“E teie nei, ei te Atua ra o te nehenehe e faatupu hau ê roa ˈtu i ta tatou e ani aore ra e manaˈo ia au i to ˈna puai o te ohipa ra i roto ia tatou, ei ia ˈna te hanahana.”—Ephesia 3:20, 21, Huriraa o te ao apî.

 “E teie nei, ei ia ˈna, ei te hau ê roa ˈtu ta ˈna ia rave, i te mau mea atoa ta tatou e ani nei e ta tatou e manaˈo nei, mai te mana e puai i roto ia tatou nei, ei ia ˈna te haamaitai.”—Ephesia 3:20, 21, Te Bibilia Moˈa ra.

 Te faataa ra te aposetolo Paulo i to ˈna tiaturiraa e e nehenehe ta te Atua e pahono i te mau pure e te mau aniraa a ta ˈna mau tavini a manaˈo ai ratou eita paha e manuïa. E nehenehe ta ˈna mau pahonoraa e hau ê i tei manaˈohia aore ra i tei tiaihia e ratou.

 “E teie nei, ei te Atua ra o te nehenehe . . . ia au i to ˈna puai o te ohipa ra i roto ia tatou.” O te Atua ra o Iehova a o te faataahia i roto i te irava 21. Ta Paulo ïa i papai: “Ei ia ˈna te hanahana na roto i te amuiraa e na roto i te Mesia ra o Iesu.” Hau atu â, e nehenehe te Atua e horoa mai i te puai aore ra te itoito hinaarohia no te rave i to ˈna hinaaro.—Philipi 4:13.

 I roto i te irava 20, te faataa ra te aposetolo Paulo i te tahi ohipa taa ê, oia hoi e nehenehe ta Iehova e tauturu i ta ˈna mau tavini. No nia i te parau “ei te Atua ra o te nehenehe,” te na ô ra te hoê faahororaa: “Aita te irava e parau noa e e nehenehe ta te Atua e rave i te tahi mea aore ra e rave iho â o ˈna, aita, e mana iho â to ˈna i te na reira.” E hinaaro te hoê hoa e tauturu ia tatou, eita râ ta ˈna e nehenehe e na reira noa, area Iehova e nehenehe noa ta ˈna e aupuru i ta ˈna mau tavini e e pahono i ta ratou mau pure. E tei ia ˈna anaˈe te puai e te mana otia ore.—Isaia 40:26.

 “Ei te Atua ra o te nehenehe e faatupu hau ê roa ˈtu i ta tatou e ani aore ra e manaˈo.” E nehenehe ta Iehova e horoa hau atu aore ra “hau ê roa ˈtu” no ta ˈna mau tavini. E nehenehe ta ˈna e tauturu i te hoê faito aita e otia to to ˈna aau horoa noa.

 Te haapii mai ra te parau “hau ê roa ˈtu i ta tatou e ani aore ra e manaˈo” i te tahi atu tuhaa no nia i tera irava. I to Paulo parauraa “hau ê roa ˈtu i ta tatou e ani aore ra e manaˈo,” te hinaaro ra o ˈna ia taa i te mau Kerisetiano e e nehenehe ta te Atua e tauturu ia ratou hau atu i tei tiaihia e ratou. Teie ta Te Bibilia Moˈa ra e parau ra no te irava 20: “E teie nei, ei ia ˈna, ei te hau ê roa ˈtu ta ˈna ia rave, i te mau mea atoa ta tatou e ani nei e ta tatou e manaˈo nei.” I te tahi mau taime, e nehenehe te mau Kerisetiano e manaˈo e mea rahi roa to ratou fifi e eita e nehenehe e faaafaro. Aore ra aita paha ratou e taa eaha te parau i roto i ta ratou pure. Tera râ, aita Iehova i taotia i to ˈna haroˈaroˈa aore ra to ˈna aravihi no te tauturu. I te taime ta ˈna i faataa, e faaafaro oia i te mau fifi atoa. E e rave oia i te reira o ta ratou i ore i manaˈo aore ra eita e haere. (Ioba 42:2; Ieremia 32:17) A tiai noa ˈi, te horoa ra oia na ratou i te puai no te faaoromai tamau ma te oaoa!—Iakobo 1:2, 3.

 Te buka a to Ephesia, e rata teie ta te aposetolo Paulo i papai i te mau Kerisetiano tei ora i te oire o Ephesia i Asia iti, o te parauhia i teie mahana o Turekia. I roto i ta ˈna rata, ua papai Paulo i te mau manaˈo ta ˈna i faahiti i roto hoê o ta ˈna pure no ratou. (Ephesia 3:14-21) Ua pure o ˈna ia tutava ratou i te pee maite i te huru feruriraa e ohipa î i te here ta Iesu i faaite, e ia ite i te here o Iesu. E nehenehe ïa te mau Kerisetiano atoa e faaohipa i te reira. Ua faaoti ïa Paulo i ta ˈna pure ma te arue i te Atua e ma te faahiti i te mau parau itehia i roto i te Ephesia 3:20, 21.

 A mataitai i teie video o te faataa poto noa i te buka Ephesia.