I TO taurearearaa, eaha te oraraa ta oe i hinaaro? Peneiaˈe, ua opua e faaipoipo, e faaitoito ia noaa ˈtu â te tahi aravihi taa ê aore ra toroa au mau. Eita râ te oraraa e tupu hanoa mai ta tatou i faataa. E nehenehe te tahi mau fifi manaˈo-ore-hia e taui roa i te oraraa. Tera tei tupu no Anja, Delina e Gregory.

• E 21 matahiti to Anja no Heremani a itehia ˈi e mariri ai taata to ˈna. I teie nei, e titauhia ia faaea noa oia i te fare i te rahiraa o te taime.

• Ua roohia Delina no Marite i te tahi maˈi i te pae o te mau uaua uira parauhia dystonie o te haafifi i to ˈna mau mero. Hau atu â, te haapao ra oia i to ˈna na taeae huma e toru.

• Ua fifi roa te oraraa o Gregory no Kanada no te mea e ahoaho noa o ˈna a ore atu ai e nehenehe faahou e rave i te tahi ohipa.

Noa ˈtu to ratou tupuraa, ua tia ia Anja, Delina e Gregory ia faanaho faahou i to ratou oraraa. Eaha ta ratou i rave?

Ua faaite te tahi parau paari Bibilia: “Ia paupau to aho i te mahana e ati ai ra, te iti hua ra to oe itoito.” (Maseli 24:10) Te taa-maitai-hia ra o te feruriraa te mea faufaa. Eita te feia manaˈo paruparu e nehenehe e faanaho faahou i to ratou oraraa. Area tei faaite i te manaˈo maitai, e pinepine ratou i te faaitoito ia mauruuru noa ratou i te oraraa noa ˈtu te fifi.

E hiˈopoa anaˈe i te mau haapapuraa o te reira i roto i te oraraa o Anja, Delina e Gregory.