•  Mai te aha to oe huru?

•  No te aha mea faufaa?

•  Ta oe e nehenehe e rave

•  No te ite atu â

•  To ratou manaˈo

•   Manaˈo e maitai noa te mau mea atoa

   “E tutava noa vau i te oaoa noa e i te ore e riri. No te aha e ore ai e faaite i te mata oaoa i te mau mahana atoa?”—Valerie.

•   Manaˈo e mea ino te mau mea atoa

   “Ia tupu anaˈe te tahi mea maitai, oioi roa vau i te manaˈo e moemoeâ noa tera! E ere i te mea mau.”—Rebecca.

•   Te feruriraa tano

   “Mai te peu e manaˈo vau e maitai noa te mau mea atoa, e toaruaru vau ia ore te mau mea e tupu maitai! E mai te peu e manaˈo vau e mea ino te mau mea atoa, eita ïa vau e oaoa noa ˈˈe! Area te hoê feruriraa tano, e tauturu mai ïa ia hiˈo i te tupuraa mau o te mau mea atoa.”—Anna.

 Te parau ra te Bibilia: “Area te taata e aau oaoa to ˈna, e tamaaraa noa ïa ta ˈna.” (Maseli 15:15) E oaoa aˈe te feia o te ore e manaˈo mea ino te mau mea atoa e o te tutava i te hiˈo i te mau vahi maitai o te oraraa. Mea ohie atoa no ratou ia faahoa i te taata. Parau mau, o vai hoi te hinaaro e amui atu i te taata o te ore e ataata e o te manaˈo ino noa?

 Noa ˈtu e taata oe o te manaˈo e maitai noa te mau mea atoa, te vai ra te mau tupuraa fifi ta oe e nehenehe e farerei. Teie te tahi mau hiˈoraa:

•   I roto i te mau vea, e faaroo paha oe i te parau no nia i te tamaˈi, te ohipa totoa aore ra te mau ohipa ino huru rau.

•   E tupu paha te tahi fifi i roto i to oe utuafare.

•   Eita e ore, e paruparu atoa to oe.

•   E haamauiui atu paha te tahi hoa ia oe.

 Eiaha e manaˈo eita teie mau fifi e tupu e eiaha atoa e tiatonu i nia i te reira. A faaite râ i te hoê feruriraa tano. Ma te na reira, e haapae ïa oe i te mau manaˈo ino e toaruaru roa ˈi oe.

•   A haamanaˈo e paruparu atoa to oe.

   Te parau ra te Bibilia: “Aita mau e taata parau-tia i te fenua nei, o tei rave i te parau maitai, e aore roa e hara.” (Koheleta 7:20, Te Bibilia Moˈa ra) Ia hape oe, te faaite ra te reira e taata noa oe, e ere râ te auraa mea faufaa ore oe.

   E nafea ia faaite i te feruriraa tano? Parau mau, e paruparu to oe, e nehenehe râ oe e haamaitai i to oe huru. A haamanaˈo râ, e ere oe i te taata tia roa. Te na ô ra te tahi taurearea o Caleb te iˈoa: “E tutava vau i te ore e tiatonu i nia i to ˈu mau paruparu. E huti mai râ vau i te haapiiraa no te haamaitai i to ˈu huru.”

•   Eiaha e faaau ia oe i te tahi atu.

   Te parau ra te Bibilia: “Eiaha tatou e faateitei noa, e tataˈu e e feii te tahi i te tahi.” (Galatia 5:26) E nehenehe oe e inoino a hiˈo ai i te mau hohoˈa i nia i te reni faahoaraa o te mau tupuraa aita oe i titau-manihini-hia. E nehenehe oe e hiˈo ino roa i to oe mau hoa.

   E nafea ia faaite i te feruriraa tano? A farii i te manaˈo eita oe e titau-manihini-hia i te mau taime atoa. Taa ê atu i te reira, eita te mau hohoˈa i nia i te reni faahoaraa e faaite i te huru mau o te oraraa o te tahi taata. Te na ô ra te tahi tamahine o Alexis te iˈoa: “I nia i te reni faahoaraa, e faaite noa te taata i te mau mea faahiahia o to ratou oraraa, eiaha râ i to ratou oraraa mau i te mau mahana atoa.”

•   A faatupu i te hau, i roto iho â râ i to oe utuafare.

   Te parau ra te Bibilia: “A tutava i te rave i te mea e tia ia outou tataitahi no te parahi hau noa.” (Roma 12:18) Eita oe e nehenehe e taui i te taata, e nehenehe râ oe e taui i to oe huru i mua i ta ratou e rave. E nehenehe oe e faaoti i te riro ei taata o te faatupu i te hau.

   E nafea ia faaite i te feruriraa tano? Ia tupu te fifi i roto i te utuafare, a faaoti papu i te ore e faarahi roa ˈtu. A parahi hau noa mai ta oe e rave e te mau hoa. Te na ô ra te taurearea ra o Melinda te iˈoa: “E taata tia ore tatou paatoa! Ia tae i te hoê mahana, e haamauiui iho â tatou ia vetahi ê. Te mea faufaa, o ta tatou ïa e rave i tera taime. E faatupu anei tatou i te hau aore ra eita.”

•   A haapii i te faaite i te mauruuru.

   Te parau ra te Bibilia: “Ia mauruuru atoa outou.” (Kolosa 3:15) Mai te peu e aau mauruuru to oe, e tiatonu noa oe i nia i te mau mea maitai o to oe oraraa, eiaha râ i nia i te mau fifi.

   E nafea ia faaite i te feruriraa tano? E farerei iho â oe i te fifi, eiaha râ e haamoˈe i te mau mea maitai e tupu i roto i to oe oraraa. Te na ô ra te taurearea ra o Rebecca: “I te mau mahana atoa, e papai au i te tahi manaˈo maitai. E haamanaˈo mai te reira, noa ˈtu to ˈu mau fifi, te vai ra iho â te tahi mea maitai e nehenehe au e feruri i nia iho.”

•   A hiˈopoa mai te aha te huru o to oe mau hoa.

   Te parau ra te Bibilia: “E ino te haerea maitai i te amuimuiraa i te feia iino.” (Korinetia 1, 15:33) Mai te peu e amuimui oe i te feia o te faaino e o te manaˈo ino noa, e pee atoa mai tera huru i nia ia oe!

   E nafea ia faaite i te feruriraa tano? Ia farerei to oe mau hoa i te fifi rahi, e peapea e e hepohepo paha ratou i tera taime. A tauturu ia ratou, eiaha râ te reira ia riro ei fifi no oe! Te na ô ra Michelle: “Eiaha e amuimui i te feia anaˈe e manaˈo ra e mea ino te mau mea atoa.”

 Te parau ra te Bibilia te ora nei tatou i te hoê “tau ino mau . . . e te fifi ia faaruru.” (Timoteo 2, 3:1) Mea fifi anei no oe ia tapea i te hoê feruriraa maitai i roto i te hoê ao mea rahi te fifi na te ao nei? A taio i te tumu parau “No te aha ua rahi roa te mauiui?”