“Te Atua . . . ka ‵solo keatea ne ia a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae. Ko palele atu a mea mua.”​—Fakaasiga 21:3, 4, Te Tusi Tapu o te Lalolagi Fou.

Galuega aoga kae fakafiafia.​—Isaia 65:21-23.

Ka se toe ai ne masaki io me ko logo‵maega.​—Isaia 25:8; 33:24.

Se olaga fakafiafia ki te se-gata-mai mō kāiga mo taugasoa.​—Salamo 37:11, 29.

Ao, ona ko pogai konei e lua:

• E mafai ne te Atua o fakataunu a te tautoga tenā. I te Tusi Tapu, ko Ieova fua te Atua e fakasino atu ki ei e pelā me e “Malosi Katoatoa,” me e seai se tapula ki tena ‵mana. (Fakaasiga 15:3) Tela la, e mafai eiloa o fakataunu katoatoa ne ia tena tautoga ke ‵fuli te ‵tou lalolagi ke tai ‵lei atu. E pelā mo muna i te Tusi Tapu, “e mafai ne te Atua o fai a mea katoa.”​—Mataio 19:26.

• E manako malosi te Atua ke fakataunu a te tautoga tenā. E pelā mo Ieova, e manako malosi eiloa a ia ke toe tuku atu te ola ki tino ‵mate.​—Iopu 14:14, 15, Tusi Tapu.

  E fakaasi mai foki i te Tusi Tapu me i te Tama a te Atua, ko Iesu, ne faka‵lei ne ia a tino ma‵saki. Kaia ne fai ei ne ia te mea tenā? Me ne manako a ia ki ei. (Maleko 1:40, 41) Ne fakaasi mai eiloa ne Iesu i se auala ‵lei katoatoa a uiga o tena Tamana, e auala i tena fia fesoasoani malosi atu ki tino kolā e ma‵nako ki se fesoasoani.​—Ioane 14:9.

  Tela la, ko fakamautinoa ei ne tatou me e ma‵nako a Ieova mo Iesu o fesoasoani mai ke maua ne tatou se olaga fiafia i aso mai mua!​—Salamo 72:12-14; 145:16; 2 Petelu 3:9.