E. Te faaite ra te Bibilia e te tahi mau tupuraa e te faaroo ra te Atua i ta tatou mau pure. Te parau ra te Bibilia: “E haamâha oia [te Atua] i te hinaaro o te feia e mǎtaˈu ra ia ˈna. E faaroo oia i ta ratou aniraa i te tauturu, e e faaora oia ia ratou.” (Salamo 145:19) Ia hinaaro râ oe ia faaroo te Atua i ta oe mau pure, e pee ïa oe i ta ˈna mau titauraa.

Ta te Atua e titau ra

•   Ia pure i te Atua, eiaha râ ia Iesu, ia Maria, te mau peata, te mau melahi aore ra te mau hohoˈa. O te Atua ra o Iehova anaˈe “Tei faaroo i te pure.”—Salamo 65:2.

•   Ia pure ia au i te hinaaro o te Atua aore ra ta ˈna mau faaueraa i roto i te Bibilia.—Ioane 1, 5:14.

•   Ia pure na roto i te iˈoa o Iesu. Te faaite ra ïa oe e te faatura ra oe ia Iesu. Ua parau o ˈna: “Aita roa e taata e tae i te Metua ra, na roto noa râ ia ˈu.”—Ioane 14:6.

•   Ia pure ma te feaa ore e ia ani ia faarahi mai i to oe faaroo.—Mataio 21:22; Luka 17:5.

•   Ia pure ma te aau haavare ore e te haehaa. Te parau ra te Bibilia: “Teitei noa ˈtu Iehova, te ite nei râ oia i te feia haehaa.”—Salamo 138:6.

•   Ia tamau noa i te pure. Ua parau Iesu: “A tamau i te ani, e horoahia mai.”—Luka 11:9.

Ta te Atua e ore e haapao

•   To oe fenua aore ra nunaa. “E ore te Atua e maitiiti i te taata, i roto râ i te mau nunaa atoa, e farii oia i te taata o te mǎtaˈu ia ˈna e o te rave i te mea tia.”—Ohipa 10:34, 35.

•   Te huru e pure ai oe. E nehenehe oe e parahi, e tipapa, e tuturi aore ra e tia noa ia pure oe i te Atua.—Paraleipomeno 1, 17:16; Nehemia 8:6; Daniela 6:10; Mareko 11:25.

•   Ia pure oe ma te reo puai aore ra i roto i to oe aau. E faaroo te Atua i te mau pure i roto i te aau noa ˈtu aita vetahi ê e faaroo ra.—Nehemia 2:1-6.

•   Mea iti anei aore ra mea rahi ta oe mau haapeapearaa. Te faaitoito mai ra te Atua: “A huri . . . i to outou mau ahoaho atoa i nia ia ˈna, no te mea te haapeapea mai ra oia no outou.”—Petero 1, 5:7.