Mishumo Ya Vhaapostola 4:1-37
4 Musi Petro na Yohane vha tshi khou amba na vhathu, ha ḓa vhotshifhe, mulangi wa vhalindi vha thembele na Vhasadukei.+
2 Vho vha vho sinyuwa ngauri vhenevho vhaapostola vho vha vha tshi khou funza na u ḓivhadza vhathu uri Yesu o vuswa vhafuni.+
3 Vha vha fara vha vha valela dzhele+ u swika nga ḓuvha ḽi tevhelaho, ngauri ḓuvha ḽo vha ḽo no kovhela.
4 Naho zwo ralo, vhathu vhanzhi vhe vha pfa zwenezwo vha vha vhatendi, tshivhalo tsha vhenevho vhanna tsho vha tshi tshi ṱoḓa u vha 5 000.+
5 Nga ḓuvha ḽi tevhelaho ha kuvhangana vharangaphanḓa vhavho, vhahulwane na vhamaṅwalo ngei Yerusalema
6 na Anasi+ muhulwane wa vhotshifhe, Kayafa,+ Yohane, Alekzanda na vhoṱhe vha re mashaka a muhulwane wa vhotshifhe.
7 Vha imisa Petro na Yohane vhukati havho vha vha vhudzisa vha ri: “Naa ni ita yeneyi mishumo nga maanḓa a nnyi kana nga dzina ḽa nnyi?”
8 Nga zwenezwo, Petro a ḓala muya mukhethwa,+ a ri:
“Vhavhusi vha vhathu na vhahulwane,
9 naa ni ṱoḓa u ḓivha nga ha mushumo wavhuḓi we ra u ita wa u fhodza onoyu munna o holefhalaho,+ na uri ndi nnyi we a mu fhodza?
10 Inwi na vhathu vhoṱhe vha Isiraele ḓivhani uri hoyu munna o fhodzwa dzinani ḽa Yesu Kristo wa Nazaretha,+ ndi ene o itaho uri onoyu munna o imaho phanḓa haṋu a fhole, onoyo Yesu we na mu ombela kha danda,+ fhedzi Mudzimu a mu vusa.+
11 Ḽeneḽi ndi ‘tombo ḽe ḽa laṱwa nga inwi vhafhaṱi na ḽi dzhia ḽi si ḽa ndeme ngeno ḽi ḽone thikho ya tshifhaṱo.’+
12 Zwiṅwe hafhu, a hu na muṅwe ane a kona u tshidza, ngauri a hu na ḽiṅwe dzina+ shangoni ḽe Mudzimu a ḽi nanga kha vhathu uri a ri tshidze ngaḽo.”+
13 Musi vha tshi vhona Petro na Yohane vha tshi amba nga tshivhindi na u vhona uri ndi vhanna vha songo funzeaho* vha re vhathu zwavho,+ vha mangala. Ndi hone vha tshi zwi ṱhogomela uri vho vha vha tshi tshimbila na Yesu.+
14 Musi vha tshi vhona onoyo munna we a fhodzwa o ima navho,+ vha si fhindule tshithu.+
15 Vha ri vha bvele nnḓa ha holo ya Sanihedrini,* vhone vha sala vha tshi ambedzana nga tshavho,
16 vha ri: “Ri ite mini nga avha vhanna?+ Ngauri vho ita vhuṱolo vhu mangadzaho he ha vhonwa nga vhathu vhoṱhe vha Yerusalema,+ na riṋe a ri koni u vhu hanedza.
17 Kha ri vha tshuwise, ri vha vhudze uri vha songo tsha dovha vha amba nga ha ḽeneḽi dzina vhukati ha vhathu.”+
18 Vha vha vhidza vha vha laya uri vha songo tsha amba tshithu kana u funza naho hu ngafhi nga dzina ḽa Yesu.
19 Fhedzi Petro na Yohane vha ri: “Inwi haṱulani arali zwo luga phanḓa ha Mudzimu uri ri thetshelese inwi nṱhani ha u thetshelesa Mudzimu.
20 Fhedzi riṋe ri nga si litshe u amba nga ha zwe ra zwi vhona na u zwi pfa.”+
21 Musi vho no vha tshuwisa, vha vha vhofholola, ngauri a vho ngo vha vhona mulandu une wa nga ita uri vha vha pfise vhuṱungu, na ngauri vho vha vha tshi ofha vhathu,+ ngauri vhathu vhoṱhe vho vha vha tshi khou renda Mudzimu nga zwe zwa itea.
22 Munna we a fhodzwa nga lwa vhuṱolo o vha e na miṅwaha i fhiraho 40.
23 Musi vho no vhofhololwa, vha ṱuwa vha ya kha vhatendi ngavho, vha vha vhudza zwe vhahulwane vha vhotshifhe na vhahulwane vha vha vhudza zwone.
24 Vha tshi pfa zwenezwo, vhoṱhe vha rabela Mudzimu nga ipfi ḽihulu vha ri:
“Murena Muvhusahoṱhe, ndi Iwe wo sikaho ḽiṱaḓulu, ḽifhasi, lwanzhe na zwoṱhe zwi re khazwo,+
25 wo amba nga muya mukhethwa u tshi shumisa Davida+ makhulukuku washu, mushumeli wau, wa ri, ‘Ndi ngani tshaka dzo sinyuwa, vhathu vha tshi elekanya nga ha zwithu zwi si na mushumo?
26 Mahosi a ḽifhasi o lugela u lwa, vhavhusi vho kuvhangana nga tshavho uri vha lwe na Yehova* na muḓodzwa wawe.’*+
27 Herode, Pontio Pilato,+ vhathu vha dziṅwe tshaka na Vhaisiraele vho vha vho kuvhangana kha wonoyu muḓi u itela u lwa na mushumeli wau mukhethwa Yesu, we wa mu ḓodza,+
28 vhenevho vho kuvhangana u itela uri hu itee zwe wa dzula wo zwi amba. Zwenezwi zwo itea ngauri iwe u na maanḓa na uri ndi zwe wa vha u tshi ṱoḓa uri zwi itee.+
29 Zwino Yehova,* thetshelesa musi vha tshi ri tshuwisa, u thuse vhalanda vhau uri vha dzule vha tshi amba ipfi ḽau nga tshivhindi,
30 ngeno u tshi khou sumbedza maanḓa au nga u fhodza na u ita vhuṱolo na zwithu zwi mangadzaho+ nga dzina ḽa Yesu mushumeli wau mukhethwa.”+
31 Musi vha tshi fhedza u rabela, fhethu he vha vha vho kuvhangana hone ha dzinginyea, vhoṱhe vha ḓala muya mukhethwa,+ vha ḓivhadza ipfi ḽa Mudzimu nga tshivhindi.+
32 Zwiṅwe hafhu, vhe vha tenda vho vha vhe na vhuthihi, hu si na we a vha a tshi dzhia thundu dze a vha e nadzo sa dzine dza vha dzawe, fhedzi vho vha vha tshi kovhelana zwine vha vha nazwo.+
33 Vhaapostola vha bvela phanḓa vha tshi ṱanziela nga hu bvelelaho uri Murena Yesu o vuswa,+ Mudzimu a sumbedza vhoṱhe vhuthu hawe vhuhulu.
34 Ho vha hu si na we a vha a tshi shaya tshithu vhukati havho,+ ngauri vhoṱhe vha re na masimu kana dzinnḓu vho vha vha tshi zwi rengisa, vha ḓisa tshelede ya zwithu zwe vha zwi rengisa,
35 vha i ṋea vhaapostola.+ Vhone vha i kovhela muṅwe na muṅwe u ya nga zwine a zwi shaya.+
36 Yosefa, we vhaapostola vha vha vha tshi mu vhidza Baranaba+ (zwine zwa amba uri “Murwa wa Khuthadzo”), o vha e Mulevi o bebelwaho Kipiro,
37 onoyo o vha e na tsimu, a i rengisa, tshelede ya hone a i ṋea vhaapostola.+
Ṱhaluso dzi re magumoni a siaṱari
^ Vho vha vha songo ya zwikoloni zwa vhorabi; a zwi ambi uri vho vha vha sa koni u vhala na u ṅwala.
^ Sanihedrini ndi khothe khulwane ya Vhayuda.
^ Kana “Kristo wawe.”
