Zwi Amba Mini U Tshidzwa?
Bivhili i a fhindula
Nga zwiṅwe zwifhinga, vhaṅwali vha Bivhili vha shumisa maipfi “tshila” na ‘tshidzwa’ u itela u ḓisa muhumbulo wa musi muthu a tshi tshidzwa kha khombo. (Ekisodo 14:13, 14; Mishumo 27:20) Naho zwo ralo, kanzhi enea maipfi a ambela kha u tshidzwa kha tshivhi. (Mateo 1:21) Samusi lufu lwo bveledzwa nga tshivhi, vhathu vho tshidzwaho kha tshivhi vha na fulufhelo ḽa u tshila tshoṱhe.—Yohane 3:16, 17. a
Ri fanela u ita mini uri ri tshidzwe?
Uri ri tshidzwe, ri fanela u vha na lutendo kha Yesu na u tevhedza ndaela dzawe.—Mishumo 4:10, 12; Vharoma 10:9, 10; Vhaheberu 5:9.
Bivhili i amba uri ri fanela u sumbedza uri ri na lutendo nga mishumo yashu kana nga u thetshelesa. (Yakobo 2:24, 26) Naho zwo ralo, zwenezwo a zwi ambi uri ri nga tshidzwa. Honoho u tshidzwa ndi “tshifhiwa tshi bvaho ha Mudzimu” nga nṱhani ha “vhuthu vhuhulu” hawe.—Vhaefesa 2:8, 9.
Naa zwi nga itea uri ni si tshidzwe?
Ee. Samusi muthu we a tshidzwa a tshi khou ṋupela a tshi nga dovha a wela kana a fhufhela maḓini, na muthu we a tshidzwa kha tshivhi zwi nga itea uri a si tshidzwe arali a si tsha sumbedza lutendo. Nga nṱhani ha zwenezwo, Bivhili i ṱuṱuwedza Vhakriste uri vha ‘lwele lutendo.’ (Yuda 3) I dovha ya vha tsivhudza uri: “Itani vhuḓidini hoṱhe nga nyofho na nga u tetemela uri ni tshidzwe.”—Vhafilipi 2:12.
Mutshidzi ndi nnyi—Ndi Mudzimu kana Yesu?
Bivhili i amba uri Mudzimu ndi ene mutshidzi. (1 Samuele 10:19; Yesaya 43:11; Tito 2:10; Yuda 25) Zwiṅwe hafhu, Mudzimu o shumisa vhathu vho fhamba-fhambanaho u itela u tshidza Vhaisiraele nahone Bivhilini vha vhidzwa “vhalamuleli.” (Nehemia 9:27; Vhahaṱuli 3:9, 15; 2 Dzikhosi 13:5) b Nga hu fanaho, samusi Mudzimu o ri tshidza kha tshivhi nga u ri rengulula nga tshiṱhavhelo tsha Yesu Kristo, Bivhilini ,Yesu u vhidzwa “Mutshidzi.”—Mishumo 5:31; Tito 1:4. c
Naa hu ḓo tshidzwa vhathu vhoṱhe?
Hai, a si vhathu vhoṱhe vhane vha ḓo tshidzwa. (2 Vhathesalonika 1:9) Musi Yesu a tshi vhudziswa uri: “Naa hu ḓo tshidzwa vhathu vha si gathi fhedzi?” o fhindula a ri: “Itani vhuḓidini vhuhulwane uri ni dzhene nga muṋango muṱuku, ngauri ndi a ni vhudza, vhanzhi vha ḓo ṱoḓa u dzhena, fhedzi a vha nga koni.”—Luka 13:23, 24.
Mazwifhi nga ha u tshidzwa ha vhathu vhoṱhe
Mazwifhi: Vhathu vha humbulela uri hu ḓo tshidzwa vhathu vhoṱhe nga nṱhani ha uri 1 Vhakorinta 15:22 i ri “roṱhe ri ḓo vuswa nga nṱhani ha Kristo.”
Ngoho: Lwonolwu luṅwalo lu ambela kha mvuwo. (1 Vhakorinta 15:12, 13, 20, 21, 35) Nga zwenezwo, mubulo “roṱhe ri ḓo vuswa nga nṱhani ha Kristo” u amba uri vhoṱhe vhane vha ḓo vuswa, vha wana yeneyi phaṱhutshedzo nga nṱhani ha Yesu Kristo.—Yohane 11:25.
Mazwifhi: Vhathu vha humbulela uri hu ḓo tshidzwa vhathu vhoṱhe nga nṱhani ha uri Tito 2:11 i ri “vhathu vha mifuda yoṱhe vha tshidzwe” nga Mudzimu.”—International Standard Version.
Ngoho: Ipfi ḽa Lugerika ḽo ṱalutshedzelwaho uri ‘roṱhe’ kha yeneyi ndimana ḽi nga dovha ḽa amba “mifuda yoṱhe.” d Zwine zwa vha zwone ndi uri, Tito 2:11 i amba uri Mudzimu u ḓo tshidza vhathu vha mifuda yoṱhe, u katela na vhathu vha “tshaka dzoṱhe na ndimi dzoṱhe.”—Nzumbululo 7:9, 10.
Mazwifhi: Vhathu vha humbulela uri hu ḓo tshidzwa vhathu vhoṱhe nga nṱhani ha uri 2 Petro 3:9 i ri Mudzimu “ha ṱoḓi muthu naho e ufhio a tshi lozwiwa.”
Ngoho: Mudzimu u ṱoḓa vhathu vhoṱhe vha tshi tshidzwa, fhedzi ha kombetshedzi muthu u ita zwine a zwi funa. Nga “ḓuvha ḽa khaṱulo” hu ḓo ‘lozwiwa vhathu vha sa ofhi Mudzimu.’—2 Petro 3:7.
a Bivhilini, muthu u pfi o “tshidzwa” naho a tshi kha ḓi ḓo tshidzwa kha tshivhi na lufu.—Vhaefesa 2:5; Vharoma 13:11.
b Kha ndimana dzo redzwaho, nṱhani ha u shumisa ipfi “mutshidzi,” dziṅwe ṱhalutshedzelo dzi shumisa maipfi “mukundi,” “muphulusi,” “muhali,” “murangaphanḓa” kana “muṅwe muthu.” Naho zwo ralo, kha maṅwalwa a kale a Bivhili a Luheberu, ipfi “mutshidzi” ḽi ambela kha vhathu ḽa dovha ḽa ambela kha Yehova Mudzimu.—Psalme ya 7:10.
c Dzina Yesu ḽi bva kha dzina ḽa Luheberu Yehoh·shuʹaʽ, ḽine ḽa amba “Yehova Ndi Mutshidzi Wanga.”
d Sedzani Vine’s Complete Expository Dictionary of Old and New Testament Words. Ipfi ḽa Lugerika ḽi wanala kha Mateo 5:11, ine ya amba zwe Yesu a zwi amba musi a tshi ri vhathu vha ḓo pomoka vhatevheli vhawe “vhuvhi hoṱhe.”—International Standard Version.
You May Also Like
MBUDZISO DZA BIVHILI DZO FHINDULWA
Tshiṱhavhelo Tsha Yesu Ndi ‘Tshirengululi Tsha Vhanzhi’ Nga Nḓila-Ḓe?
Tshiṱhavhelo tshi ri rengulula kha tshivhi nga nḓila-ḓe?
MBUDZISO DZA BIVHILI DZO FHINDULWA
Naa Bivhili I Ri ‘Wa Vhuya Wa Tshidzwa, Wo Tshidzwa Lwa Tshoṱhe’?
Yesu o nea tshifanyiso tshine tsha fhindula yeneyo mbudziso.
MBUDZISO DZA BIVHILI DZO FHINDULWA
Naa U “Tenda Yesu” Zwi Ita Uri Muthu A Tshidzwe?
Bivhili i amba nga ha vhaṅwe vhane vha sa ḓo tshidzwa naho vha tshi tenda Yesu. Zwi ḓa hani uri vha si tshidzwe?
ESSENTIAL BIBLE TEACHINGS
Ndi Ngani Yesu O Fa?
Khamusi ni a zwi ḓivha uri Yesu o fela zwivhi zwashu. Fhedzi naa lufu lwa muthu muthihi lu nga tshidza vhathu vhoṱhe?
PFUNZO DZA BIVHILI
Lingedzani Heyi Ngudo Ya Bivhili
Gudani Bivhili nga mahala ni tshi khou thuswa nga muṅwe wa Ṱhanzi dza Yehova.