Ceci Ciwa Leci Cĩvi: Oku Kapako Olonumbi Viembimbiliya ci Kuatisa
Kũlĩhĩsa olonepa vikuãla Embimbiliya lia siata oku kuatisa omanu valua.
1. Olohuela
Omanu va kuete ovisimĩlo via litepa viatiamẽla kolohuela kuenda ovina va sukila oku linga oco va kuate esanju volohuela.
CECI EMBIMBILIYA LI POPIA: “Omunu lomunu pokati kene, a sole ukãi waye ndeci a li sole eye muẽle; handi vali, ukãi o sukila oku lekisa esumbilo liocili kulume waye.”—Va Efeso 5:33.
ELOMBOLOKO: Suku eye wa sovola olohuela kuenje eye wa kũlĩha eci ohueli yimue yi sukila oku linga oco yi kuate esanju. (Marko 10:6-9) Oco omunu umue a kuate esanju volohuela, o sukila oku kapako calua omunu ukuavo okuti eye muẽle ci sule. Ulume una o sole ukãi waye, u tata lohenda. Ukãi wa sumbila ulume waye, o ci lekisila konjila ndomo a vangula laye kuenda kovituwa viaye.
OKU POKOLA KOLONUMBI VIEMBIMBILIYA CI KUATISA: Ulume umue wo kofeka yo Vietnã o tukuiwa Quang kumue lukãi waye Thi, ka va kuatele olohuela vimue viesanju. Quang wa temele calua. Eye hati: “Olonjanja vialua nda enda oku kutisa osõi ukãi wange Thi kuenda sia kapeleko ovisimĩlo viaye.” Thi wa yonguile oku linyãla. Eye wa popia hati: “Ame sia tẽlele vali oku sumbila ulume wange ndaño muẽle oku kolela kokuaye.”
Noke Quang kuenda Thi va lilongisa Embimbiliya kuenda ndomo va kapako elungulo li sangiwa kukanda ku Va Efeso 5:33 volohuela viavo. Quang wa popia hati: “Ocisonehua caco ca ndi kuatisa oku limbuka okuti, nda sukilile oku kala ukuahenda, oku lekisa ocisola ku Thi kuenda oku eca kokuaye ovina a sukila. Eci ndi ci linga, ocisola kuenda esumbilo eye a ndi kuetele vi livokiya.” Thi wa popia ndoco: “Eci ndi kapako elungulo li sangiwa kukanda ku Va Efeso 5:33 kuenda ndi lekisa esumbilo kulume wange, eye o lekisavo ocisola calua kokuange, o ndi teyuila kuenda ndi kuata ombembua.”
Oco o kuate alomboluilo akuavo atiamẽla kolohuela, tanga Omasuli! No. 2 2018, losapi hati: “12 Kalumbu Oco Epata li Kuate Esanju,” yi sangiwa vo jw.org.
2. Ndomo tu Tata Vakuetu
Omanu va siata oku tata lãvi vakuavo omo liekova liavo, ofeka, emolẽho, etavo ale ovituwa viavo viatiamẽla koku lipekela.
CECI EMBIMBILIYA LI POPIA: “Sumbili omanu vosi.”—1 Petulu 2:17.
ELOMBOLOKO: Embimbiliya li popia okuti, tu sukila oku tata omanu vakuavo lesumbilo ndaño okuti vakuekova lia litepa, ofeka, ovituwa vioku lipekela ale ekalo liomuenyo. (Ovilinga 10:34) Ndaño okuti ka tu tava kovina omanu vakuavo va tava kuenda kovituwa viavo, pole tu sukila oku va tata lohenda kuenda lesumbilo.—Mateo 7:12.
OKU POKOLA KOLONUMBI VIEMBIMBILIYA CI KUATISA: Ulume umue o tukuiwa hati Daniele, wa longisiwa oku tenda omanu vo ko Ásia okuti, omanu va koka ohele kofeka yavo. Omo liaco, eye wa suvukile omanu vosi vo ko Ásia kuenda olonjanja vimue wa enda oku va sanumula pokati kowiñi. Eye wa popia hati: “Nda enda oku sima okuti nda kala oku ‘teyuila ofeka yange. Lalimue eteke nda simile okuti, nda kala oku linga cimue cĩvi.’”
Noke Daniele wa lilongisa Embimbiliya. Eye wa popia hati: “Nda sukilile oku pongolola ovisimĩlo viange viosi. Nda sukilile oku tenda omanu ndomo Suku a va tenda, ale okuti, vosi yetu tuamuamue ndaño tu kasi kolofeka via litepa.” Daniele poku lombolola ndomo a kala eci a kũlĩha omunu umue, eye wa popia hati: “Sia la sokolola ofeka omunu waco a tundilila. Ame ndi sole omanu vosi kuenda ndi kuete akamba vokolonepa viosi violuali.”
Oco o kuate alomboluilo akuavo, tanga Omasuli! No. 3 2020 losapi hati: “O Preconceito Vai Acabar?” yi sangiwa vo jw.org.
3. Olombongo
Omanu valua va seteka oku kala olohuasi oco va kuate esanju kuenda ekalo liwa kovaso yoloneke.
CECI EMBIMBILILA LI POPIA: “Olondunge vi teyuila ndeci olombongo vi teyuila, pole, esilivilo liukũlĩhĩso lieli: Olondunge vi teyuila omuenyo wa una o vi kuete.”—Ukundi 7:12.
ELOMBOLOKO: Etu tu sukila olombongo, pole, ovio ka vi pondola oku tu nenela esanju ale ekalo liwa kovaso yoloneke. (Olosapo 18:11; 23:4, 5) Ocili okuti oco tu kuate ovina viaco, tu sukila oku kapako olonumbi Suku a eca kokuetu pocakati Cembimbiliya.—1 Timoteo 6:17-19.
OKU POKOLA KOLONUMBI VIEMBIMBILIYA CI KUATISA: Ulume umue o tukuiwa Cardo wo kofeka yo Indonésia, wa tiamisilile omuenyo waye koku sanda olombongo. Eye wa popia hati: “Ame nda kuatele ovina vosi omanu valua va yonguile oku kuata. Nda ponduile oku linga ovongende kuenda oku landa ovina via kemãla ndeci akãlu kuenda olonjo.” Pole, ukuasi waco ka wa kaile otembo yalua. Cardo wamisako hati: “Ame da nyaniwa kuenda vocipikipiki olombongo viosi nda talavayele vokuenda kuanyamo alua, via enda. Nda talavaya vokuenda kuanyamo alua oco ndi kale ohuasi, pole noke nda yeva esumuo momo sia kuatele vali lacimue kuenda nda enda oku liyeva ndu okuti si kuete esilivilo.”
Cardo wa fetika oku kapako olonumbi Viembimbiliya viatiamẽla koku kuata olombongo. Eye wa liwekapo oku pesela ongusu yaye koku kuata ovokuasi kuenda wa nõlapo oku ambata omuenyo umue wa leluka. Eye wa popia hati: “Kaliye ndi liyevite okuti ndi kuete ukuasi wocili, momo ñuete ukamba uwa la Suku, ndi pekela ciwa luteke kuenda ndi kuete esanju liocili.”
Oco o kũlĩhe ovina vikuavo Embimbiliya li popia catiamẽla kolombongo, tanga Utala Wondavululi No. 3 2021 losapi hati: “Elilongiso Kuenda Olombongo vi ka Eca hẽ Ekalo Lia Kolapo Kovaso Yoloneke?” vo jw.org.
4. Oku lipekela
Omanu va kuete ovisimĩlo via litepa viatiamẽla koku lipekela.
CECI EMBIMBILIYA LI POPIA: “Vu yuvula evĩho liukahonga. Omunu lomunu a kũlĩhe ndomo a lava etimba liaye loku kola kuenda lesumbilo, halokulivelako oloñeyi viukahonga ndeci ca siata pokati ka vakualofeka vana okuti, ka va kũlĩhĩle Suku.”—1 Va Tesalonike 4:3-5.
ELOMBOLOKO: Embimbiliya li popia okuti, kuli onjila ya sunguluka yoku tẽlisa olonjole vietu vioku lipekela. Vondaka yokuti, evĩho liukahonga mua kongela ukahokolo, upuepue, oku lipekela kuomanu ka va kuelele, alume vakuakulipekela lalume kuenda oku lipekela lovinyama. (1 Va Korindo 6:9, 10) Oku lipekela ombanjaile Suku a eca lika kulume lukãi va likuela.—Olosapo 5:18, 19.
OKU POKOLA KOLONUMBI VIEMBIMBILIYA CI KUATISA: Ukãi umue wo kofeka yo Australia o tukuiwa Kylie wa popia hati: “Eci okuti handi sia kuelele nda simile okuti nda nda lipekela lomunu umue, ndi liyeva okuti ndi soliwe kuenda ndi kolapo. Pole hacoko ca li pita. Nda liyeva okuti sia kolelepo kuenda nda kala lesumuo lialua.”
Noke Kylie wa fetika oku kapako ovina Embimbiliya li popia catiamẽla koku lipekela. Eye wa popia hati: “Nda kuata elomboloko liokuti ovihandeleko via Suku vi tu teyuila. Cilo ndi liyevite okuti nda kolapo kuenda ndi soliwe momo ndi kasi oku linga ovina ndomo Yehova a yongola. Oku kapako ovina Embimbiliya li popia, ca ndi kuatisa oku yuvula ohali!”
Oco o kũlĩhe ovina vikuavo, tanga ocipama losapi hati: “Nye Embimbiliya li Popia Catiamẽla Komanu va Kasi Pamosi Okuti ka va Kuelele?” vo jw.org.
Ululiki wetu o tu kuatisa oku kũlĩha eci ciwa leci cĩvi. Ndaño okuti olonjanja vimue ka ca lelukile oku kapako olonumbi viaye, pole, oku ci linga ci kuatisa. Tu pondola oku kolela okuti, ci tu nenela esanju.
