Ndo alutshela ḓoroboni ya Los Angeles, vunḓuni ḽa California, kha ḽa Amerika, fhethu ho ḓalaho zwigwada zwa mavemu na zwidzidzivhadzi. Ndo vha ndi wa vhuvhili kha vhana vha rathi.

Mme ashu vho ri alusa kerekeni ya vhaevangeli. Naho zwo ralo, musi ndi tshee muswa ndo vha ndi tshi tshila vhutshilo vhu re kavhili. Ndo vha ndi kha khwaere kerekeni Swondaha iṅwe na iṅwe. Vhukati ha vhege, ndo vha ndi tshi ṱwa minzhangamoni, ndi tshi shumisa zwidzidzivhadzi na u ḓifara luvhi nga zwa vhudzekani.

Ndo vha ndi tshi ṱavhanya u dinalea nahone ndi na mbiti. Ndo vha ndi tshi shumisa tshithu tshiṅwe na tshiṅwe u itela u kunda. Zwe nda zwi guda kerekeni a zwo ngo nthusa. Ndo vha ndi tshi anzela uri, “Ndifhedzo ndi ya Murena nahone nṋe ndi tshishumiswa tshawe!” Mafheloni a vho-1960, musi ndi tshikoloni tsha murole wa nṱha, ndo ṱuṱuwedzwa nga tshigwada tsha politiki tsha Black Panthers tshe tsha vha tshi tshi ḓivhelwa u fhisea kha zwa u lwela ndugelo dza vhathu. Ndo vha muraḓo wa vhaimeleli vha ndugelo dza matshudeni. Nga zwiṅwe zwifhinga ro vha ri tshi thoma migwalabo nahone ri tshi vala tshikolo lwa tshifhinganyana.

Zwo vha zwi tshi vhonala u nga u gwalaba hanga ho vha hu sa mpfushi. Nga zwenezwo, nda thoma u ita vhutshinyi. Sa tsumbo, ḽiṅwe ḓuvha nṋe na khonani dzanga ro ṱalela filimu dza vharema vhe vha vha vha tshi shengedzwa tshifhingani tsho fhiraho kha ḽa Amerika. Ro sinyuswa nga zwenezwo, ra thoma u rwa vhaswa vha vhatshena henefho. Nga murahu ha zwenezwo, ra ya ḓoroboni ya vhatshena, ri tshi ṱoḓa vhathu vhanzhi vhane ra nga vha rwa.

Nga murahunyana ha miṅwaha nṋe, mukomana na vharathu vhanga ro ita vhutshinyi vhunzhi. Ro vha ri khakhathini kha mapholisa. Muṅwe wa vharathu vhanga o vha e muraḓo wa tshigwada tshi re na bvumo ḽivhi nahone na nṋe nda ḓibaḓekanya navho. Vhutshilo hanga ho vha vhu tshi khou ṋaṋa u vha vhuvhi.

Vhabebi vha khonani yanga vho vha vhe Ṱhanzi dza Yehova. Vho nthamba miṱanganoni yavho ya tshivhidzo nahone nda ya. U bva mathomoni, ndo vhona nḓila ye Ṱhanzi dza vha dzo fhambana ngayo na vhaṅwe. Muṅwe na muṅwe o vha o fara Bivhili nahone a tshi khou i shumisa muṱanganoni. Na vhaswa vho shela mulenzhe kha mbekanyamushumo! Ndo takadzwa nga u ḓivha uri Mudzimu u  na dzina, Yehova, na u pfa ḽi tshi shumiswa. (Psalme ya 83:18) Tshivhidzoni ho vha hu na tshaka dzo fhamba-fhambanaho, fhedzi zwo vha zwi khagala uri ho vha hu si na u khetha ṋamana nga matombo.

Mathomoni, ndo vha ndi sa ṱoḓi u guda Bivhili na Dziṱhanzi, fhedzi ndo vha ndi tshi takalela u ya miṱanganoni yavho. Ḽiṅwe ḓuvha, musi ndi miṱanganoni ya Dziṱhanzi, khonani dzanga dzo ya khontsatini. Henefho, vho rwa muswa u swika a tshi fa ngauri o hana u vha ṋea badzhi yawe ya mukumba. Nga ḓuvha ḽi tevhelaho, vho zuwa nga ha ḽeneḽo bulayo. Musi vhe tsengoni a vho ngo ḓivhona mulandu. Vhunzhi havho vho gwevhiwa vhutshilo havho hoṱhe. Ndo takala vhukuma uri ndo vha ndi si navho nga ḽeneḽo ḓuvha. Ndo vha ndo ḓiimisela u shandula vhutshilo hanga nahone nda thoma u guda Bivhili.

Ngauri ndo tshenzhela luvhengelambiluni lwa matsinde, ndo vhona zwithu zwe zwa mmangadza kha Dziṱhanzi. Sa tsumbo, musi Ṱhanzi ya mutshena i tshi dalela ḽiṅwe shango, yo sia vhana vhayo uri vha ṱhogomelwe nga muṱa wa vharema. Zwiṅwe hafhu, muṱa wa vhatshena wo dzhia muswa wa murema we a vha a tshi ṱoḓa vhudzulo. Ndo vha na khwaṱhisedzo ya uri Ṱhanzi dza Yehova dzi shumisa maipfi a Yesu o ṅwalwaho kha Yohane 13:35: “Ndi zwine vhathu vhoṱhe vha ḓo ḓivha ngazwo uri ni vhafunziwa vhanga, arali ni tshi funana.” Ndo zwi ḓivha uri ndo wana vhurereli ha ngoho.

Musi ndi tshi guda Bivhili, ndo thoma u ṱhogomela uri ndi fanela u shandula nḓila ine nda humbula ngayo. Ndo vha ndi tshi ṱoḓa u vha na mulalo vhutshiloni hanga hoṱhe. (Vharoma 12:2) Ndo ita tshanduko nga zwiṱuku nga zwiṱuku. Ndo lovhedzwa sa Ṱhanzi ya Yehova nga January 1974.

Naho ndo no lovhedzwa, ndo vha ndi tshi fanela u dzula ndi tshi langa mbiti dzanga. Sa tsumbo, ḽiṅwe ḓuvha ndi tshi khou funza miḓini, ndo pandamedza mbava yo tswaho radio goloini yanga. Musi ndi tsini na u mu fara, o laṱa radio a shavha. Musi ndi tshi ṱalutshedza vhaṅwe nḓila ye nda wana ngayo radio yanga, wahashu a re na vhuḓifhinduleli we a vha e kha tshenetsho tshigwada, o mbudzisa a ri: “Mmbudzeni hafha Stephen, no vha ni tshi ḓo vha no mu ita mini arali ni vhe no mu fara?” Yeneyo mbudziso yo ita uri ndi humbulisise nahone yo nṱuṱuwedza uri ndi dzule ndi na mulalo.

Ndo thoma u funza vhathu Bivhili lwa tshifhinga tsho ḓalaho nga October 1974, ndi tshi fhedza awara dza 100 ṅwedzi muṅwe na muṅwe. Nga murahu ndo vha na ndugelo ya u shuma ofisini khulwane ya Ṱhanzi dza Yehova ngei Brooklyn, vunḓuni ḽa New York. Nga 1978, ndo humela Los Angeles u itela u ṱhogomela mme anga vhe vha vha vha tshi khou lwala. Nga murahu ha miṅwaha mivhili, ndo vhinga Aarhonda. O vha a tshi ntikedza vhukuma musi ri tshi ṱhogomela mme anga u swika vha tshi fa. Nga u ya ha tshifhinga, nṋe na Aarhonda ro ya Tshikoloni Tsha Bivhili Tsha Watchtower Tsha Gilead nahone ro rumelwa shangoni ḽa Panama he ra bvela phanḓa na mushumo wa vhurumiwa.

U bva tshee nda lovhedzwa, ndo sedzana na milingo minzhi ye ya vha i tshi nga ita uri mbiti dzanga dzi vuwe. Ndo guda u ṱutshela vhathu vhe vha vha vha tshi lingedza u nndevhela kana nda lingedza u ita uri hu vhe na mulalo nga dziṅwe nḓila. Vhathu vhanzhi u katela na mufumakadzi wanga, vho nkhoḓa nga nḓila ye nda tandulula ngayo honoho vhuleme. Na nṋe zwo mmangadza! A thi ḓirwi khana nga tshanduko dze nda dzi ita vhutshiloni hanga. Nṱhani hazwo, kha nṋe, hezwi zwi sumbedza uri Bivhili i na maanḓa a u shandula vhutshilo.—Vhaheberu 4:12.

Bivhili yo ita uri ndi vhe na zwipikwa vhutshiloni nahone yo ngudisa uri ndi vhe na mulalo. A thi tsha rwa vhathu; nṱhani hazwo, ndi vha thusa u ḓivha Mudzimu. Ndo guda Bivhili na muthu we a vha e swina ḽanga tshikoloni tsha murole wa nṱha! Ro dzula roṱhe lwa tshifhinganyana musi o no lovhedzwa. Ri kha ḓi vha khonani dza tsini u swika zwino. Nṋe na mufumakadzi wanga ro thusa vhathu vha fhiraho 80 uri vha vhe Ṱhanzi dza Yehova nga u guda navho Bivhili.

Ndi a takala vhukuma nge Yehova a nthusa uri ndi vhe na zwipikwa vhutshiloni na u vha na vhahashu kha vhurereli ha ngoho.