Moovirikana ni apinaatamu, ohinatthi okhala valaponi, Yesu aakhala wiirimu ntoko nlaikha. (Yohani 8:23) Yesu topaceriwe opattuxiwa ni Muluku, nuumala vo owo aahimukhaliherya Muluku opattuxa itthu sikina sikhanle. Yesu mekhawe paahi topattuxiwe ni mwaneene Yehova, tivonto vaniitthaniwa awe ‘Mwana mmosáru’ a Muluku. (Yohani 1:14) Yesu aari Namitthaka a Muluku, tivonto vaniitthaniwa awe-tho “Nsu”.​—Musome Miruku 8:22, 23, 30; aKolosi 1:15, 16.

Muluku aahimuruma Mwanawe, khuthamiha ekumi awe wiirimu khuroiha mmirimani mwa Maria, mwali muYuda ahaakumanenle ni mulopwana. Tivonto Yesu khaarina tiithi pinaatamu. (Luka 1:30-35) Yesu aahirwa valaponi, (1) wira owiixuttihe atthu ekeekhai voohimya sa Muluku, (2) wira onivahe ntakiheryo na moota woopaka yootthuna ya Muluku, hata okathi wa mixankiho, ni (3) wira ovahe erutthu awe yoohittheka ntoko ‘yowopola’.​—Mmusome Matheyo 20:28.

Wira oopoliwe mutthu eniliviwa esisapo enireerela, wira otaphuliwe mutthu aarowa okhwa. (Okhuma 21:29, 30) Okhala wene, okhwa ni wuuluvala khahiyo yaari yoolakela ya Muluku wa apinaatamu. Nto ninsuwela sai? Muluku aahimuhimeerya Adamu, mutthu oopacerya, wira akhala wira aarowa  ovara ele Biibiliya enihimya awe okhala “etampi”, Aamookhwa. Vaakhanle wira Adamu khaatthekale, khaarowa okhwa. (Maphattuwelo 2:16, 17; 5:5) Biibiliya onihimya so: okhwa “ohaphwanya” atthu otheene mwaha wa Adamu. Tthiri, Adamu ohaaraviha anaawe ottheka ni okhwa. Nto nihaana oliveriwa wira noopoliwe okhwa oravihiwa ahu ni Adamu.​—Mmusome aRoma 5:12; 6:23.

Ti pani aarowa onoopola wira nihikhweeke? Vaavo mutthu vanikhwa awe onliva ottheka wawe paahi. Khuuvo pinaatamu oniwerya oliverya soottheka sa apinaatamu akina.​—Musome Esalimo 49:8-10.

Moovirikana ni hiyo, Yesu aari oohittheka. Khivaatthuneya ookhwa mwaha wa soottheka sawe, okhala wira khonattheke. Yesu aahikhwa wira oliverye soottheka sa akina. Muluku aahaaphenta apinaatamu vaalupalexa, khimuruma Mwanawe wira okhwe mwaha wa hiyo. Yesu aahooniherya-tho ophenta, amwiiwelelaka Tiithi awe, ni oleva okumi awe mwaha wa itampi sahu.​—Mmusome Yohani 3:16; aRoma 5:18, 19.

Nwehe eviidiyu Exeeni Yaamwiirinhe Yesu Okhwa?

Oryeene valaponi, Yesu aahaavoniha aretta, waahihimuxa alipa-ookhwa ni owaakiherya atthu sowoopiha. Itthu iyo sooniherya ele enrowa awe opaka muhoolo wa apinaatamu otheene oowiiwelela. (Matheyo 15:30, 31; Yohani 5:28) Nuumala okhwa, Muluku aahimuttikiherya ekumi khukhala nlaikha. (1 Pedru 3:18) Wiirimu, Yesu aaniwehererya moono woolopwana wa Muluku, wira Muluku onvahe owerya woolamulela elapo yotheene. (aHéberi 10:12, 13) Nenla va, Yesu onnilamulela wiirimu ntoko Mwene, nto atthareli awe annilaleya mulaponi ehapari eyo yooreera.​—Mmusome Daniyeli 7:13, 14; Matheyo 24:14.

Moohipisa Yesu onorumeela owerya wawe ntoko Mwene, wira omalihe ohaawa wotheene, ni waapwetexa ale anikumiherya ohaawa mulaponi. Nto otheene yaale animwaamini Yesu yeettelaka sooruma sawe, anrowa okhalaka mparayiisu valaponi.​—Musome Esalimo 37:9-11.