Оиланинг зарурий эҳтиёжларини қондиришда пул муҳим ўринга эга (Ҳикматлар 30:8). Шунингдек, пул қайсидир маънода ҳимоя беради (Воиз 7:12). Эҳтимол, пул ҳақида гап очиш сиз учун осон эмасдир, аммо пул никоҳга совуқчилик солишига йўл қўйманг (Эфесликларга 4:32). Эр-хотин бир-бирига ишониши зарур ва пулни қандай сарфлашни муҳокама қилаётиб, фикрларини инобатга олишлари керак.

МУҚАДДАС КИТОБДА НИМА ДЕЙИЛГАН? «Орангиздан кимдир иморат қурмоқчи бўлса, уни битиришга маблағи етишини билиш учун, аввалига ўтириб, қанча харажат кетишини ҳисоблаб олмайдими?» (Луқо 14:28). Харажатларни биргалашиб режалаштиришингиз ўта муҳим (Амос 3:3). Айнан нима сотиб олишингиз кераклигини аниқлаб, шароитингиз бунга йўл қўйиш-қўймаслигини ҳал қилинг (Ҳикматлар 31:16). Агар бирон нарсани сотиб олишга қурбингиз етса ҳам, уни харид қилиш шарт дегани эмас. Қарзга ботиб кетишдан эҳтиёт бўлинг. Бор пулингизга яраша ҳаёт кечиринг (Ҳикматлар 21:5; 22:7).

ФОЙДАЛИ МАСЛАҲАТЛАР

• Зарурий нарсаларни харид қилгач, ортиб қолган маблағни нима қилишни бирга ҳал қилинг.

• Пул етмаётган бўлса, харажатларни камайтириш учун муайян режа тузинг. Масалан, кўчада овқатланишдан кўра, овқатни уйда тайёрлаш яхшироқдир.

МУҚАДДАС КИТОБДА НИМА ДЕЙИЛГАН? «Бу ишни фақатгина Яҳованинг назарида эмас, балки одамларнинг олдида ҳам ҳалоллик билан бажаришга интиляпмиз» (2 Коринфликларга 8:21). Қанча пул топиб, сарфлаётганингизни турмуш ўртоғингиздан яширманг.

Сарф-харажат борасида жиддий қарорлар чиқараётиб, буни доимо умр йўлдошингиз билан муҳокама қилинг (Ҳикматлар 15:22). Маблағ ҳақида очиқчасига суҳбатлашиш, никоҳингизда тинчлик ҳукм суришига ҳисса қўшади. Даромадингизни фақатгина ўзингизга эмас, балки оилангизга тегишли деб билинг (1 Тимўтийга 5:8).

ФОЙДАЛИ МАСЛАҲАТЛАР

• Ҳар бирингиз ўз хоҳишингиз бўйича қанча пул ишлатишингиз мумкинлигини келишиб олинг.

• Муаммо пайдо бўлмасидан олдин, пул тўғрисида гаплашинг.