VHAKRISTE vha ḓanani ḽa u thoma ḽa miṅwaha vho ita vhuḓidini vhuhulwane ha u gudisa vhathu vhanzhi ‘mafhungo maḓifha a Muvhuso’ nga hune zwa nga konadzea ngaho. (Mat. 24:14) Vhaṅwe vho ya na kha maṅwe mashango. Sa tsumbo, muapostola Paulo o ya kha ḽiṅwe shango hune zwino ha vha Turkey nahone o huwelela henefho musi a tshi kha ḓi vha murumiwa. * Nga murahu ha miṅwaha ya 2 000, shango ḽa ngei Turkey ḽo dovha ḽa livhisa ṱhogomelo kha fulo ḽo khetheaho ḽa u huwelela nga 2014. Ndi ngani ho dzudzanywa wonoyo mushumo? Ndi vhafhio vhe vha shela mulenzhe kha wonoyo mushumo?

Hu na vhahuweleli vha fhiraho 2 800 ngei Turkey, fhedzi hu na vhadzulapo vha milioni dza 79. Zwenezwi zwi amba uri muhuweleli muthihi u fanela u huwelela kha vhathu vha ṱoḓaho u vha 28 000. Samusi ni tshi nga zwi humbula, vhahuweleli vho kona u huwelela kha tshivhalo tshiṱuku tsha vhadzulapo vha ḽeneḽo shango. Tshipikwa tsha u ita fulo ḽa u huwelela tsho vha tshi tsha u swikelela vhathu vhanzhi nga hune zwa nga konadzea ngaho nga tshifhinga tshiṱuku. Vhahashu vha 550 vhane vha bva kha maṅwe mashango vhane vha amba Luturkey vho ya ngei Turkey nahone vha huwelela na vhahuweleli vha henefho nga tshifhinga tsha ḽeneḽo fulo. Ho vha na mvelelo dzifhio?

Vhuṱanzi ho phaḓalala. Tshiṅwe tshivhidzo tsha ngei Istanbul tsho ṅwala uri: “Musi vhathu vha tshi ri vhona, vho vhudzisa uri: ‘Naa hu na buthano ḽo khetheaho fhano? Ri khou vhona Ṱhanzi dza Yehova hoṱhe-hoṱhe!’” Tshivhidzo tsha ḓoroboni ya ngei Izmir tsho ṅwala uri: “Muṅwe munna we a vha a tshi khou tshimbila hune ha namelwa hone dzithekhisi, o ya kha muhulwane wa henefho nahone a mu vhudzisa uri, ‘Hu khou itea mini? Naa no engedza mushumo wa vhoiwe?’” Vhukuma, vhathu vho ṱhogomela ḽeneḽo fulo.

Vhahuweleli vhane vha bva kha maṅwe mashango vho takalela wonoyo mushumo wa u huwelela. Steffen wa ngei Denmark, o ri: “Ḓuvha ḽiṅwe na ḽiṅwe, ndo vha ndi tshi kona u huwelela kha vhathu vhe vha vha vha sa athu u vhuya vha pfa nga ha Yehova. Ndo pfa u nga ndo vha ndi tshi khou ḓivhadza dzina Yehova.” Jean-David wa ngei Fura o ri: “Ro fhedza awara nnzhi ri tshi khou huwelela kha tshiṱaraṱa tshithihi. Zwo vha zwi zwavhuḓi vhukuma! Vhathu vhanzhi vho vha vha sa ḓivhi Ṱhanzi dza Yehova. Muḓini muṅwe na muṅwe, ro kona u thoma nyambedzano, u sumbedza dzividio na u ṋea vhoṋemuḓi khandiso.”

 Vhahashu vha 550 vho tshimbidza khandiso dzi ṱoḓaho u vha 60 000 nga vhege mbili fhedzi! Vhukuma, ḽeneḽo fulo ḽo ita uri vhuṱanzi vhu phaḓalale.

Vhathu vho fhisetshela vhuḓinḓa nga ho engedzeaho. Wonoyo mushumo wo khetheaho wo ṱuṱuwedza vhahashu vha henefho. Vhanzhi vho thoma u humbula nga ha tshumelo ya tshifhinga tsho ḓalaho. Zwi re zwone ndi uri tshivhalo tsha vhavulanḓila vha tshifhinga tsho ḓalaho vha ngei Turkey tsho engedzea nga phesenthe dza 24 nga miṅwedzi ya 12 nga murahu ha ḽeneḽo fulo.

Vhathu vhane vha bva kha maṅwe mashango vho sumbedza nḓila ye ḽeneḽo fulo ḽa kwama ngayo vhuḓinḓa havho na musi vho no humela mashangoni a havho. Wahashu wa tshisadzini ane a pfi Şirin a bvaho ngei Dzheremane, o ṅwala uri: “Vhahashu vha ngei Turkey vho ṱanziela lu songo dzudzanywaho vho vhofholowa. Ndi a shona vhukuma musi ndi tshi fanela u huwelela lu songo dzudzanywaho. Fhedzi ndi livhuha fulo ḽo khetheaho ngauri tsumbo ya vhahashu vha henefho na u rabela lunzhi zwo ita uri ndi kone u ita zwe nda vha ndi sa koni u zwi ita u thomani. Ndo huwelela na u tshimbidza zwibammbiri fhethu ha vhomuthumunzhi! Zwino a thi tsha shona u fana na mathomoni.”

Johannes wa ngei Dzheremane, o ri: “Ndo guda dziṅwe ngudo dzine nda nga dzi shumisa vhuḓinḓani hanga. Vhahashu vha ngei Turkey vha huwelela kha vhathu vhanzhi nga hune zwa nga konadzea ngaho. Vha shumisa tshibuli tshiṅwe na tshiṅwe tsha u ṱanziela. Ndo dzhia phetho ya u ita zwi fanaho musi ndi tshi humela Dzheremane. Nahone zwino ndi huwelela kha vhathu vhanzhi u fhira tshifhingani tsho fhiraho.”

Zeynep wa ngei Fura o ri: “Ḽeneḽo fulo ḽo kwama vhuḓinḓa hanga. Ḽo nthusa uri ndi vhe na tshivhindi na u fulufhela Yehova nga ho engedzeaho.”

Vhahuweleli vho vha na vhushaka ha tsini-tsini. Lufuno na vhuthihi ha vhahashu vha bvaho kha mashango o fhamba-fhambanaho, ho vha vhu swayeaho vhukuma. Jean-David we a bulwa mathomoni o ri: “Ro vhona muya wa u ṱanganedza vhaeni kha vhahashu.” O dovha a ri: “Vho ri ṱanganedza sa khonani dzavho na tshipiḓa tsha muṱa wavho. Vho ri ṱanganedza miṱani yavho. Ndo vha ndi tshi zwi ḓivha uri ri na vhushaka ha vhurathu na vhukomana ha shango ḽoṱhe; ndo vha ndo no zwi vhala lunzhi kha khandiso dzashu. Fhedzi zwino ndo zwi vhona nga maṱo. Ndi ḓirwa khana nga ho engedzeaho nga u vha muṅwe wa vhathu vha Yehova  nahone ndi a mu livhuha vhukuma nga yeneyi ndugelo yavhuḓi.”

Claire wa ngei Fura o ri: “Hu sa londwi uri ri bva Denmark, Fura, Dzheremane kana Turkey, roṱhe ri muṱa muthihi. Zwo vha zwi tshi tou nga Mudzimu o ita uri zwi si vhonale uri a ri bvi shangoni ḽithihi.”

Stéphanie wa ngei Fura o dovha a ri: “Fulo ḽo khetheaho ḽo ri gudisa uri mvelele kana nyambo a si zwone zwine zwa ita uri ri vhe na vhuthihi, fhedzi ri na vhuthihi nga nṱhani ha uri ri funa Yehova.”

Vhunzhi ha vhathu vha bvaho kha maṅwe mashango, vho thoma u humbula nga ha u pfulutshela ngei Turkey u itela u thusa kha mushumo muhulwane une wa fanela u bvela phanḓa na u itwa. Ho no pfulutshela vhathu vha si gathi. Ri a livhuha vhukuma vhuḓidini ha vhenevha vhathu.

Sa tsumbo, hu na tshigwada tsha vhahuweleli vha 25 vhane vha dzula fhethu hu re thungo. Ho vha hu na muhulwane muthihi wa tshivhidzo lwa miṅwaha minzhi. Edzani u vhona nga maṱo a muhumbulo dakalo ḽe vhenevho vhahuweleli vha vha vhe naḽo nga 2015, musi vhahuweleli vha rathi vha ngei Dzheremane na Netherlands vha tshi pfulutshela kha ḽeneḽo shango u itela u vha tikedza!

Vhahuweleli vho no fhedzaho tshifhinganyana vho pfulutshela ngei Turkey, vha ri mini nga ha u dzula henefho? Ndi ngoho uri nga zwiṅwe zwifhinga zwi a konḓa, fhedzi u shuma hune ha vha na ṱhoḓea zwi a vhuyedza vhukuma. Ṱhogomelani zwe vhaṅwe vha zwi amba:

Wahashu o vhingaho ane a pfi Federico a re miṅwahani ya vhu-40 o pfulutshelaho ngei Spain, o ri: “U sa vha na thundu nnzhi dzi vhonalaho zwo nthusa uri ndi vhofholowe nahone zwo ita uri ndi livhise ṱhogomelo kha zwithu zwa ndeme vhukuma.” Naa a nga khuthadza vhaṅwe uri vha ite zwi fanaho? O ri: “Ee, ndi nga zwi ita! Musi ni tshi pfulutshela kha ḽiṅwe shango ni na tshipikwa tsha u thusa vhathu uri vha ḓivhe nga ha Yehova, ni vha ni tshi khou ita uri Yehova a ni shumise. Ni vhona nḓila ine Yehova a ni funa ngayo u fhira naho hu lini.”

Wahashu o vhingaho ane a pfi Rudy a re miṅwahani ya vhu-50 a bvaho ngei Netherlands, o ri: “Zwi a ri fusha  vhukuma u shuma fhethu hu re na ṱhoḓea na u huwelela kha vhathu vhanzhi vha sa athu u vhuya vha pfa ngoho. U vhona vhathu vho takala musi vha tshi ṱanganedza ngoho zwi ita uri ri takale vhukuma.”

Wahashu o vhingaho ane a pfi Sascha a re miṅwahani ya vhu-40 we a pfuluwa a tshi bva Dzheremane, o ri: “Tshifhinga tshoṱhe musi ndi vhuḓinḓani, ndi ṱangana na vhathu vhane vha vha hu lwa u tou thoma vha tshi pfa ngoho. U ṋea vhenevho vhathu tshibuli tsha uri vha ḓivhe Yehova, zwi ita uri ndi fushee vhukuma.”

Wahashu wa tshisadzini a re mbinganoni ane a pfi Atsuko a re miṅwahani ya vhu-30 wa ngei Dzhapani, o ri: “Tshifhingani tsho fhiraho, ndo vha ndi tshi ṱoḓa uri Haramagedo i ṱavhanye u swika. Fhedzi musi ndo no pfulutshela ngei Turkey, ndi livhuha Yehova uri ha athu u fhela mbilu. Musi ndi tshi vhona nḓila ine Yehova a livhisa ngayo zwithu, zwi ita uri ndi ṱoḓe u sendela tsini-tsini nae.”

Wahashu wa tshisadzini ane a pfi Alisa a re miṅwahani ya vhu-30 wa ngei Russia, o ri: “U shumela Yehova nga yeneyi nḓila zwo ita uri ndi thetshele zwithu zwawe zwoṱhe zwavhuḓi.” (Ps. 34:8) O dovha a ri: “Yehova a si Khotsi anga fhedzi, u dovha a vha Khonani yanga ya tsini nahone ndi mu ḓivha khwine kha vhuimo ho fhamba-fhambanaho. Zwino ndi na tshenzhelo nnzhi dzi takadzaho na phaṱhutshedzo nnzhi!”

Fulo ḽo khetheaho ḽa ngei Turkey ḽo ita uri vhathu vhanzhi vha wane mafhungo maḓifha. Naho zwo ralo, hu kha ḓi vha na masimu manzhi a sa athu u kwamiwaho. Ḓuvha ḽiṅwe na ḽiṅwe, vhahashu vhe vha pfulutshela ngei Turkey vha ṱangana na vhathu vha sa athu u pfaho nga ha Yehova. Naa ni nga takalela u shuma fhethu ho raloho? Arali zwo ralo, ri a ni ṱuṱuwedza: “Lavhelesani masimu, o tshena o lugela u kaṋiwa.” (Yoh. 4:35) Naa hu na hune na nga thusa hone hune ha vha na masimu ‘o tshenaho o lugelaho u kaṋiwa’? Arali zwo ralo, thomani nga u dzhia vhukando zwino u itela u swikelela tshenetsho tshipikwa. Ri fanela u vha na vhungoho ha uri: U shela mulenzhe nga ho engedzeaho kha u phaḓaladza mafhungo maḓifha “tshipiḓani tsha kule vhukuma tsha ḽifhasi,” zwi ḓo ita uri ni wane phaṱhutshedzo nnzhi dzi sa vhambedzwi na tshithu!—Mish. 1:8.