Yesu U Tshidza Nga Nḓila Ḓe?
Bivhili i a fhindula
Yesu o tshidza vhathu vha fhulufhedzeaho musi a tshi ṋekedza vhutshilo hawe sa tshirengululi. (Mateo 20:28) Ndi ngazwo, Bivhili i tshi vhidza Yesu “Mutshidzi wa shango.” (1 Yohane 4:14) I dovha ya amba uri: “A hu na muṅwe ane a kona u tshidza, ngauri a hu na ḽiṅwe dzina shangoni ḽe Mudzimu a ḽi nanga kha vhathu uri a ri tshidze ngaḽo.”—Mishumo 4:12.
Yesu o ‘fela vhoṱhe’ vhane vha vha na lutendo khae. (Vhaheberu 2:9; Yohane 3:16) Nga murahu, “Mudzimu o mu vusa vhafuni” nahone Yesu a humela ṱaḓulu sa tshivhumbeo tsha muya. (Mishumo 3:15) Musi Yesu e henengei ṱaḓulu, “u a kona u tshidza nga ho fhelelaho vhane vha sendela tsini na Mudzimu nga ene, ngauri u ḓi dzula a tshi tshila uri a vha pfumelele.”—Vhaheberu 7:25.
Ndi ngani ri tshi ṱoḓa uri Yesu a ri pfumelele?
Roṱhe ri vhaitazwivhi. (Vharoma 3:23) Tshivhi tshi ri fhandekanya na Mudzimu nahone tshi ri isa lufuni. (Vharoma 6:23) Fhedzi Yesu u shuma sa “muthusi” kha vhane vha vha na lutendo kha tshirengululi tshawe. (1 Yohane 2:1) U a vha pfumedzanya na Mudzimu, nga u vha humbetshela khae uri a pfe thabelo dzavho na u vha hangwela zwivhi zwavho nga tshiṱhavhelo tsha lufu lwawe. (Mateo 1:21; Vharoma 8:34) Yehova u a fhindula dzenedzo khumbelo dzo itwaho nga Yesu ngauri dzi vha dzi tshi khou tshimbidzana na zwine a zwi funa. Mudzimu o rumela Yesu kha ḽifhasi “uri shango ḽi tshidzwe nga ene.”—Yohane 3:17.
Naa u tenda kha Yesu zwo eḓana u itela uri ri tshidzwe?
Hai. Naho ri tshi tea u tenda kha Yesu u itela u tshidzwa, hu ṱoḓea zwo engedzeaho. (Mishumo 16:30, 31) Bivhili i ri: “Vhunga muvhili u si na muya wo fa, na lutendo lu si na mishumo lwo fa.” (Yakobo 2:26) Uri ri tshidzwe ri tea:
U guda nga ha Yesu na Khotsi awe Yehova.—Yohane 17:3.
U vha na lutendo kha Yehova na Yesu.—Yohane 12:44; 14:1.
U sumbedza lutendo lwashu nga u thetshelesa milayo yavho. (Luka 6:46; 1 Yohane 2:17) Yesu o funza uri a si vhoṱhe vhane vha mu vhidza “Murena” vhane vha ḓo tshidzwa fhedzi hu ḓo tshidzwa vhane vha “ita zwi funwaho nga Khotsi [awe] wa ṱaḓulu.”—Mateo 7:21.
U bvela phanḓa ri tshi sumbedza lutendo nga u konḓelela. Yesu o zwi bvisela khagala musi a tshi ri: “Ane a konḓelela u swika vhufheloni ndi ene ane a ḓo tshidzwa.”—Mateo 24:13.
You May Also Like
MBUDZISO DZA BIVHILI DZO FHINDULWA
Naa U “Tenda Yesu” Zwi Ita Uri Muthu A Tshidzwe?
Bivhili i amba nga ha vhaṅwe vhane vha sa ḓo tshidzwa naho vha tshi tenda Yesu. Zwi ḓa hani uri vha si tshidzwe?
MBUDZISO DZA BIVHILI DZO FHINDULWA
Naa Bivhili I Ri ‘Wa Vhuya Wa Tshidzwa, Wo Tshidzwa Lwa Tshoṱhe’?
Yesu o nea tshifanyiso tshine tsha fhindula yeneyo mbudziso.
ESSENTIAL BIBLE TEACHINGS
Ndi Ngani Yesu O Fa?
Khamusi ni a zwi ḓivha uri Yesu o fela zwivhi zwashu. Fhedzi naa lufu lwa muthu muthihi lu nga tshidza vhathu vhoṱhe?
TSHIINGAMO
Nḓila Ya U Wana Vhutshilo Ha Khwine
Hu na “nḓila” ine na fanela u tshimbila khayo u itela u wana vhutshilo vhune Yehova a ḓo vhu ṋea vhane vha mu funa.
PFUNZO DZA BIVHILI
Lingedzani Heyi Ngudo Ya Bivhili
Gudani Bivhili nga mahala ni tshi khou thuswa nga muṅwe wa Ṱhanzi dza Yehova.