Mafhungo maḓifha a bva ha Yehova Mudzimu o takalaho, ane a ṱoḓa uri miṱa i takale. (1 Timotheo 1:11) Ndi ene muthomi wa mbingano. U vhingana nga lwa mulayo ndi zwa ndeme kha u ita uri muṱa u takale ngauri zwi ita uri vhana vha aluswe fhethu ho tsireledzeaho. Vhakriste vha fanela u ṱhonifha milayo ya hune vha dzula hone ya u ṅwalisa mbingano.​—Vhalani Luka 2:1, 4, 5.

Mudzimu u dzhia hani mbingano? U ṱoḓa uri munna na mufumakadzi vha dzule vhoṱhe vhutshilo havho hoṱhe vho vhingana. Yehova u ṱoḓa uri munna na mufumakadzi vha fhulufhedzee kha mbingano yavho. (Vhahevheru 13:4) U vhenga u ṱalana. (Maḽeaxi 2:16) Fhedzi u a tendela Vhakriste vha tshi ṱalana arali muṅwe wavho mbinganoni o ita vhupombwe. Arali vha ṱalana, vha nga dovha vha vhingana na muṅwe.​—Vhalani Mateo 19:3-6, 9.

Yehova o sika munna na mufumakadzi uri vha thusane mbinganoni. (Genesi 2:18) Samusi munna e ṱhoho ya muṱa, u fanela u ranga phanḓa kha u ṱunḓela vha muṱa wawe na u vha funza nga ha Mudzimu. U fanela u sumbedza uri u funa mufumakadzi wawe nga u ḓidzima zwiṅwe zwithu. Munna na mufumakadzi vha fanela u funana na u ṱhonifhana. Samusi munna na mufumakadzi vha tshi khakha, u guda u hangwelana ndi zwa ndeme u itela uri vha dzule vho takala mbinganoni yavho.​—Vhalani Vhaefesa 4:31, 32; 5:22-25, 33; 1 Petro 3:7.

Arali inwi na mufarisi waṋu na vha na vhuleme mbinganoni yaṋu, noṱhe itani vhuḓidini ha sumbedzana uri ni a  funana. (1 Vhakorinta 13:4, 5) Bivhili a i ṱuṱuwedzi uri vhavhingani vha tandulule thaidzo dzo ḓoweleaho mbinganoni nga u fhandekana.​—Vhalani 1 Vhakorinta 7:10-13.

Yehova u ṱoḓa uri ni takale. U ni ṋea nyeletshedzo ya khwiṋe ya nḓila ine na nga ḓiphiṋa ngayo musi ni muswa. U ṱoḓa uri ni vhuyelwe nga vhuṱali ha vhabebi vhaṋu na zwe vha zwi tshenzhela. (Vhakolosa 3:20) Yehova ane a vha Musiki waṋu u dovha a ṱoḓa uri ni takale musi ni tshi mu shumela na musi ni tshi shumela Murwa wawe.​—Vhalani Muhuweleli 11:9–12:1; Mateo 19:13-15; 21:15, 16.

Ni fanela u shuma nga maanḓa u itela u ṱunḓela vhana vhaṋu na u vha wanela vhudzulo. (1 Timotheo 5:8) Fhedzi u itela uri vhana vhaṋu vha takale, ni tea u dovha na vha funza uri vha fune Mudzimu na u guda khae. (Vhaefesa 6:4) Arali ni tshi sumbedza uri ni funa Mudzimu nga zwine na zwi ita, ni vha ni tshi khou vhetshela ṅwana waṋu tsumbo yavhuḓi. Arali na laya ṅwana waṋu ni tshi shumisa Bivhili, ni vha ni tshi khou mu thusa uri a humbule nga nḓila yavhuḓi.​—Vhalani Dotoronomio 6:4-7; Mirero 22:6.

Vhana vha a vhuyelwa musi ni tshi vha ṱuṱuwedza na u vha khoḓa. Vha dovha vha ṱoḓa u khakhululwa na u kaidzwa. U vha gudisa nga yeneyo nḓila, zwi vha tsireledza uri vha sa ite zwithu zwine zwa ḓo ita uri vha sa tsha takala. (Mirero 22:15) Fhedzi ni songo vhuya na vha kaidza no halifha kana lwa tshiṱuhu.​—Vhalani Vhakolosa 3:21.

Ṱhanzi dza Yehova vha gandisa bugu dze dza ṅwalelwa zwihuluhulu u thusa vhabebi na vhana. Dzenedzi bugu dzi na vhulivhisi vhu bvaho Bivhilini.​—Vhalani Phisalema 19:7, 11.