Ua fanauhia vau i San Juan Chancalaito, hoê oire iti no Chiapas i Mehiko. No roto mai matou i te nunaa Maya. E 12 tamarii matou, o vau te pae. I te tamariiraa ua haapii matou i te Bibilia na muri i te mau Ite no Iehova. Tera ra, i to ˈu apîraa aita roa ˈtu vau i faaohipa i te mau aˈoraa Bibilia.

 I te 13raa o to ˈu matahiti ua haamata vau i te rave i te raau taero e i te eiâ. Ua faarue au i te fare e overe noa ˈtura i tera e tera vahi. I te 16raa o to ˈu matahiti, ua ohipa vau i roto i te hoê faaapu paka fatata hoê matahiti te maoro. I te hoê po a faauta ˈi matou i te raau taero i nia i te poti, ua pupuhihia matou e te hoê pǔpǔ enemi. Ua ouˈa vau i roto i te pape no te ora mai. I muri aˈe i tera tupuraa ua horo ê au i Marite.

 I to ˈu taeraa ˈtu i Marite ua tamau vau i te hoo i te raau taero e ua rahi atu â to ˈu fifi. I te 19raa o to ˈu matahiti, ua tapeahia vau i te fare auri no te ohipa eiâ e taparahi taata. I ǒ, ua faaô atu vau i roto i te hoê pǔpǔ taparahi taata e te ohipa ino mau. Ei faahopearaa, ua afaihia vau i te tahi atu fare auri i Lewisburg i Pennsylvanie.

 I reira ua ino roa ˈtu â to ˈu haerea. No to ˈu mau tatau mea ohie roa no ˈu ia faaô atu i roto i te hoê â pǔpǔ taparahi taata. Ua ino roa ˈtu â to ˈu huru, taputô noa te ohipa. I te hoê mahana i roto i te aua o te fare auri ua tupu te aroraa i rotopu i te mau pǔpǔ taparahi taata, e tei roto atoa vau! Mea taehae roa matou! No te tapea i te taputôraa ua taora mai te mau tiai i te mǎhu lacrymogène. I muri mai, ua afaihia vau i te hoê vahi e tuuhia ˈi te mau mau auri ino mau. E taata riri hanoa vau e te parau ino. Mea au atoa na ˈu e taparahi i te taata!

 I te vahi i afaihia vau ua opani etaetahia vau ia haere i rapae, haamata ˈtura vau i te taio te Bibilia. I muri mai, ua horoa mai te hoê tiai i te buka E nehenehe oe e ora e a muri noa ˈtu i roto i te paradaiso i nia i te fenua nei. a A taio ai i tera buka haapiiraa, Haamanaˈo atura vau i te mau mea atoa ta ˈu i haapii i to ˈu apîraa, i reira to ˈu iteraa ua ino roa tu ˈu oraraa! Haamanaˈo atoa ˈtura vau i to ˈu utuafare, ua riro mai hoi e piti o to ˈu mau tuahine ei Ite no Iehova. Ua na ô vau ia ˈu iho: “E ora raua e a muri noa ˈtu, e o vau ïa!” I reira to ˈu faaoti-papu-raa e taui roa i to ˈu haerea!

 Ua hinaaro ra vau i te tauturu no te rave i tera mau tauiraa, ua taparu vau ia Iehova ia tauturu mai ia ˈu. I muri mai, ua papai au i te amaa i Marite no te ani i te hoê haapiiraa Bibilia. Ua faatae atu ïa te amaa i ta ˈu aniraa i te hoê amuiraa piri i te fare tapearaa. I taua taime ra, o te fetii anaˈe te nehenehe e farerei ia ˈu, ua hapono noa mai ïa te hoê taeae i te mau rata faaitoito mau e te tahi o ta tatou mau papai tei faaitoito mau ia ˈu ia taui.

 No te haere i mua i te pae varua, ua rave au i te faaotiraa e faarue i ta ˈu pǔpǔ taparahi taata. I te mea tei te hoê â vahi mâua te faatere o te pǔpǔ, faaite atura vau ia ˈna i to ˈu hinaaro e riro ei Ite no Iehova. Ua maere roa vau i ta ˈna pahonoraa, ua na ô mai oia: “Hinaaro oe? Na reira ïa, eita vau e na nia atu i te Atua! Maitai e ere i te parau haavare, ua taa ia oe eaha te tupu ia faarue oe i te pǔpǔ.”

 I roto i tera piti matahiti i muri mai, ua itehia te mau tauiraa i nia i to ˈu huru. No to ˈu haerea maitai, aita faahou ïa te mau tiai e tamau mai i te ponao rima ia haere au e hapu i te pape. Ua faaitoito atoa mai te hoê tiai ia tamau i te rave i tera mau tauiraa. E i te matahiti hopea i te fare tapearaa, ua faahoˈihia vau i roto i te hoê aua aita i rahi te opanipaniraa. I 2004, I muri aˈe 10 matahiti tapearaa, ua matara mai au e faahoˈihia ˈtura vau i Mehiko.

 I to ˈu taeraa ˈtu i Mehiko, ua imi au i te hoê Piha a te Basileia a te mau Ite no Iehova. Ua apiti au i ta ˈu putuputuraa matamua i roto i to ˈu ahu mau auri. E noa ˈtu te reira, ua farii maitai te mau Ite no Iehova ia ˈu. A ite ai i to ratou hamani maitai, taa ˈtura ia ˈu e Kerisetiano mau ratou. (Ioane 13:35) I tera putuputuraa, ua pûpû mai te mau matahiapo i te hoê haapiiraa Bibilia. E i te 3 no Tetepa 2005, ua bapetizohia vau ei Ite no Iehova!

 I Tenuare 2007, ua rave au i te taviniraa pionie tamau, e poro e e haapii ïa vau i te taata e 70 hora i roto i te avaˈe. I 2011, ua faatuitehia vau i te Haapiiraa Bibilia no te mau taeae taa noa (matauhia i teie nei, te Haapiiraa no te feia poro i te parau apî oaoa o te Basileia). Ua tauturu rahi mai teie haapiiraa ia ˈu ia amo maite i ta ˈu hopoia i roto i te amuiraa.

 I 2013, ua faaipoipo vau ia Pilar. I te tahi taime, e parau mai o ˈna ia ˈu ma te ata, mea fifi roa no ˈna ia tiaturi i ta ˈu i faatia no nia i to ˈu huru na mua ˈˈe. Eita roa ˈtu vau e hinaaro e hoi i muri! Ia ite au ia ˈu i teie mahana, e haapapuraa te reira e nehenehe te Bibilia e taui roa i te hoê taata.—Roma 12:2.

 Ua putapû roa vau i ta Iesu mau parau i roto i te Luka 19:10. Ua haere mai hoi oia e imi e e faaora i tei moˈe! I teie nei, e ere faahou vau i te taata tei moˈe e eita atoa vau e taparahi faahou i te taata! Maoti te Bibilia, e fa ta ˈu i roto i to ˈu oraraa, e taata faatupu hau noa vau e te mea faufaa roa ˈˈe, e auhoaraa piri roa to ˈu e o Iehova!