Yesaia 43:1-28
43 Afei asɛm a Yehowa,Nea ɔbɔɔ wo, O Yakob, nea ɔnwenee wo, O Israel,+ aka ni;
“Nsuro, na magye wo.+
Mabɔ wo din afrɛ wo.
Woyɛ me dea.
2 Sɛ wutwa nsu a, medi w’akyi;+Wofa nsubɔnten mu a, ɛremfa wo.+
Sɛ wofa ogya mu a, ɛrenhyew wo,Na ogyaframa renhyew wo ho nwi mpo.
3 Efisɛ mene Yehowa wo Nyankopɔn,Israel Kronkronni no, wo Gyefo no.
Mede Egypt ayɛ agyede ama wo,Na mede Etiopia ne Seba asi w’ananmu.
4 Wosom bo wɔ m’ani so+ nti,Midi wo ni, na medɔ wo.+
Ɛno nti mede nnipa besi w’ananmu,Na mede aman asi wo nkwa* ananmu.
5 Nsuro, efisɛ meka wo ho.+
Mede w’asefo* befi apuei fam aba,Na maboaboa wo ano afi atɔe fam.+
6 Mɛka akyerɛ atifi fam sɛ, ‘Gyaa wɔn!’+
Na maka akyerɛ anaafo fam sɛ, ‘Nnye wɔn nka hɔ.
Fa me mma mmarima fi akyirikyiri bra, na fa me mma mmea fi asaase ano bra,+
7 Obiara a me din da no so,+Ne nea mabɔ no de ahyɛ me ho anuonyam,Nea manwene no, ne nea mayɛ no biara.’+
8 Fa ɔman a wɔwɔ aniwa nanso wɔn ani afura no bra,Ne wɔn a wɔwɔ aso nanso wɔn aso asiw no.+
9 Ma aman nyinaa nhyia wɔ faako,Na amanaman mmoaboa wɔn ho ano.+
Wɔn mu hena na obetumi aka eyi?
Anaa wobetumi ama yɛate kan nneɛma* no ho asɛm?+
Ma wɔmfa wɔn adansefo mmra na wɔmfa mmebu wɔn ho bem,Anaasɛ ma wɔnte na wɔnka sɛ, ‘Ɛyɛ nokware!’”+
10 Yehowa asɛm ni: “Mone m’adansefo,+Yiw, m’akoa a mapaw no,+Na ama moahu, na moagye me adi,*Na moahu sɛ me ara mene no.+
Wɔnnwenee Onyankopɔn bi m’anim,Na m’akyi nso, obi nni hɔ.+
11 Me ara mene Yehowa,+ na m’akyi no, ogyefo biara nni hɔ.”+
12 Yehowa asɛm ni: “Me na mekae, na migyee nkwa, na mema wɔtee,Bere a na onyame foforo biara nni mo mu no.+
Enti mone m’adansefo, na mene Onyankopɔn.+
13 Bio nso, mete sɛnea mete bere nyinaa;+Obiara rentumi nhwim biribiara mfi me nsam.+
Sɛ mekeka me ho a, hena na obetumi asiw me kwan?”+
14 Yehowa, mo Gyefo,+ Israel Kronkronni+ no asɛm ni:
“Mo nti, mɛsoma akɔ Babilon akobubu apon akyi nnade nyinaa,+Na ahoyeraw nti, Kaldeafo a wɔte po so ahyɛn mu no besu buei! buei!+
15 Mene Yehowa, mo Kronkronni no,+ Israel Bɔfo+ no, mo Hene+ no.”
16 Nea YehowaA ɔpae kwan to po mu,Nea oyi kwan to nsu a ɛrebu fa so mu,+
17 Nea ɔma ɔko nteaseɛnam ne apɔnkɔ fi adi,+Na ɔma asraafodɔm ne mmarima a wonim ko fi adi no aka ni:
“Wɔbɛda fam, na wɔrensɔre.+
Wobedum wɔn, wobedum wɔn te sɛ nea wodum ntamaban a ɛredɛw.”
18 “Monnkae kan nneɛma no,Na munnnwen tete nneɛma ho.
19 Hwɛ! Mereyɛ ade foforo bi;+Seesei mpo ɛrepue.
Munhu anaa?
Mede ɔkwan bɛto sare so,+Na mama nsubɔnten asen anwea pradadaa so.+
20 Wuram mmoa bɛhyɛ me anuonyam,Sakraman ne nsohori,Efisɛ mɛma nsu aba sare so,Na nsubɔnten asen anwea pradadaa so,+Na me man, nea mapaw no+ no, anom,
21 Ɔman a manwene wɔn afa no,
Sɛnea ɛbɛyɛ a wɔbɛka m’ayeyi akyerɛ.+
22 Nanso womfrɛɛ me, O Yakob,+Efisɛ me ho afono wo, O Israel.+
23 Womfaa oguan mmɔɔ ɔhyew afɔre mmaa me,Na womfaa w’afɔre nhyɛɛ me anuonyam.
Menhyɛɛ wo sɛ fa akyɛde brɛ me,Na menhyɛɛ wo sɛ fa ɛhyɛ* brɛ me, memfa nhyɛɛ wo brɛ.+
24 Womfaa wo sika ntɔɔ sibiri huamhuam* biara mmaa me,Na wommaa w’afɔre srade mmee me.+
Na mmom wo bɔne ayɛ adesoa wɔ me so,Na wo mfomso ama mabrɛ.+
25 “Me, me na mepopa wo mmarato,*+ me din nti.+Na merenkae wo bɔne bio.+
26 Kaakae me; ma yenhyia nni asɛm;Ka w’asɛm na fa kyerɛ sɛ wudi bem.
27 Wo nana a odi kan no yɛɛ bɔne,Na wɔn a wɔkasa ma wo* no atew me so atua.+
28 Enti megu kronkronbea hɔ mpanyimfo no ho fĩ,Na mede Yakob bɛma ɔsɛeNa mama wɔatwa Israel adapaa.+
Ase Hɔ Nsɛm
^ Anaa “wo kra.”
^ Nt., “w’aba.”
^ Ebetumi akyerɛ nneɛma a ebedi kan aba daakye.
^ Anaa “na mode mo werɛ ahyɛ me mu.”
^ Hwɛ Nkyerɛkyerɛmu afã hɔ.
^ Ɛyɛ afifide bi a ɛyɛ huam. Nanso obiara nhyɛ da nnim afifide pɔtee a ɛyɛ.
^ Anaa “w’atuatew.”
^ Ebetumi akyerɛ wɔn a wɔkyerɛkyerɛ Mmara no.
