اُزبکستان ایک ایسے علا‌قے میں شامل تھا جو تاریخ کے دوران مختلف ناموں سے جانا جاتا رہا۔‏ اُس علا‌قے کو ماوراء النہر (‏یعنی دریاؤں کے بیچ واقع ملک)‏،‏ تارتاری اور تُرکستان کہا جاتا تھا۔‏ اُزبکستان کے کچھ شہر شاہراہِ‌ریشم کے قریب واقع تھے۔‏ پندرہویں صدی کے شروع سے اِس راستے پر سفر کرنے والے تاجر اِن شہروں میں ٹھہرا کرتے تھے۔‏ ایک وقت تھا جب شاہراہِ‌ریشم چین کو بحیرۂروم سے ملا‌تی تھی۔‏ آج‌کل اُزبکستان میں کپڑے کی صنعت میں زیادہ‌تر چیزیں ریشم کی بجائے کاٹن سے بنائی جاتی ہیں۔‏ بازاروں میں کاٹن،‏ اُون یا ریشم کے بنے خوب‌صورت قالین بھی فروخت کیے جاتے ہیں۔‏

صدیوں کے دوران اُزبکستان کی ثقافت پر بہت سی قوموں نے گہرا اثر ڈالا ہے۔‏ کئی مشہور فاتحین اور اُن کی فوجیں اِس کے شہروں پر قبضہ کرنے کے لیے اِس کے پہاڑی اور ریگستانی علا‌قوں سے گزریں۔‏ اِن فاتحین میں سکندرِاعظم شامل تھے جنہوں نے یہاں کی ایک مقامی لڑکی رُخسانہ سے شادی کی۔‏ منگولیا سے تعلق رکھنے والے چنگیز خان نے بھی اِس علا‌قے پر قبضہ کِیا۔‏ اور بعد میں امیر تیمور (‏تیمورلنگ)‏ نے اِس علا‌قے کو فتح کر لیا جو کہ اُن کا آبائی علا‌قہ بھی تھا۔‏ امیر تیمور تاریخ کے اُن حکمرانوں میں سے ایک تھے جنہوں نے بہت وسیع سلطنت پر حکمرانی کی۔‏

اُزبکستان کے شہروں میں بہت سی قدیم اور عالیشان عمارتیں ہیں جن کے گنبد نیلی ٹائلوں سے سجے ہیں۔‏ اِن میں سے زیادہ‌تر عمارتوں کو آج‌کل سکولوں کے طور پر اِستعمال کِیا جاتا ہے۔‏

 شاہراہِ‌ریشم۔‏ اِس شاہراہ کا کچھ حصہ اُس علا‌قے میں تھا جسے اب اُزبکستان کہا جاتا ہے۔‏ ایک وقت تھا جب اِس شاہراہ کو تجارتی دُنیا میں بہت اہم مقام حاصل تھا۔‏ تقریباً دوسری صدی قبل از مسیح سے لے کر پندرہویں صدی کے آخر تک اِس شاہراہ کو تجارت کے لیے اِستعمال کِیا جاتا تھا۔‏ لیکن پھر تجارتی مال سمندری راستوں کے ذریعے یورپ سے بھارت لے جایا جانے لگا جس کی وجہ سے اِس شاہراہ کی اہمیت کم ہو گئی۔‏

بحیرۂارال۔‏ کسی زمانے میں یہ دُنیا کی چوتھی سب سے بڑی جھیل تھی۔‏ اِس جھیل میں گِرنے والے دریاؤں کے پانی کو کھیتی‌باڑی کے لیے اِستعمال کِیا جاتا ہے اِس لیے جھیل کا پانی دن بہ‌دن کم ہوتا جا رہا ہے۔‏ اُزبکستان کی حکومت وسطی ایشیا کے دیگر ممالک کے ساتھ مل کر اِس مسئلے کو حل کرنے کی کوشش کر رہی ہے۔‏

مختلف حروفِ‌تہجی۔‏ یہاں مختلف زبانیں بولی جاتی تھیں۔‏ آٹھویں صدی عیسوی میں اِسلا‌می فوجوں نے ملک پر فتح حاصل کی اور عربی زبان کو فروغ دیا۔‏ اِس کے بعد جب اُزبکستان،‏ سوویت یونین کا حصہ بنا تو شروع میں رومن رسم‌الخط کا اِستعمال کِیا گیا لیکن 1930ء کے دہے کے آخر تک اِس کی جگہ سیرِلیک رسم‌الخط اِستعمال کِیا جانے لگا۔‏ 1993ء میں ایک نئے آئین کے مطابق اُزبک حروفِ‌تہجی متعارف کرائے گئے جو رومن رسم‌الخط پر مبنی ہیں۔‏