Yesu o fhambana na vhaṅwe vhathu ngauri musi a sa athu u ḓa kha ḽifhasi, o tshila ṱaḓulu e muruṅwa. (Yohane 8:23) Ho thoma u sikwa ene hu sa athu u sikwa tshithu na tshithihi. O thusa musi hu tshi sikwa zwithu zwoṱhe. Ndi ene e eṱhe we Yehova a mu sika nga ho livhaho, ndi ngazwo zwo tea uri a vhidzwe Murwa “muthihi fhedzi” wa Mudzimu. (Yohane 1:14) Yesu u dovha a vhidzwa “Ipfi” ngauri ndi Muambeli wa Mudzimu.​—Vhalani Mirero 8:22, 23, 30; Vhakolosa 1:15, 16.

Mudzimu o rumela Murwa wawe kha ḽifhasi nga u fhirisela vhutshilo hawe u bva ṱaḓulu a vhu dzhenisa mbumbeloni ya musidzana wa Muyuda ane a pfi Maria. Yesu ho ngo vha na khotsi wa malofhani. (Luka 1:30-35) Yesu o ḓa kha ḽifhasi (1) u itela u funza mafhungo ngoho nga ha Mudzimu, (2) u itela u ri vhetshela tsumbo ya nḓila ine ra nga ita ngayo zwi funwaho nga Mudzimu na musi ri vhuimoni vhu konḓaho na (3) u itela u kumedza vhutshilo hawe sa “tshirengululi” a tshi itela vhathu.​—Vhalani Mateo 20:28.

Tshirengululi ndi tshelede ine ya badelwa u itela u rengulula muthu uri a sa vhulawe. (Ekisoda 21:29, 30) Mudzimu ho ngo sika vhathu uri vha vhe vhalala, vha fe. Ri zwi ḓivha hani zwenezwo? Mudzimu o vhudza Adamu, muthu wa u thoma uri arali a ita “tshivhi,” u ḓo fa. Arali Adamu a vhe a songo ita tshenetsho tshivhi, o vha a tshi ḓo vha a songo fa. (Genesi 2:16, 17; 5:5) Bivhili i amba uri lufu lwo “dzhena”  shangoni nga Adamu. Adamu o pfukisela tshivhi kha vhathu vhoṱhe, zwa ita uri na riṋe ri fe ngauri malamba a tshivhi ndi lufu. Ndi ngazwo ri tshi ṱoḓa tshirengululi uri tshi ri rengulule kha lufu lwe ra lu mamela kha Adamu.​—Vhalani Vharoma 5:12; 6:23.

Ndi nnyi we a vha a tshi ḓo lifha tshirengululi a ri vhofholola kha lufu? Musi ri tshi fa, ri lifha zwivhi zwashu fhedzi. A hu na muthu a re na tshivhi ane a nga lifha zwivhi zwa vhaṅwe vhathu.​—Vhalani Phisalema 49:7-9.

Yesu ha fani na riṋe ngauri ha na tshivhi. Nga nṱhani ha uri Yesu o vha e si na tshivhi, zwo vha zwi sa ṱoḓei uri a fele zwivhi zwawe. Nṱhani hazwo, Yesu o fela zwivhi zwashu. Mudzimu o sumbedza uri u a ri funa nga u rumela Murwa wawe uri a ri fele. Yesu o dovha a sumbedza uri u a ri funa nga u thetshelesa Khotsi awe, a kumedzela vhutshilo hawe a tshi itela zwivhi zwashu.​—Vhalani Yohane 3:16; Vharoma 5:18, 19.

Ṱalelani vidio ine ya ri, Ndi Ngani Yesu O Fa?

Musi Yesu e kha ḽifhasi, o fhodza vhalwadze, a vusa vhafu na u phulusa vhathu vha re khomboni. Zwe a zwi ita zwi sumbedza zwine a ḓo zwi itela vhathu vhoṱhe vha thetshelesaho tshifhingani tshi ḓaho. (Mateo 15:30, 31; Yohane 5:28) Musi Yesu o no fa, Mudzimu o dovha a mu vusa uri a tshile ṱaḓulu sa muruṅwa a re na maanḓa. (1 Petro 3:18) Musi Yesu o no humela ṱaḓulu, o lindela e thungo ya tshanḓa tsha u ḽa tsha Yehova Mudzimu u swika a tshi mu ṋea maanḓa uri a vhuse ḽifhasi ḽoṱhe sa Khosi. (Vhahevheru 10:12, 13) Zwino Yesu u khou vhusa sa Khosi ṱaḓulu nahone vhatevheli vhawe vha khou ḓivhadza eneo mafhungo maḓifha shangoni ḽoṱhe.​—Vhalani Daniele 7:13, 14; Mateo 24:14.

Hu si kale Yesu u ḓo shumisa maanḓa awe sa Khosi u itela u fhelisa tshengelo yoṱhe na vhoṱhe vhane vha i bveledza. Vhoṱhe vhane vha sumbedza uri vha na lutendo kha Yesu nga u mu thetshelesa, vha ḓo tshila nga hu sa fheli pharadisoni kha ḽifhasi.​—Vhalani Phisalema 37:9-11.