O vai te iˈoa o te Atua? Ua parau te Atua iho: “O vau o Iehova, o to ˈu ïa iˈoa.” (Isaia 42:8) Ua faahitihia te iˈoa o te Atua hau atu i te 7 000 taime i roto i te Bibilia. Ma te tano ore râ, ua mono e rave rahi huriraa Bibilia i te reira ma te faaohipa i te tiaraa iˈoa “Fatu.” Te hinaaro ra te Atua ia riro oe ei hoa no ˈna, no reira oia e faaitoito ai ia oe ia “tiaoro i to ˈna iˈoa.”—Salamo 105:1.

Te mau tiaraa iˈoa o Iehova. Te faahiti ra te Bibilia ia Iehova ma te faaohipa i te mau tiaraa iˈoa mai “te Atua,” “te Mana hope,” “te Atua poiete,” “te Fatu” e “te Arii hau ê.” I roto i te Bibilia, te faahiti nei e rave rahi pure i te tiaraa iˈoa tura e te iˈoa mau o te Atua.—Daniela 9:4.

 Te huru o te Atua. E Varua te Atua. (Ioane 4:24) Te haapapu ra te Bibilia e “aore roa e taata i ite i te Atua.” (Ioane 1:18) Te faaite atoa ra te Bibilia i te mau huru aau o te Atua. E nehenehe te mau taata e faaoto aore ra e faaoaoa ia ˈna.—Maseli 27:11; Salamo 78:40, 41.

To te Atua mau huru maitatai faahiahia roa. Mea maitiiti ore te Atua i te taata noa ˈtu to ratou nunaa aore ra huru tupuraa. (Ohipa 10:34, 35) E “Atua aroha noa, e te hamani maitai rahi, e te faaoromai rahi, e te maitai rahi, e te parau mau.” (Exodo 34:6, 7) E maha râ huru maitatai o te Atua te mea faahiahia roa.

Te puai. I te mea e o o ˈna “te Atua mana hope,” e puai faito ore to ˈna no te faatupu i te mau mea atoa ta ˈna i fafau.—Genese 17:1.

Te paari. Mea hau ê te paari o te Atua i to te taata. No reira te Bibilia i faahiti ai e “Atua paari hoê roa” oia.—Roma 16:27.

Te parau-tia. Te rave noa ra te Atua i te mea tia. Mea “tia roa” ta ˈna mau ohipa e “te ino ore.”—Deuteronomi 32:4.

Te here. Te parau ra te Bibilia e “e here te Atua.” (Ioane 1, 4:8) Aita te Atua e faaite noa i te here, e here oia. Na to ˈna here hau ê e turai ai ia ˈna ia rave i ta ˈna mau ohipa atoa e e faufaahia tatou maoti te reira.

Te auhoaraa i rotopu i te Atua e te mau taata. O to tatou Metua î i te here i te raˈi, te Atua. (Mataio 6:9) Ia tiaturi tatou i te Atua, e nehenehe tatou e riro ei hoa no ˈna. (Salamo 25:14) Te titau manihini ra te Atua ia oe ia faafatata ˈtu ia ˈna na roto i te pure e ia ‘huri i to oe mau ahoaho atoa i nia ia ˈna, no te mea te tâuˈa mai ra oia ia oe.’—Petero 1, 5:7; Iakobo 4:8.

E ere o Iesu te Atua. Mea otahi o Iesu. O o ˈna anaˈe ta te Atua iho i poiete. No reira te Bibilia e pii ai ia ˈna, te Tamaiti a te Atua. (Ioane 1:14) Ua poiete te Atua ia Iesu e ua faaohipa ia ˈna, teie Tamaiti matahiapo, mai te hoê Rave ohipa aravihi no te poiete i te mau mea atoa e te mau taata atoa.—Maseli 8:30, 31; Kolosa 1:15, 16.

 Aita roa ˈtu Iesu Mesia i parau e o o ˈna te Atua. Ua faataa râ oia: “E tia vau no [te Atua], e na ˈna i tono mai ia ˈu.” (Ioane 7:29) A tauaparau ai oia e te hoê o ta ˈna mau pǐpǐ, ua parau Iesu no Iehova, ‘to ˈu Metua e to outou Metua’ e “to ˈu Atua e to outou Atua.” (Ioane 20:17) I muri aˈe i te pohe o Iesu, ua faahoˈi Iehova ia ˈna i te ora i nia i te raˈi e ua horoa ˈtu te mana rahi i to ˈNa rima atau.—Mataio 28:18; Ohipa 2:32, 33.

E nehenehe Iesu Mesia e tauturu ia oe ia faafatata ˈtu i te Atua

Ua haere mai Iesu i nia i te fenua no te haapii ia tatou no nia i to ˈna Metua. Ua parau Iehova no nia ia Iesu: “O ta ˈu Tamaiti teie, tei herehia. A faaroo ia ˈna.” (Mareko 9:7) O Iesu te ite maitai roa ˈˈe o vai te Atua. Ua na ô oia: “O te Tamaiti anaˈe tei ite o vai te Metua e te taata atoa ta te Tamaiti e hinaaro e faaite atu o vai te Metua.”—Luka 10:22.

Te faaite ra Iesu i te mau huru maitatai o te Atua ma te tia roa. Ua pee maite roa Iesu i te mau huru maitatai o to ˈna Metua, no reira oia i parau ai: “O tei ite mai ia ˈu, ua ite atoa ïa i te Metua.” (Ioane 14:9) Ua aratai Iesu i te taata i te Atua ma te pee i te here o to ˈna Metua na roto i ta ˈna mau parau e ohipa. Ua na ô oia: “O vau te eˈa e te parau mau e te ora. Aore roa e taata e tae i te Metua ra, na roto noa râ ia ˈu.” (Ioane 14:6) Ua parau atoa Iesu: “E haamori ai te feia haamori mau i te Metua ma te varua moˈa e te parau mau, inaha te imi nei te Metua i te taata mai te reira no te haamori ia ˈna.” (Ioane 4:23) A feruri na! Te imi nei Iehova i te taata mai ia oe o te hinaaro e ite i te parau mau no nia ia ˈna.