Ri nga ḓivhudzisa yeneyo mbudziso nga nḓila dzi sa fani, dzi ngaho sa, Ndi ngani ri fhano? kana uri Naa vhutshilo hanga ndi ha ndeme? Bivhili i sumbedza uri ri khou tshilela u vha na vhushaka na Mudzimu. Ṱhogomelani zwine Bivhili ya amba nga ha enea mafhungo.

•   Mudzimu ndi Musiki washu. Bivhili i ri: “Ndi ene o ri vhumbaho, ri vhathu vhawe.”​—Phisalema 100:3; Nzumbululo 4:11.

•   Mudzimu o sika zwithu zwoṱhe e na tshiitisi.​—Yesaya 45:18.

•   Mudzimu o ri sika ri na lutamo lwa u ṱoḓa u ḓivha nga hae, zwenezwi zwi katela u ṱoḓa u ḓivha uri ri khou tshilela mini. (Mateo 5:3) U ṱoḓa ri tshi fusha lwonolwo lutamo.​—Phisalema 145:16.

•   Ri nga kona u ḓivha Mudzimu nga u vha khonani yawe. Vhathu vhanzhi vha vhona u nga a zwi konadzei u vha khonani ya Mudzimu. Fhedzi Bivhili i ri vhudza uri: “Sendelani tsini na Mudzimu, na ene u ḓo sendela tsini na inwi.”​—Yakobo 4:8; 2:23.

•   U itela uri ri kone u vha khonani ya Mudzimu, ri tea u tshila nga nḓila ine a ṱoḓa ri tshi tshila ngayo. Bivhili i a ri vhudza zwine Mudzimu a zwi ṱoḓa kha riṋe kha Muhuweleli 12:13, i ri: “Ofha Mudzimu wa ngoho, u dzule u tshi tevhedza ndaela dzawe, ngauri ndi zwone zwine muthu a tea u zwi ita.”

•   Tshifhingani tshi ḓaho, ri ḓo kona u tshila nga nḓila ye Mudzimu a vha a tshi ṱoḓa u bva na mathomoni musi a tshi fhelisa tshengelo na u ṋea vhutshilo vhu sa fheli khonani dzawe dzine dza mu gwadamela.​—Phisalema 37:10, 11.