I roto i te Mataio 28:19, 20, ua faataa Iesu eaha te mau titauraa no te riro ei Ite no Iehova. Ia au i tera nau irava, e itehia ïa eaha te tia ia rave no te riro ei pǐpǐ na te Mesia, e taata hoi tera o te faaite o vai o Iehova.

 Te titauraa 1: A haapii i te Bibilia. Ua faaue Iesu i ta ˈna mau pǐpǐ ia “faariro i te taata . . . ei pǐpǐ na ˈu. . . ma te haapii ia ratou.” (Mataio 28:19, 20) I roto i te reo tumu, te auraa mau o te parau “pǐpǐ,” o te hoê ïa taata o te haapii ra. Te faaite ra te Bibilia, te mau haapiiraa iho â râ a Iesu Mesia, eaha te titauhia ia rave no te ora ma te oaoa e te mauruuru mau. (Timoteo 2, 3:16, 17) Oaoa roa matou i te tauturu ia oe ia ite i ta te Bibilia e haapii ra na roto i ta matou ohipa haapiiraa Bibilia tamoni ore.—Mataio 10:7, 8; Tesalonia 1, 2:13.

 Te titauraa 2: A faaohipa i ta oe e haapii. Ua parau Iesu e tia atoa “ia haapao i te mau mea atoa ta ˈ[na] i faaue.” (Mataio 28:20) Eita ïa e navai noa ia haapii no te ite, e turai atoa râ te reira ia oe ia taui i to feruriraa e haerea. (Ohipa 10:42; Ephesia 4:22-29; Hebera 10:24, 25) I muri iho, na te taata iho e haapao ra i ta Iesu mau faaueraa e faaoti i te pee ia ˈna ma te pûpû i to ˈna ora i te Atua ra o Iehova.—Mataio 16:24.

 Te titauraa 3: Ia bapetizohia oe. (Mataio 28:19) I roto i te Bibilia, ua faaauhia te bapetizoraa i te hunaraa. (A hiˈo i te Roma 6:2-4.) Te faahohoˈa ra te reira e ua faaruehia te oraraa tahito e te haamatahia ra te hoê oraraa apî. E faaite to oe bapetizoraa i te taata atoa ua faaî oe i na titauraa matamua faataahia e Iesu. Hau atu â, te ani atoa ra oe i te Atua ia horoa ˈtu i te manaˈo haava maitai.—Hebera 9:14; Petero 1, 3:21.

 A paraparau i te mau matahiapo o te amuiraa. E tauturu atu ratou ia ite i te faufaaraa o tera faaotiraa, ua faaohipa anei oe i ta oe i haapii e na oe iho anei i faaoti i te pûpû ia oe i te Atua.—Ohipa 20:28; Petero 1, 5:1-3.

 E. Mai ta te Bibilia e faaue mai ra, ua haapii matou i ta matou tamarii “i te aˈo e te faaararaa a Iehova.” (Ephesia 6:4) A paari noa ˈi râ, na ratou iho e faaoti i te haapii, farii e faaohipa i ta te Bibilia e haapii ra hou a bapetizohia ˈi. (Roma 12:2) Na te taata taitahi e rave i ta ˈna iho faaotiraa i te pae o te haamoriraa.—Roma 14:12; Galatia 6:5.