Naho ni tshi nga lingedza u ita zwoṱhe zwine na nga kona uri mbinganoni yaṋu na muṱani waṋu hu dzule ḽi ḽa maladze, zwikhukhulisi zwi songo lavhelelwaho zwi a bvelela zwa ita uri dakalo ḽi ṱuwe muṱani. (Muhuweleli 9:11) Nga lufuno Mudzimu u ri ṋea thuso musi ri tshi ṱangana na thaidzo. Arali na tevhedza maitele a bvaho Maṅwaloni, inwi na muṱa waṋu ni ḓo kona u sedzana na vhuimo vhu konḓaho vhukuma.

ZWINE BIVHILI YA ZWI AMBA: ‘Mu hweseni mbilaelo dzaṋu dzoṱhe, ngauri u a ni ṱhogomela.’ (1 Petro 5:7) Ni dzule ni tshi zwi humbula uri Mudzimu a si ene o teaho u vhonwa mulandu kha milingo yaṋu. (Yakobo 1:13) Musi ni tshi sendela tsini nae, u ḓo ni thusa nga nḓila ya khwine u fhirisa dzoṱhe. (Yesaya 41:10) “Tevhulani dzimbilu dzaṋu phanḓa hawe.”—Psalme ya 62:8.

U guda Bivhili ḓuvha ḽiṅwe na ḽiṅwe zwi ḓo ni kwengeledza. Nga nṱhani ha zwenezwo, ni ḓo kona u vhona nḓila ine Yehova a ri “khuthadza [ngayo] kha vhuṱungu hashu hoṱhe.” (2 Vhakorinta 1:3, 4; Vharoma 15:4) U fulufhedzisa u ni ṋea “mulalo wa Mudzimu une wa fhira u ṱalukanya hoṱhe.”—Vhafilipi 4:6, 7, 13.

ZWINE NA NGA ZWI ITA:

• Rabelelani uri Yehova a ni thuse uri ni kone u rudza mbilu na u vha na muhumbulo wo tshaho

• Sengulusani khetho dzoṱhe dzine na vha nadzo, ni kone u nanga ya khwinesa khadzo

ZWINE BIVHILI YA ZWI AMBA: “Mbilu ya wa ṱhalukanyo i yo’ ṱunḓa nḓivho; nḓevhe ya muṱali i yo’ ṱoḓa nḓivho.” (Mirero 18:15) Wanani mbuno dzoṱhe. Wanulusani ṱhoḓea dza muṅwe na muṅwe muṱani waṋu. Haseledzani navho. Vha thetsheleseni.—Mirero 20:5.

Ni ḓo ita mini arali muthu ane na mu funa a fa? Ni songo ofha u sumbedza maḓipfele aṋu. Humbulani uri na Yesu ‘o lila.’ (Yohane 11:35; Muhuweleli 3:4) U awela na u eḓela nga nḓila yo linganelaho na zwone ndi zwa ndeme. (Muhuweleli 4:6) Zwenezwi zwi ḓo ni leludzela u sedzana na vhuimo vhu tsikeledzaho.

ZWINE NA NGA ZWI ITA:

• Ḓiḓowedzeni u davhidzana na vha muṱa waṋu musi ni sa athu welwa nga makhaulambilu. Musi hu tshi vha na thaidzo, vha ḓo ḓipfa vho vhofholowa u amba na inwi

• Ambani na vhathu vhe vha vhuya vha sedzana na vhuimo ho raloho

ZWINE BIVHILI YA ZWI AMBA: “Khonani ndi ṱhama ya maḓuvha oṱhe; ndi mukomana we a mbebelwa ḓuvha ḽa khombo.” (Mirero 17:17) Khonani dzaṋu dzi a ṱoḓa u ni thusa, fhedzi dzi nga vha dzi sa ḓivhi uri dzi ni thuse hani. Ni songo teledza u vha vhudza zwine na zwi ṱoḓa. (Mirero 12:25) Zwiṅwe hafhu, humbelani thuso ya lwa muya kha vhane vha pfesesa Bivhili. Vhulivhisi vhu bvaho Bivhilini vhune vha ḓo ni ṋea hone vhu ḓo ni thusa.—Yakobo 5:14.

Ni ḓo wana thikhedzo ine na i ṱoḓa musi ni tshi ṱanganela na vhathu vha re na lutendo lwo khwaṱhaho kha Mudzimu, na vhane vha fulufhela mafulufhedziso awe. Zwiṅwe hafhu, ni ḓo kwengweledzea nga ho engedzeaho musi ni tshi thusa vhaṅwe vhane vha ṱoḓa u khuthadzwa. Vha vhudzeni nga ha lutendo lwaṋu kha Yehova na mafulufhedziso awe. Futelelani kha u ṱhogomela vhathu vha ṱoḓaho thuso, ni si ḓifhambanye na vhane vha ni funa na u ni londa.—Mirero 18:1; 1 Vhakorinta 15:58.

ZWINE NA NGA ZWI ITA:

• Somolelani khonani yaṋu ya tsini zwa haṋwani nahone ni mu ṋee tshibuli tsha u ni thusa

• Bulani ṱhoḓea dzaṋu nga ho livhaho no vhofholowa