aRoma 5:1-21
5 Vano nihimmwale ahu okhala anaxariya mwaha wa waamini wahu, nnoowerya okhalana murettele ni Muluku, mwaha wa Pwiya Yesu Kristu.
2 Omwaamini wahu Yesu, onnineemererya omwaattamela Muluku ni ottottela mureerelo oreera murima wuulupale wa Muluku. Hiyo pooti otteeliwa murima, okhala wira ninnilipelela waakhela ovuwa onikhuma wa Muluku.
3 Ohiya-vo, nitteeliweke murima okathi onihaawa ahu, maana noosuwela wira ohaawa onnikumiherya ovilela;
4 nave ovilela, onniniiriha weemereriwa ni Muluku. Weemereriwa ni Muluku, onninivaha nlipelelo,
5 vano hiyo pooti ororomela tthiri nlipelelo nlo, okhala wira Muluku onnirumeela munepa awe woowaarya, yoowo onnivaha awe, ooniheryaka wira onniniphenta.
6 Kristu ohaakhwela anatampi, okathi Muluku aathanlale awe. Owo aakhwiiye nlelo nri ene ootteettheya.
7 Ti voovila mutthu omukhwela naxariya. Masi woonasa wene, pooti omukhwela mutthu ooreera murima.
8 Muluku onninooniherya ophenta wawe mwa enamuna ela: Kristu oonikhwela nlelo nri ene anatampi.
9 Tivonto, okhala wira ephome ya Kristu ennimwiiriha Muluku onithokorerya okhala anaxariya, nikupaliki wira eyo enoonoopola oviruwa wa Muluku.
10 Nnaamwi naari awanani a Muluku, hiyo nookhala apatthani awe* mwaha wa okhwa wa Mwanawe. Eyo ennitepa onikupaliha wira ninrowa woopoliwa mwaha wa okumi wa Yesu, vano nri ahu apatthani a* Muluku.
11 Ele Muluku opanke awe omurumeelaka Pwiya ahu Yesu Kristu, enninitteeliha murima, okhala wira mwaha wa yoowo, hiyo nookhala apatthani a* Muluku.
12 Etampi yookela moolumwenkuni mwaha wa mulopwana mmosa, nto etampi eyo yooruuha okhwa. Siiso, okhwa ohaaphwanya atthu otheene, okhala wira atthu otheene aattheka.
13 Etampi yaahikhala mulaponi nihinatthi okhumelela Nlamulo. Masi naahikhale nlamulo, khuuvo onivahiwa mulattu wa etampi.
14 Okhwa waahilamulela okhuma Adamu mpakha Moise. Nave ohaalamulela ale ahitthenke ntoko yaatthenke aya Adamu. Nto Adamu aamuthoonyerya* ole aarowa okhumelela muhoolo.
15 Masi yoovaha ya Muluku khenlikana ni etampi ya Adamu. Atthu anceene ahookhwa mwaha wa etampi ya mulopwana owo mmosa. Masi oreera murima wuulupale wa Muluku, ni yoovaha awe mwaha wa oreera murima wuulupale wa mulopwana mmosa, eyo piiyo, Yesu Kristu, ti wootepa wunnuwa. Orumeelaka yoovaha eyo, Muluku onnaavaha mareeliho oowaatta atthu anceene!
16 Nave-tho, etthu enikumiherya aya yoovaha ya Muluku, khenlikana ni ele enikumiherya aya etampi ya mulopwana mmosa. Tthiri etampi ya mulopwana mmosa yookumiherya mulattu,* masi nuumala atthu anceene opaka itampi sinceene, Muluku ohaavaha etthu ewiirinhe ohimmwa okhala anaxariya.
17 Vakhala wira mwaha wa etampi ya mulopwana mmosa, okhwa waahilamulela, nto ale yaakhenle voowaatta oreera murima wuulupale wa Muluku ni yoovaha ya xariya, anrowa otepaka olamulela ari ene akumi, mwaha wa mutthu mmosa, Yesu Kristu!
18 Siisaale etampi ya mulopwana mmosa yaakumihenrye aya mulattu* atthu otheene, siiso-tho, muteko mmosa wa xariya, woowiiriha atthu otheene ohimmwa okhala anaxariya, wira akhale akumi.
19 Tthiri, mwaha wa ohiiwelela wa mulopwana mmosa, atthu anceene yaahikhalihiwa anatampi, siiso-tho, mwaha wa wiiwelela wa mulopwana mmosa, atthu anceene anookhalihiwa anaxariya.
20 Vano, Nlamulo naahikumiheriwa wira yooniheriwe atthu wira aatepa ottheka. Masi okathi vaatepa aya wooneya wira itampi khasireere, nave oreera murima wuulupale wa Muluku, waamutepa wuncerereya.
21 Mwaha wa xeeni? Mwaha woowi, siisaale etampi elamulenle aya, enakumiherya okhwa, siiso-tho, oreera murima wuulupale wa Muluku olamulele mwaha wa exariya eniphwanyiha okumi woohimala, mwa Yesu Kristu Pwiya ahu.
Inoota
^ Ekereku, “nihaataanihiwa ni Muluku”.
^ Ekereku, “naataanihiwe ahu ni”.
^ Aahiiso, “nihaataanihiwa ni”.
^ Aahiiso, “aari elatarato ya”.
^ Aahiiso, “olamuliwa”.
^ Aahiiso, “olamuliwa”.
