Masaalimu 37:1-40
-
Ale animuroromela Yehova, itthu sinooweettela saana
Nsipo na Davidi.
א [aalefe]
37 Muhinanariwe mwaha wa atthu ootakhala,Aahiiso muhaakhalele nrima atakhali.
2 Awo animuuma voowaakuveya ntoko malaxi,Anoonyaala ntoko malaxi makithi.
ב [beete]
3 Mmuroromeleke Yehova, ni mwiireke itthu sooreera;Mukhaleke mulaponi, ni muroromeleyeke.
4 Mutteeliweke murima vanceene mwaha wa Yehova,Owo onimoovahani itthu simphavela murima anyu.
ב [kiimele]
5 Muhiye mmatatani mwa Yehova, itthu sootheene munivara anyu;Mmuroromele, nto owo onoopaka etthu para mureerelo anyu.
6 Owo onimwiiriha oreera wanyu murima waaryaka ntoko voosiisu,Nave exariya anyu, waaryaka ntoko nsuwa na othana eriyari.
ד [taalete]
7 Mulipeleleke ohoolo wa Yehova moopixa murima,Nave munwehereryeke yoowo.
Muhinanariwe mwaha wa mutthu,Yoowo itthu sinimweettela saana mwaha wa apalano awe ootakhala.
ה [he]
8 Muhiye onanariwa, ni muttharuwe oviruwa;Muhinanariwe ni muhitthikele opaka itthu sootakhala.*
9 Atakhali anoopwetexiwa,Masi ale animulipelela Yehova, animwaakhela elapo.
ו [vaawu]
10 Voohipisa-va, atakhali khanrowa okhala-tho;Munrowa owaavyaka opuro yaakhala aya,Masi khamunrowa waaphwanya.
11 Masi atthu oowiiyeviha* animwaakhela elapo,Anootteeliwaka murima vanceene, maana anookhalana murettele munceene.
ז [saine]
12 Mutakhali onnimpaka palano wiira omuhaaxe naxariya;Owo onninanariwa vanceene* anweha vale.
13 Masi Yehova onoomutheya mutakhali owo,Okhala wiira onnisuwela wiira nihiku nawe nnoophiya.
ח [heete]
14 Atakhali annitholola ispaata saya* ni annikokha miyuura saya,Wiira awiive atthu anihaaxiwa ni oohaawa.Wiira yaapwetexe ale aniira itthu sooreera.
15 Masi espaata aya enoothorola mirima saya;Miyuura saya sinimuntakasiwa.
ט [teete]
16 Fataari itthu vakhaani orina awe naxariya,Ovikana itthu sinceene arina aya atakhali anceene.
17 Ikuru sa atakhali, sinoomalihiwa,Masi Yehova onimwaakhaliherya anaxariya.
י [iyoote]
18 Yehova onnisuwela itthu siniwiiraneela anaxariya,Nave onimwaavaha etthu ehinimala.
19 Okathi wa maxakha, awo khanrowa wuuliwa muru;Okathi wa etala, anookhalana eyoolya yinceene.
כ [kaafe]
20 Masi atakhali animookhwa;Awanani a Yehova anoorimeela ntoko malaxi ooripelela, yaawo aninyaala moowaakuveya;Awo anoolakaseya ntoko mwiixi.
ל [laamete]
21 Mutakhali onnikopha, ohinaliva;Masi naxariya toovaha,* ni tooreera murima.
22 Ale anireelihiwa ni Muluku, animwaakhela elapo,Masi ale anitakhalihiwa ni Muluku, anoopwetexiwa.
מ [meeme]
23 Okathi Yehova sinimusivela aya miteko sa mutthu,Owo onneettiha mavalo* a mutthu owo.
24 Hata mutthu owo okwattuliwaka,* khonrowa omora,Okhala wiira Yehova onnimukhaliherya, onvarelaka ntata.*
נ [nuune]
25 Miyo kaari mmiravo, nto vano kihuuluvala;Masi nkinamoone naxariya onyanyaliwe ene;Nnakhala nkinawoone anaawe avekaka eyoolya.
26 Okathi wootheene, owo onniwooliha akina ni murima wootheene,Anaawe animwaakhela mareeliho.
ס [saameke]
27 Musyakeke itthu sootakhala, ni mwiireke itthu sooreera,Nto munrowa okhalaka mahiku ootheene.
28 Yehova ennimusivela exariya,Ni khonrowa waanyanyala arumeyi awe oororomeleya.
ע [aine]
Awo anookhapeleliwaka okathi wootheene;Masi osuulu wa atakhali, onoomalihiwa.
29 Anaxariya animwaakhela elapo,Nave anrowa okhalaka memmo voohimala.
פ [pe]
30 Moolumo a naxariya annaakhaliherya atthu akina okhalana ankhili,Nave owo onnilavula itthu sa xariya.
31 Nlamulo na Muluku awe, niri vamurimani vawe;Eettaka, khonrowa otherekuwa.
צ [tisaate]
32 Mutakhali onninwehaweha naxariya,Ophavelaka omwiiva.
33 Masi Yehova khonrowa omuhiya naxariya iiviwaka ni mutakhali,Nnakhala khonrowa onvaha mulattu naxariya owo, okathi oniphukeliwa awe.
ק [koofe]
34 Mmulipeleleke Yehova ni mweetteleke iphiro sawe,Owo onimoovahani eparakha ya waakhela elapo.
Okathi atakhali anrowa aya opwetexiwa, nyuwo munimwaaweha.
ר [reexe]
35 Miyo konweha mutthu ootakhala ni oonanara murima,Othaaciriki ntoko mwiri oninnuwa nipuro omenle aya.
36 Masi niinaano-ru, owo aahikhwa ni aahirimeela;Miyo kaanimwaavya, masi khuhimphwanya.
ש [xiimi]
37 Munweheke mulipa-oororomeleya,Mmooneke naxariya,Okhala wiira onookhalana murettele ohoolo.
38 Masi ootheene ale anitthekela nlamulo na Muluku, anoopwetexiwa;Atakhali khanilipelela etthu ohoolo.
ת [taawu]
39 Yehova tori moopoli a anaxariya;Owo tori empa aya yoolipihiwa, okathi wa mixankiho.
40 Yehova onimwaakhaliherya ni onoowoopola.
Owo onoowaakiha mmatatani mwa atakhali ni onoowoopola,Okhala wiira annimutthyawelela yoowo.
Inoota
^ Aahiiso, woonasa wene: “Muhinanariwe, okhala wiira eyo pooti wookumiheryani maxakha”.
^ Eheeperi, “atthu oomaala”.
^ Eheeperi, “onnilumanyiha maino awe”.
^ Aahiiso, “axoowa aya”.
^ Aahiiso, “tookhaliherya”.
^ Aahiiso, “onnilipiha mavalo”.
^ Aahiiso, “okwathulaka; okakattuwaka”.
^ Aahiiso, “ni ntata nawe”.
