanaadan oottees. (Qolasiyaasa 1:9; 1 Qoronttoosa 2:10) Xoossay mata wode oottanawu qaalaa gelidobay he geemettidabatuppe issuwa.—Ajjuutaa 21:3, 4.

 Ermmaasa maxaafaa erissiya ha qantta biiduwa beˈa.