TSHIPIḒA 4
Nḓila Ya U Shumisa Tshelede
“Maano a konadzea nga u [eletshedzana].”—Mirero 20:18
Roṱhe ri a ṱoḓa tshelede u itela u ṋea miṱa yashu zwine ya zwi shaya. (Mirero 30:8) Hafhu “tshelede i a tsireledza.” (Muhuweleli 7:12, NW) Sa vhavhingani, zwi nga konḓa u amba nga tshelede, fhedzi ni songo tendela tshelede i tshi ita uri hu vhe na thaidzo mbinganoni ya vhoiwe. (Vhaefesa 4:32) Vhavhingani vha fanela u fulufhelana na u farisana musi vha tshi phetha nḓila ine vha ḓo shumisa ngayo tshelede.
1 DZUDZANYANI ZWITHU NGA VHUṰALI
ZWINE BIVHILI YA ZWI AMBA: “Ndi nnyi kha inwi ane a tshi ṱoḓa u fhaṱa mutsheṱo a si thome a dzula fhasi a vhalela tshinyalelo u itela u vhona arali e na tshelede yo eḓanaho u vuledza mushumo?” (Luka 14:28) Ndi zwa ndeme uri ni dzudzanye noṱhe nḓila ine na ḓo shumisa ngayo tshelede ya vhoiwe. (Amosi 3:3) Itani phetho ya zwine na ṱoḓa u zwi renga na tshelede ine na ḓo i shumisa. (Mirero 31:16) U vha na tshelede ya u renga tshiṅwe tshithu a zwi ambi uri ni fanela u tshi renga. Lingedzani u iledza zwikolodo. Shumisani tshelede ine na vha nayo fhedzi.—Mirero 21:5; 22:7.
ZWINE NA NGA ZWI ITA:
-
Arali hu na tshelede yo salaho mafheloni a ṅwedzi, phethani nḓila ine na ḓo i shumisa ngayo
-
Arali no shumisa tshelede i fhiraho ine na vha nayo, dzudzanyani u fhungudza tshinyalelo dza vhoiwe. Sa tsumbo, ni nga tou ḓibikela zwiḽiwa nṱhani ha u ḽa dziresiturenteni
2 NI SONGO VHA NA TSHIDZUMBE, NI VHE NA MAVHONELE O TEAHO
ZWINE BIVHILI YA ZWI AMBA: ‘Ṱhogomelani zwithu zwoṱhe nga u fulufhedzea, hu si musi ni tshi vhonwa nga Yehova fhedzi, fhedzi na musi ni tshi vhonwa nga vhathu.’ (2 Vhakorinta 8:21) Vhudzani mufarisi waṋu ngoho malugana na tshelede ine na i hola na nḓila ine na i shumisa ngayo.
Ambani na mufarisi waṋu tshifhinga tshoṱhe musi ni tshi dzhia phetho khulwane malugana na tshelede. (Mirero 13:10) U ambedzana nga ha mafhungo a tshelede zwi ḓo thusa uri mbinganoni yaṋu hu dzule hu na mulalo. Dzhiani tshelede ine na i hola i si yaṋu ni noṱhe, fhedzi i ya muṱa.—1 Timotheo 5:8.
ZWINE NA NGA ZWI ITA:
-
Tendelanani nga ha tshelede ine muṅwe na muṅwe a nga i shumisa a songo thoma a amba na muṅwe
-
Ni songo lindela hu tshi thoma ha vha na thaidzo uri ni kone u amba nga ha tshelede
