Yehova u ṱoḓa uri ri “fune u fulufhedzea.” (Mixa 6:8, NW) Yeneyi pfaneleo ndi ya ndeme mbinganoni nga nṱhani ha uri, arali u fulufhedzea hu si ho a hu na u fulufhelana. U fulufhelana ndi zwa ndeme u itela uri lufuno lu fhufhume.

Ṋamusi vhathu a vha tsha fulufhedzea mbinganoni. U itela u tsireledza mbingano yaṋu, ni tea u ḓiimisela u ita zwithu zwivhili.

ZWINE BIVHILI YA ZWI AMBA: “Ni ṱhogomele zwithu zwa ndeme vhukuma.” (Vhafilipi 1:10) Mbingano yaṋu ndi tshiṅwe tsha zwithu zwa ndeme vhukuma vhutshiloni haṋu. I tea u ḓa u thoma.

Yehova u ṱoḓa ni tshi livhisa ṱhogomelo yaṋu kha mufarisi waṋu na u “takadzana” nae. (Muhuweleli 9:9) U zwi bvisela khagala uri a no ngo fanela u litshelela mufarisi waṋu, fhedzi ni tea u ṱoḓa nḓila dza u takadzana. (1 Vhakorinta 10:24) Itani uri mufarisi waṋu a ḓipfe a tshi funwa na u dzhielwa nṱha.

ZWINE NA NGA ZWI ITA:

• Itani vhungoho ha uri ni ṱwa noṱhe, no livhisa ṱhogomelo yoṱhe kha mufarisi waṋu

• Ni songo humbulela inwi ni noṱhe, fhedzi ni humbulele na mufarisi waṋu

ZWINE BIVHILI YA ZWI AMBA: “Muṅwe na muṅwe ane a dzulela u lavhelesa mufumakadzi nga u mu emula, o no ita vhuṱonḓolo nae mbiluni yawe.” (Mateo 5:28) Zwenezwo zwi amba uri arali muthu a dzula a tshi vha na mihumbulo ya u ḓifara luvhi, ha khou fulufhedzea kha mufarisi wawe.

Yehova u ri ni tea u ‘vhulunga mbilu yaṋu.’ (Mirero 4:23; Yeremia 17:9) U itela uri ni zwi kone, ni tea u ṱhogomela zwine na zwi lavhelesa. (Mateo 5:29, 30) Tevhelani tsumbo ya musimulalushaka Yobo, we a vhofha mulanga na maṱo awe uri a si lavhelese musidzana nga u mu emula. (Yobo 31:1) Ḓiimiseleni uri ni si lavhelese zwifanyiso zwi karusaho maḓipfele a zwa vhudzekani. Ni ite phetho ya u iledza u ita zwa u funana na muthu a si mufarisi waṋu.

ZWINE NA NGA ZWI ITA:

• Zwi sumbedzeni na kha vhaṅwe uri inwi no ṋekedza mufarisi waṋu mbilu yaṋu

• Ṱhogomelani maḓipfele a mufarisi waṋu, ni fhelise vhushaka naho vhu vhufhio vhune ha nga ita uri mufarisi waṋu a ḓipfe a songo vhofholowa