Sio, Ongongo lalimue eteke yi ka kunduiwa, yi ka timihĩwa, ale oku piñanyiwa. Embimbiliya li longisa okuti, Suku wa lulika ongongo oco omanu va tungemo otembo ka yi pui.

•   “Vakuesunga va ka piñala ilu lieve, kuenda va ka kalamo otembo ka yi pui.”—Olosamo 37:29.

•   “[Suku] wa tumbika ilu lieve voviseveto vialio; olio ka li ka sengiwa pocitumãlo calio otembo ka yi pui.”—Olosamo 104:5.

•   “Ongongo yamamako otembo ka yi pu.”—Ukundi 1:4.

•   “Una wa panga ongongo, haeye wa yi Sovola loku yi kolisa, . . . ka yi lulikile oco yi kale upolokoso, pole, wa yi sovola oco mu tungiwe.”—Isaya 45:18.

 Suku ka ka ecelela okuti omanu va amamako oku nyõla ovina vi kasi vongongo lolofela via vĩha, uyaki ale lonjila yikuavo. Ocili okuti eye o ka “kundula vana va vĩhisa ilu lieve.” (Esituluilo 11:18) Eye o ka ci tẽlisa ndati?

 Olombiali violuali okuti ka vi tẽla oku teyuila ongongo, Suku o ka vi piñanya Lusoma umue wa lipua wokilu. (Daniele 2:44; Mateo 6:9, 10) Usoma waco u ka vialiwa lomõla a Suku, Yesu Kristu. (Isaya 9:6, 7) Eci Yesu a kala palo posi wa linga ovikomo vi lekisa okuti o kuete unene woku imula ovilunga. (Marko 4:35-41) Yesu Ndosoma Yusoma wa Suku, o ka kuata unene woku imula ovina viosi vĩvi palo posi. Eye o ka lingisa ovina viosi vio kaliye, oco ongongo yi linge ocumbo celau ndeci ca kala ocumbo Cedene.—Mateo 19:28; Luka 23:43.

 Sio, eci haciliko. Valua va fetika oku kuata ovisimĩlo evi omo lieci ci sangiwa kukanda 2 Petulu 3:7 kuna ku popia hati: “ovailu a kasiko ndeti kuenda ongongo, via pongiyiwila ondalu.” Kũlĩhĩsa ovina vivali vi kuete esilivilo vi tu kuatisa oku kuata elomboloko liolondaka evi:

1.   Vembimbiliya olondaka ndeci “ovailu,” “ongongo” kuenda “ondalu” vi kuete alomboloko alua. Ndeci Kefetikilo 11:1 ku popia hati: “Oluali luosi lua kala lika lelimi limosi.” Palo, ondaka “oluali” lu lomboloka omanu vokotembo yaco.

2.   Ulandu waco wukanda 2 Petulu 3:7 u lombolola elomboloko liovailu, ongongo kuenda ondalu vi lomboluiwa vocisonehua eci. Ocinimbu 5 kuenda 6 vi sokisa Etande lio koloneke via Noha. Koloneke viaco, oluali lumue luosimbu lua nyõliwa, pole, ongongo ka ya nyõliwile. Ocili okuti “ongongo” ya nyõliwa Letande, ya kala omanu vana okuti olongangala. (Efetikilo 6:11) Eye wa nyõlavo “ovailu,” okuti vana va vialele omanu vaco. Kuenje omanu vana okuti olongangala va nyõliwa, pole, ongongo sio. Noha kumue lepata liaye ka va nyõliwile letande kuenje va tunga kilu lieve noke Letande.—Efetikilo 8:15-18.

 Ndeci ovava Etande, “ondalu” ya tukuiwa kukanda 2 Petulu 3:7 yi lomboloka enyõleho liomanu olondingaĩvi, Ongongo haiyoko. Suku wa likuminya “ovailu okaliye longongo yokaliye” kuenje “mu ka kala esunga.” (2 Petulu 3:13) ‘Ongongo yokaliye’ yi lomboloka omanu va ka kala kotembo yaco. Ovo va ka kala vemẽhi ‘liovailu okaliye’ okuti, vemẽhi liuviali wokaliye. Uviali waco, Usoma wa Suku una u ka pongolola Ongongo oco yi kale oluali luokaliye luombembua.—Esituluilo 21:1-4.