Ceci Ciwa Leci Cĩvi: Embimbiliya—Ono Yimue ya Suapo yi tu Songuila
Ka tu pondola oku kolela okuti, olonjila tu nõla olonjanja viosi vi ka eca onima yiwa, nda okuti tua kuama lika ovisimĩlo vietu kuenda viomanu vakuavo. Embimbiliya li tu sapuila esunga liaco. Handi vali, olio ono yimue ya koleliwa yi tu kuatisa oku kũlĩha ndomo tu ambata omuenyo wetu kuenda oku sanga onjila yoku kuata omuenyo umue wesanju.
TU SUKILA OKU SONGUIWA LA SUKU
Vembimbiliya, Yehova a Suku o tu sapuila okuti, ka lulikile omanu oco va li nõlele ovo muẽle eci ciwa leci cĩvi. Tu sukila oku songuiwa la Suku. (Yeremiya 10:23) Omo liaco, pocakati Cembimbiliya, Suku wa eca olonumbi viatiamẽla kueci ciwa leci cĩvi. Eye o sole omanu kuenda ka yongola okuti tu tala ohali omo liolonjila vĩvi tu nõla. (Esinumuĩlo 5:29; 1 Yoano 4:8) Handi vali, omo okuti eye Ululiki wetu, o kuete olondunge lukũlĩhĩso woku tu ĩha alungulo a velapo. (Olosamo 100:3; 104:24) Pole ndaño ndoco, Suku ka kisika omanu oku linga ovina a popia okuti oco ciwa.
Yehova wa eca komanu vatete Adama la Eva, ovina viosi va sukilile oco va kuate esanju. (Efetikilo 1:28, 29; 2:8, 15) Eye wa yonguilevo okuti ovo va pokola kolonumbi viaye. Pole, wa ecelela okuti ovo va nõla nda va pokola kolonumbi viaco ale sio. (Efetikilo 2:9, 16, 17) Ci sumuisa okuti, Adama la Eva va li nõlela ovo muẽle eci ciwa leci cĩvi okuti, ka va pokuile kolonumbi via Suku. (Efetikilo 3:6) Onima yipi yeyililako? Ca nena hẽ esanju komanu? Sio. Vokuenda kuotembo, omanu va limbuka okuti oku sinila olonumbi via Suku viatiamẽla kueci ciwa leci cĩvi, ka ci nena ombembua kuenda esanju.—Ukundi 8:9.
Embimbiliya olio ono tu sukila oco tu nõle olonjila viwa, ndaño okuti tua kulila kovitumãlo via litepa, ale kapata a litepa. (2 Timoteo 3:16, 17; tanga okakasia losapi hati, “ Elivulu Limue Lia Sokiyiwila Omanu Vosi.”) Tala ndomo Embimbiliya li pondola oku ku kuatisa.
Limbuka momo lie ca sungulukila oku tukuila Embimbiliya okuti “Ondaka ya Suku.”—1 Va Tesalonike 2:13. Tala ovideo losapi hati, Helie Usovoli Wembimbiliya? Vonumbi yetu jw.org.
EMBIMBILIYA LI TUSAPUILA OVINA SUKU A YONGOLA OKUTI OVIO TU LINGA
Embimbiliya li popia eci catiamẽla kukamba Suku a kuete lomanu tunde osimbu. Ovina olio li popia, vi tu kuatisa oku kuata elomboloko liocisimĩlo ca Suku catiamẽla kueci ciwa leci cĩvi kuenda ovina vi pondola oku tu kuatisa ale vievi vi tu kokela ovitangi. (Olosamo 19:7, 11) Mu sangiwavo olonumbi kuenda ocili cina okuti lalimue eteke ci pongoloka haivio vi tu kuatisa oku nõla olonjila viwa komuenyo wetu weteke leteke.
Ndeci, kũlĩhĩsa onumbi yi sangiwa kelivulu Liolosapo 13:20 ku popia hati: “Omunu endaenda lukualondunge o lingavo ukualondunge, pole, una o livala ukamba leveke o ka liyaka lovitangi.” Onumbi eyi yi kapiwako calua koloneke vilo ndeci ca kala kosimbu. Vembimbiliya mu sangiwa olonumbi vialua vi tu kuatisa havio vi kuete esilivilo ndeci onumbi eyi.—Tanga okakasia losapi hati: “ Olonumbi Okuti Otembo Yosi vi Kuete Esilivilo.”
Pole pamue o lipula ndoco: ‘Ndi kolela ndati okuti olonumbi Viembimbiliya toke cilo vi kuete esilivilo?’ Ocipama ci kuãimo, ci ka lekisa ovolandu omuenyo a lekisa ocili caco.
a Yehova onduko ya Suku.—Olosamo 83:18.
