MIṄWAHANI i si gathi yo fhiraho, Cesar na mufumakadzi wawe Rocio, vho vha vha tshi tshila vhutshilo ha vhu phuvhe-phuvhe ngei California, he Cesar a vha a tshi shuma lwa tshifhinga tsho ḓalaho kha khamphani ya u ita zwishumiswa zwa u dzhenisa muya u fhisaho na u rotholaho nahone Rocio a tshi shuma mushumo wa tshifhinganyana ofisini ya dokotela. Vho vha vhe na muḓi nahone vhe si na vhana. Naho zwo ralo, hu na zwe zwa itea zwe zwa shandula vhutshilo havho. Ndi mini zwenezwo?

Nga October 2009, ofisi ya davhi ya ngei United States yo rumela vhurifhi zwivhidzo zwoṱhe zwa ḽeneḽo shango, vhu tshi ramba vhashumi vha u ḓifunela vhane vha vha na vhutsila uri vha ite khumbelo ya u shuma Bethele uri vha kone u shuma lwa tshifhinganyana u itela u engedza tshifhaṱo tsha davhi ḽa Wallkill, ngei New York. Na vhane vha vha na miṅwaha i fhiraho ine ya ṱoḓea u itela u shuma Bethele vho rambiwa. Cesar na Rocio vho ri: “Nga nṱhani ha uri ro vha ro no vha vhahulwane, ro vha ri tshi ḓivha uri tshenetshi tsho vha tshi tshibuli tshithihi tshe ra vha ri natsho tsha u shuma Bethele. Ro vha ri sa ḓo tendela tshithu na tshithihi tshi tshi ita uri tshenetsho tshibuli tshi ri pfuke!” Nga u ṱavhanya vhenevho vhavhingani vho rumela khumbelo yavho.

Ho fhira ṅwaha Cesar na Rocio vha sa athu u vhidzwa Bethele. Naho zwo ralo, vho ita zwo engedzeaho u itela u swikelela tshipikwa tshavho nga u leludza vhutshilo havho. Cesar o ri: “Ro ita giratshi yashu ya vha rumu u itela uri ri hirise nnḓu yashu. Nahone ra pfulutshela kha nnḓu ṱhukhu ye ra vha ri tshi i ṱoḓa ye ra i fhaṱa miṅwahani i si gathi yo fhiraho. U ita dzenedzi tshanduko, zwo ita uri ri kone u yo shuma Bethele arali ra vhidzwa.” Ho itea mini nga murahu? Rocio o ri: “Musi ho no fhela ṅwedzi ro pfulutshela kha nnḓu yashu ṱhukhu, ra rambiwa uri ri shume lwa tshifhinganyana nga u ḓifunela ngei Wallkill. Zwo vha zwi tshi tou vha khagala uri u leludza vhutshilo hashu zwo ita uri Yehova a kone u ri fhaṱutshedza.”

U fana na Cesar na Rocio, vhunzhi ha vhahashu vha tshinnani na vhatshisadzini vho ḓiṋekedzela kha  mushumo wa u fhaṱa une wa khou itwa ngei New York State. Vhunzhi ha vhenevho vha khou tikedza mushumo wa u fhaṱa ngei Wallkill, ngeno vhaṅwe vho wana ndugelo ya u thusa u fhaṱa ofisini khulwane dza shango ḽoṱhe ngei Warwick. * Vhunzhi ha vhavhingani vho ṱutshela mahaya avho avhuḓi, mishumo yavhuḓi, u katela na zwifuwo zwavho u itela u shumela Yehova nga vhuḓalo. Naa Yehova o fhaṱutshedza wonoyo muya wa u ḓiṋekedza? Vhukuma o ita nga u ralo!

Sa tsumbo, Way ane a vha ramuḓagasi na Debra, vhane vhoṱhe vha vha miṅwahani ya vhu-50, vho rengisa nnḓu yavho na vhunzhi ha zwithu zwine vha vha nazwo ngei Kansas nahone vha pfulutshela ngei Wallkill u itela u shuma sa vhathusi vha tshifhinganyana Bethele. * Naho u ita nga u ralo zwi tshi ṱoḓa uri vha ite tshanduko vhutshiloni havho, vha ḓipfa u nga u ḓidzima havho ho vha hu si ha fhedzi. Malugana na mushumo wawe wa Bethele, Debra o ri: “Nga zwiṅwe zwifhinga ndo pfa u nga ndi tshipiḓa tsha vhane vha khou fhaṱa dzinnḓu Paradisoni ine ya vha kha khandiso dzashu!”

Melvin na Sharon vho rengisa nnḓu yavho na zwine vha vha nazwo ngei South Carolina u itela u thusa ngei Warwick. Naho u ita nga u ralo zwo vha zwi songo leluwa, vhavhingani vho ḓipfa vhe na ndugelo yavhuḓi vhukuma ya u vha tshipiḓa tsha mushumo wa ḓivhazwakale. Vho ri: “Dakalo ḽine ḽa ḓiswa nga u ḓivha uri ni khou khunyeledza zwithu zwine zwa ḓo vhuyedza ndangulo ya shango ḽoṱhe ndi ḽihulwane vhukuma.”

Kenneth we a vha e mufhaṱi na Maureen vhane vha vha miṅwahani ya vhu-50, vho pfuluwa California u itela u shuma Warwick. U itela uri vha kone u pfuluwa, vho ita nzudzanyo na wahashu wa tshisadzini tshivhidzoni uri a ṱhogomele muḓi wavho nahone vha humbela miraḓo ya muṱa wavho uri u ṱhogomele khotsi a Kenneth vhane vha vha mulala. Naa vha a ḓisola nga u ḓidzima zwiṅwe zwithu u itela u shuma Bethele? Hai! Kenneth o ri: “Ro vhuyelwa vhukuma. Naa ho vha na khaedu? Dzo vha hone, fhedzi ri tshila vhutshilo vhu vhuyedzaho vhukuma nahone ri themendela zwi tshi bva mbiluni uri vhaṅwe vha ite wonoyu mushumo.”

Vhanzhi vhe vha ita uri vha wanalee vho vha vha tshi fanela u kunda zwithithisi zwinzhi. Sa tsumbo, William na Sandra, vhane vha vha miṅwahani ya vhu-60, vho vha vho no ḓowela nahone vha tshi vho ḓiphina nga vhutshilo ngei Pennsylvania. Vho vha vhe na khamphani ye ya vha i tshi ita zwipiḓa zwa mitshini, ye ya vha i na vhashumi vha 17. Vho vha vha tshi ṱanganela kha tshivhidzo tshe vha vha vhe khatsho u bva vhuṱukuni, nahone vhunzhi ha mashaka avho vha dzula henefho. Nga zwenezwo, musi vha tshi wana tshibuli tsha u shuma sa vhashumi vha tshifhinganyana ngei Wallkill, vho zwi ḓivha uri ndi u ṱutshela muṅwe na muṅwe na tshiṅwe na tshiṅwe tshe vha tshi ḓowela. William o ri: “A zwi timatimisi uri khaedu nthihi khulwane  kha riṋe yo vha u ṱutshela haya hashu havhuḓi.” Naho zwo ralo, musi vho no rabela vhukuma, vhavhingani vho dzhia phetho ya u bvela phanḓa na u pfuluwa—vhukando vhune vha si ḓisole ngaho. William o dovha a ri: “Dakalo ḽa u ṱanganela nga ho livhaho na u shuma na muṱa wa Bethele ḽi nga si vhambedzwe na tshithu. Nṋe na Sandra ro takala vhukuma u fhira naho hu lini!”

Ricky ane a vha mulanguli wa zwa u fhaṱa ngei Hawaii, o humbelwa uri a shume sa mushumi wa tshifhinganyana wa Bethele u itela u thusa kha u fhaṱa ngei Warwick. Mufumakadzi wawe Kendra o vha a tshi ṱoḓa uri a ṱanganedze yeneyo khumbelo. Naho zwo ralo, vho vha vha tshi vhilaela nga ha mutakalo wa murwa wavho Jacob ane a vha na miṅwaha ya 11. Vho vha vha tshi ḓivhudzisa arali zwi tshi ḓo vha vhuṱali u pfulutshela New York State nahone arali murwa wavho a tshi nga kona u ḓowelana na vhupo ho fhambanaho tshoṱhe na he a vhu ḓowela.

Ricky o ri: “Tshee tsha vha tshi tsha ndeme kha riṋe ndi u wana tshivhidzo tshine tsha vha na vhaswa vhane vha khou ita mvelaphanḓa yavhuḓi ya lwa muya. Ro vha ri tshi ṱoḓa Jacob a tshi vha na khonani nnzhi dzavhuḓi.” Mafheleloni tshivhidzo tshe vha fhedzisela vhe khatsho tsho vha tshi na vhana vha si gathi ngeno tshi na miraḓo yo vhalaho ya Bethele. Ricky o dovha a ri: “Nga murahu ha muṱangano washu wa u thoma henefho, ndo vhudzisa Jacob uri u ḓipfa hani nga ha tshivhidzo tshiswa, zwihuluhulu samusi hu si na thangana dzawe dza murole. O mmbudza uri: ‘Vha songo vhilaela Baba. Khonani dzanga dzi ḓo vha vhahashu vha Bethele vhane vha kha ḓi vha vhaswa.’”

Vhukuma, vhaswa vhane vha vha Bethele vho vha khonani dza Jacob. Ho vha na mvelelo dzifhio? Ricky o ri: “Nga vhuṅwe vhusiku, ndo ri ndi tshi khou fhira kamarani ya murwa wanga, nda wana luvhone lu tshe lwo fungiwa. Ndo vha ndo lavhelela u mu wana a tshi khou tamba mitambo ya elekitironiki, fhedzi o vha a tshi khou vhala Bivhili! Musi ndi tshi vhudzisa Jacob uri u khou ita mini, o ri: ‘Ndi khou ḓiita muraḓo muswa wa Bethele, nahone ndi khou ṱoḓa u vhala Bivhili yoṱhe nga ṅwaha muthihi.’” Zwi tou vha khagala uri Ricky na Kendra vho vha vho takala vhukuma, hu si nga nṱhani ha uri Ricky o vha a tshi ṱanganela kha mushumo wa u fhaṱa ngei Warwick, fhedzi nga nṱhani ha uri vhukando he vha vhu dzhia ho shela mulenzhe kha uri murwa wavho a aluwe nga lwa muya.—Mir. 22:6.

Mushumo wa u fhaṱa ngei Wallkill na Warwick u ḓo fhela hu si kale, nga zwenezwo, vhe vha rambiwa uri vha ye u thusa kha mushumo wa Bethele vha a zwi ḓivha uri ndi zwa tshifhinganyana. Naa vhenevha vhahashu vha tshinnani na vhatshisadzini vha a vhilaela nga ha uri vha ḓo ya ngafhi kana vha ḓo ita mini? Na khathihi! Vhanzhi vha ḓipfa nga nḓila i fanaho na ya vhaṅwe vhavhingani vhavhili vho no aluwaho vha ngei Florida. John, ane a vha mulanguli wa zwa u  fhaṱa na mufumakadzi wawe Carmen vhane vha shuma lwa tshifhinganyana nga u ḓifunela ngei Warwick, vho ri: “Ro vhona nḓila ye Yehova a ṱhogomela ngayo ṱhoḓea dzashu nga ho livhaho u swika zwino. Vhukuma, ro ṱhogomela uri Yehova ho ngo ri ḓisa fhano u itela u ri laṱa nga murahu.” (Ps. 119:116) Luis, we a vha a tshi shuma u ita zwishumiswa zwa u dzima mulilo na mufumakadzi wawe Quenia, vha shuma Wallkill. Vha ri: “Ro vhona mafunda a Yehova musi a tshi ṱhogomela ṱhoḓea dzashu dza lwa ṋama. Naho ri sa ḓivhi uri u ḓo zwi itisa hani, lini kana ngafhi, ri na vhungoho ha uri u ḓo bvela phanḓa a tshi ri ṱhogomela.”—Ps. 34:10; 37:25.

Vhunzhi ha vhe vha thusa kha mushumo wa u fhaṱa ngei New York vho vha vha tshi ḓo vha vhe na zwiitisi zwa u sa ya u thusa nga u ḓifunela. Naho zwo ralo, vho linga Yehova—samusi o ri ramba roṱhe uri: “Ni dzou ndinga, . . . ngangoho ndi hone ndi tshi ḓo ni vulela mabuli a makoleni, nda ni tevhulela phaṱhutshedzo dza tou ni hulela.”—Mal. 3:10.

Naa ni nga linga Yehova nahone na tshenzhela phaṱhutshedzo dzawe nnzhi? Humbelani nga thabelo zwine na nga zwi ita u itela u shela mulenzhe kha mishumo i takadzaho, hu sa londwi uri ndi New York kana miṅwe mishumo ya u fhaṱa ya lwa ṱaḓulu, nahone ni vhone nḓila ine Yehova a ḓo ni fhaṱutshedza ngayo.—Marko 10:29, 30.

Dale ane a vha muinzhiniere wapo na Cathy, vhane vha bva Alabama, vha dzhiela nṱha vhukuma wonoyo mushumo. Samusi vha tshi shuma lwa tshifhinganyana ngei Wallkill, vho ri: “Arali ni na tshivhindi tsha u litsha vhutshilo he na vhu ḓowela, ni ḓo kona u vha na tshibuli tsha u vhona muya wa Yehova u tshi shuma.” Nahone ndi mini zwine na fanela u zwi ita uri ni kone u thusa? Dale o ri: “Leludzani vhutshilo haṋu nga hune zwa konadzea ngaho. Ni nga si ḓisole na luthihi!” Gary wa ngei North Carolina, u na miṅwaha ya 30 a tshi khou shuma sa mulanguli wa u fhaṱa. Ene na mufumakadzi wawe Maureen, vho ri iṅwe ya phaṱhutshedzo dzine vha ḓiphina ngadzo ngei Warwick ndi “u ṱangana na u shuma na vhahashu vha tshinnani na vha tshisadzini vhe vha fhedza vhutshilo havho vha tshi khou shumela Yehova Bethele.” Gary o ri: “U itela u shuma Bethele ni fanela u leludza vhutshilo haṋu, zwine zwa vha nḓila yavhuḓi ya u tshila kha ano maitele a zwithu.” Jason, ane a shuma kha konṱiraka ya muḓagasi, na Jennifer, vhane vha bva Illinois, vha amba uri u shuma Bethele ya Wallkill ndi “zwithu zwine na nga zwi tshenzhela u itela u tshila shangoni ḽiswa.” Jennifer o dovha a ri: “Ndi zwavhuḓi vhukuma u ḓivha uri zwoṱhe zwine na zwi ita Yehova u zwi dzhiela nṱha na uri mushumo une na khou u ita u ḓo dzula u wa ndeme phanḓa hawe. Yehova u ita vhungoho ha u ri fhaṱutshedza u fhira nḓila ine ra humbula ngayo.”