Te manaˈo ra anei oe e fanaˈo tatou i te hoê oraraa maitai aˈe i mua nei? E rave rahi taata o te tamata ra i te tapea i te hoê feruriraa maitai noa ˈtu te mau fifi rahi o teie tau. Mea tano anei râ ia manaˈo mai tera? E. Te horoa mai ra hoi te Bibilia i te hoê tiaturiraa papu no te hoê oraraa maitai aˈe.

•  Eaha te tiaturiraa ta te Bibilia e horoa ra?

•  E moemoeâ anei te tiaturiraa ta te Bibilia e horoa ra?

•  E nafea ta te Bibilia e fafau ra e tupu ai?

•  Afea tera mau parau fafau e tupu ai?

•  E nafea te tiaturiraa ta te Bibilia e horoa ra e tauturu ai ia oe i teie mahana?

 Te parau ra iho â te Bibilia e faaruru te taata i te fifi rahi. Ua fafau atoa râ e hopearaa to te reira. Teie te tahi mau hiˈoraa:

•   Te fifi: Aita e nohoraa

   Ta te Bibilia e parau ra: “E hamani ratou i te fare e e ora ratou i roto.”—Isaia 65:21.

   Te auraa: A muri aˈe, e fanaˈo te taata tataitahi i to ratou iho fare.

•   Te fifi: Aita e ohipa e mea veve te taata

   Ta te Bibilia e parau ra: “E faufaa-roa-hia to ˈu feia maitihia i te ohipa a to ratou rima.”—Isaia 65:22.

   Te auraa: A muri aˈe, e fanaˈo, e oaoa e e faufaa-roa-hia te taata tataitahi i ta ˈna ohipa.

•   Te fifi: Aita e parau-tia

   Ta te Bibilia e parau ra: “E mana mai te huiarii no te ohipa afaro.”—Isaia 32:1.

   Te auraa: A muri aˈe, eita te taata e hiˈo-ino-hia ia au i to ratou nunaa, oraraa totiare e ta ratou mau faufaa. E tupu te parau-tia no te taata atoa.

•   Te fifi: Te maa tano ore e te poia

   Ta te Bibilia e parau ra: “E rahi te huero maa i nia i te fenua. E manii te reira na nia i te mau tupuai mouˈa.”—Salamo 72:16.

   Te auraa: A muri aˈe, e fanaˈo te taata atoa e rave rahi maa maitai no te ea, eita te hoê e taoto ma te poia e eita atoa e ere i te maa maitai no te tino.

•   Te fifi: Ofatiraa ture e te ohipa ino

   Ta te Bibilia e parau ra: “E parahi ratou tataitahi i raro aˈe i ta ratou tumu vine e ta ratou tumu suke, e eita hoê e faariaria ia ratou.”—Mika 4:4.

   Te auraa: A muri aˈe, eita te taata e haapeapea e e mǎtaˈu no te mea aita e feia ino faahou e e “fatu te feia parau-tia i te fenua.”—Salamo 37:10, 29.

•   Te fifi: Te tamaˈi

   Ta te Bibilia e parau ra: “E ore te hoê nunaa e amo i ta ratou ˈoˈe i nia i te tahi nunaa, e ore atoa ratou e haapii faahou i te tamaˈi.”—Isaia 2:4.

   Te auraa: A muri aˈe, e itehia te hau i nia i te fenua taatoa. (Salamo 72:7) Eita te hoê e oto no te mea ua pohe tei herehia i roto i te tamaˈi aore ra no te mea ua horo ê oia i te vahi e tupu ra te tamaˈi.

•   Te fifi: Te maˈi e te hoê tino paruparu

   Ta te Bibilia e parau ra: “Aita e taata e parau: ‘E maˈi to ˈu.’”—Isaia 33:24.

   Te auraa: A muri aˈe, eita te tino o te taata e paruparu faahou e e ore roa te maˈi. (Isaia 35:5, 6) Te fafau atoa ra te Bibilia “e ore roa te pohe.”—Apokalupo 21:4.

•   Te fifi: Te tuinohia ra te natura

   Ta te Bibilia e parau ra: “E oaoa roa te medebara e te fenua mǎrô, e e oaoa te vahi papu pâpâmǎrô e e uaa mai te tiare.”—Isaia 35:1.

   Te auraa: A muri aˈe, mai ta te Atua i opua i te omuaraa ra, e riro te fenua taatoa ei paradaiso i reira te taata e parahi ai.—Genese 2:15; Isaia 45:18.

 Tera paha ta oe e manaˈo ra! E faaitoito râ matou ia oe ia hiˈopoa maite i ta te Bibilia e parau ra no a muri aˈe. Mea taa ê te mau parau fafau a te Bibilia i te parau e te tohuraa a te taata. No ǒ mai te mau parau fafau Bibilia i te Atua ra. Eaha te taa-ê-raa i rotopu i te Atua e te taata?

•   E nehenehe e tiaturi i te Atua. Te parau ra te Bibilia eita te Atua “e nehenehe e haavare.” (Tito 1:2) Hau atu â, o te Atua anaˈe te nehenehe e tohu i te tupu a muri aˈe. (Isaia 46:10) E rave rahi hiˈoraa Bibilia o te haapapu e tupu iho â ta te Atua i fafau. No te ite atu â, a mataitai i te video E nafea e papu ai ia tatou e e parau mau te Bibilia?

•   E mana to te Atua no te faaafaro i to tatou mau fifi. Te parau ra te Bibilia e mana to te Atua no te rave i “te mau mea atoa ta ˈna e au.” (Salamo 135:5, 6) Te auraa, eita te hoê noa ˈˈe mea e nehenehe e tapea i te Atua ia faatupu i ta ˈna i fafau. Te mea faufaa roa ˈtu â, te hinaaro ra te Atua e tauturu ia tatou no to ˈna here rahi ia tatou.—Ioane 3:16.

 E ui paha oe, ‘Mai te peu e hinaaro e e mana to te Atua no te tauturu ia tatou, no te aha ïa i rahi roa ˈi te fifi i teie mahana?’ No te ite i te pahonoraa, a mataitai i te video No te aha te Atua e vaiiho noa ˈi te mauiui?

 E faaohipa te Atua i to ˈna Basileia, oia hoi ta ˈna Faatereraa arii i te raˈi, no te faatupu i ta ˈna mau parau fafau. Ua maiti oia ia Iesu Mesia ei Arii o tera Basileia e ua horoa oia ia ˈna i te mana no te aupuru i te taata e parahi i nia i te fenua. I to ˈna haereraa mai i nia i te fenua, ua faaora Iesu i te feia maˈi, ua faatamaa i tei poia, ua tamaˈi i te mataˈi e te miti e ua faatia atoa mai i te feia pohe. (Mareko 4:39; 6:41-44; Luka 4:40; Ioane 11:43, 44) Ua faaite ïa o ˈna eaha ta ˈna e rave ei Arii o te Basileia o te Atua.

 No te ite atu â e nafea te Faatereraa arii a te Atua e haamaitai ai ia oe, a mataitai i te video Eaha te Basileia o te Atua?

 Fatata roa! Nafea râ ia papu? Ua tohu te Bibilia eaha te mau ohipa e tupu ia haamata te Basileia o te Atua i te faatere. (Luka 21:10, 11) Te ite ra tatou te tupu ra ta te Bibilia i tohu na te ao atoa nei.

 No te ite atu â, a taio i te tumu parau “Afea te Faatereraa arii a te Atua e faatere ai i te fenua?”

 Te faaauhia ra te tiaturiraa ta te Bibilia e horoa mai ra i te hoê “tutau no to tatou ora.” (Hebera 6:19) Mai te tutau o te tapea i te hoê pahi i roto i te vero, e tauturu mai te tiaturiraa papu ta te Bibilia e horoa mai ra no a muri aˈe ia faaruru i te mau fifi o teie mahana. E nehenehe atoa to tatou tiaturiraa e paruru i to tatou aau, to tatou feruriraa e tae noa ˈtu i to tatou ea.—Tesalonia 1, 5:8.