Ne ‵kese te tulaga faigata ne fepaki mo Nicolas mo Céline. Ne talia ne lāua te lā tofiga fou mai te ofisa lagolago o Falani ke olo atu lāua ki se fakapotopotoga fou. Ne fai mai lāua: “A te vaitaimi mai tua o te taimi fakafiafia i te kamataga ne faigata ‵ki me ne ‵nofo mafau‵fau māua ki mā taugasoa. Ne seki ‵pili malosi te mā va mo taina i te fakapotopotoga fou.” a E pelā mo tulaga faiga‵ta konā, e mafai pefea o manuia koe māfai ko fanatu ki se fakapotopotoga fou? Ne a mea e mafai o fai ne nisi tino ke fesoasoani atu? Kae ne a fakamalosiga faka-te-agaga ka maua ne koe kae fakaaoga i tau fakapotopotoga fou?

FAKATAKITAKIGA E FA KA AOGA KI A KOE KE FAKAFESAGAI ATU KI TE TULAGA FAIGATA

1. Fakalagolago ki a Ieova. (Sala. 37:5) Ne tiaki ne Kazumi, i Tiapani, te fakapotopotoga telā ne kau a ia ki ei i tausaga e 20 me ko ‵tau o galue tena avaga i se isi koga. Ne tuku atu pefea ne ia “[ana] ala ki a Ieova”? Ana muna: “Ne ‵ligi atu ne au ki a Ieova a mea katoa i toku loto ko mea katoa ne polepole au i ei, te sē sologa, mo te manavase. I taimi katoa e fai au penā, ne tuku mai ne ia ki a au te malosi e manakogina ne au.”

E mafai pefea o momea aka tou fakalagolago ki a Ieova? E pelā eiloa mo te lakau telā e manako ki vai mo niutulisini mai te one ke mafai o ola, e ‵tau foki o fakamalosi aka te ‵tou fakatuanaki ko te mea ke mafai o ola. Ne iloa aka ne Nicolas, telā ne sae muamua mai, me i te mafaufau ‵loto ki tala o Apelaamo, Iesu, mo Paulo—ko tāgata kolā ne talia ne latou a mea faiga‵ta e uke ko te mea ke fai te loto o te Atua—ne fakamalosi aka i ei tena loto talitonu ki te fesoasoani o Ieova. A te polokalame masani o sukesukega ki te Tusi Tapu ka se fesoasoani mai fua ke fakafesagai atu tatou ki fakama‵fuliga o te olaga  kae ka fai ei ke maua ne koe a meaalofa faka-te-agaga kolā e mafai o fakaaoga ne koe ke fesoasoani atu ki nisi tino i tau fakapotopotoga fou.

2. Kalo kea‵tea mai te faiga o fakatusatusaga. (Fai. 7:10) I te fanatuga a Jules mai Benin ki Amelika ne ‵kese ‵ki a tuu mo aganuu i te fenua fou tenā. “Ne mafaufau au me e ‵tau o fakamatala atu ne au ki so se tino e fetaui mo au a mea katoa e uiga ki a au,” ko ana pati. Ona ko te ‵kese o te mea tenei mo mea ne masani a ia ki ei, ne kamata o ‵vae kea‵tea a ia mai tino i te fakapotopotoga. I te taimi ko masani faka‵lei a ia mo taina mo tuagane, ne ‵fuli ei tena kilokiloga. Ne fai mai a ia: “I toku talitonu me i so se koga e ‵nofo tatou i ei i te lalolagi, e ‵pau eiloa a tino katoa. E ‵kese fua te auala e fai‵pati ei latou mo olotou faifaiga. Se mea tāua eiloa ke talia a faifaiga e fai ne tino.” Tela la, kalo kea‵tea mai te fakatusatusa a mea e fai i tau fakapotopotoga fou mo tau fakapotopotoga mua. Ne fai mai a Anne-Lise se tuagane paenia e tokotasi: “Ne seki fanatu au mo te fakamoemoega ke ‵pau a mea e fai i taku fakapotopotoga mua mo taku fakapotopotoga fou. Ne fanatu au ke tauloto ki mea ‵fou.”

E se ‵tau foki mo toeaina o fai a fakatusatusaga mo olotou fakapotopotoga mua. E se masei ke fakagalue a auala kese‵kese e fai ei a mea. Se mea poto eiloa ke tauloto ki mea e uke e uiga ki te koga fou tenā a koi tuai o fai ne ou manatu ki ei. (Fai. 3:​1, 7e) Se mea ‵lei ke akoako a tino e auala i tau fakaakoakoga i lō te faimālō atu ou manatu ki tino i te fakapotopotoga.—2 Koli. 1:24.

3. Kau malosi ki polokalame a tau fakapotopotoga fou. (Fili. 1:27) Ke fanatu ki se koga fou e manakogina a taimi mo galuega e uke, kae e tāua ‵ki ke kau ‵tonu atu ki fakatasiga a te fakapotopotoga mai te kamataga eiloa. Kafai e se fetaui faeloa koe mo tino i tau fakapotopotoga fou, ka mafai pefea o fesoasoani atu latou ki a koe? A Lucinda, telā ne olo atu mo ana tama fāfine e tokolua ki se fakai lasi i Afelika ki Saute, ne fai mai: “Ne fai mai se manatu ke galue malosi au i te fakapotopotoga, ke ga‵lue tasi mo nisi tino i te galuega talai, kae fai oku tusaga i fakatasiga. Ne fakaavanoa foki ne matou te motou fale ke fai i ei a fakatasiga mō te galuega talai.”

“A te ga‵lue fakatasi” i polokalame faka-te-agaga mo taina mo tuagane i tau fakapotopotoga fou se auala ‵lei ke fakamalosi aka ei te “fakatuanaki telā e maua mai te tala ‵lei.” Ne maua ne Anne-Lise, telā ne sae muamua mai a fakamalosiga mai toeaina ke taumafai ke talai mo tino katoa. Ne a mea ne iku mai ei? “Ne iloa fakavave ne au me tenei te ‵toe auala ‵lei ke aofia malosi i polokalame a te fakapotopotoga,” ko ana pati. E se gata i ei, a te kau atu ki polokalame e pelā mo te ‵fuluga mo te faitega faka‵lei o te Fale Tapuaki se fakaasiga me ko taku nei ne koe te fakapotopotoga tenā me ko tau fakapotopotoga. Ko te lasi o te aofia o koe i ei, ko te vave foki o fai koe pelā me se vaega o tou kāiga faka-te-agaga.

4. Ati aka a va fakataugasoa ‵fou. (2 Koli. 6:​11-13) A te fakaasi atu o te fiafia tonu ki se tino ko te ‵toe auala ‵lei ke fai taugasoa mo tino, tela la, ke fakaavanoa a taimi mai mua kae mai tua o  fakatasiga ke fanatu koe o fakamasani faka‵lei ki a latou. Taumafai malosi ke tauloto ne koe olotou igoa. Kafai e masaua ne koe a igoa o tino, e mata katakata kae faigofie ke fai‵pati atu a tino ki a koe ka fai ei ke se ma‵taku a tino i a koe kae mautinoa me ka iku atu ki te mauaga o va fakataugasoa ‵pili ‵ki.

I lō te manavase i te mea ma se talia ne latou koe, fakaavanoa a taimi ke fakamasani faka‵lei ou taina mo tuagane ki a koe. Ke fai te mea ne fai mai ne Lucinda, “Ko ‵pili atu nei motou va fakataugasoa, ona ko te ga‵sue muamua matou o ‵kami mai a nisi tino ki te motou fale.”

“KE FAKATAUTALIA NE KOUTOU TE SUĀ TINO”

A te ulu atu ki se Fale Tapuaki e ‵fonu i tino ‵fou e mafai o faigata ‵ki ki nisi tino. Tela la, ne a au mea ka fai ke fesoasoani atu ki tino ‵fou? “Ke fakatau talia ne koutou te suā tino,” ko pati fakamalosi a Paulo, “e pelā eiloa mo Keliso ne talia ne ia koutou.” (Loma 15:7) Mai te fakaakoako ki a Keliso, e mafai ne toeaina o fesoasoani atu ki tino ‵fou ke se ‵mā. (Onoono ki te pokisi “ Mea Kolā ka Fesoasoani Atu ke Manuia Koe ma Fanatu ki se Fakapotopotoga Fou.”) Kae e mafai ne tino katoa i te fakapotopotoga, e aofia i ei a tama‵liki, o fesoasoani ki tino ‵fou ke se ‵mā.

A te talia ne tatou a nisi tino e aofia i ei te fakaasiatuga o te uiga talimalo mo te fesoasoani atu ki nisi tino. E pelā mo te tuagane e tokotasi, ne fakaavanoa ne ia ana taimi tāua ke fakamatamata se tino fou i te lotou fakai kae ke fakaasi foki ki ei a te fakaaogaga o mea fakatele‵tele i ei. Ne otia te loto o te tuagane fou i faifaiga a te tuagane tenei mo tena fesoasoani ki a ia ke fakamasani a ia ki te koga fou tenā.

SE AVANOAGA KE GASOLO KI MUA

Kafai ko matua se seakelise, e tapale kea‵tea tena pa‵kili i taimi e uke a koi tuai o fakaaoga ana kapa‵kau mo eva. I se auala tai ‵pau, kafai ko fanatu koe ki se fakapotopotoga fou, ke tapale kea‵tea so se manavasega telā e taofi ne ia koe ke mo a ma ‵fola ou kapakau kae eva atu i se auala fakatusa i te  taviniga a Ieova. “A te fanatu ki se fakapotopotoga fou se akoakoga gali ‵ki,” ko pati a Nicolas mo Céline. “A te fakamasani ki tino ‵fou mo koga ‵fou ne fai ei ke ati aka ne māua a uiga fou.” Ne fai mai ne Jean-Charles, telā ne sae mai i te kamataga, a mea aoga ne maua ne te lotou kāiga: “I te motou fakapotopotoga fou, ne ga‵solo ki mua mā tama‵liki i te feitu faka-te-agaga kae ‵pili malosi atu foki ki a Ieova. Mai tua o nai masina fua, ne talia ne te mā tama fafine ke fai ana tofiga i fakatasiga i vaiaso kae ne fai te mā tama tagata mo fai se tino talai e seki papatiso.”

Kae e a māfai e se mafai o fanatu koe ki se isi fakapotopotoga ona ko ou fakanofonofoga, e pelā mo te fanatu ki se koga e manakogina ei tino talai? Kaia e se fakaaoga ei ne koe a manatu mai luga kae ke fai tau fakapotopotoga tenā e pelā me se fakapotopotoga fou? I te taimi e fakalagolago ei ki a Ieova, ke na kau katoatoa atu ki polokalame a te fakapotopotoga mai te fai o fakatokaga ke ga‵lue tasi koe mo nisi tino i te galuega talai kae ati aka a taugasoa ‵fou io me toe fakamalosi aka a va taugasoa i te taimi nei. E mata, e mafai o taumafai koe ke fesoasoani atu ki tino ‵fou io me ko latou kolā e ma‵nako ki se fesoasoani? Ona ko te mea e fai a te alofa e pelā me ko te fakailoga o Kelisiano ‵tonu, e mautinoa me ka fesoasoani atu ke gasolo koe ki mua i te feitu faka-te-agaga. (Ioa. 13:35) E mafai o mautinoa i a koe me “i te Atua e fiafia malosi ki vaegā taulaga penā.”—Epe. 13:16.

Faitalia a tulaga faiga‵ta, ko oti ne manuia a Kelisiano e tokouke kolā ne olo atu ki se fakapotopotoga fou—kae mafai foki o fai koe penā! “A te fanatu ki se fakapotopotoga fou ne fesoasoani mai ke ‵tala toku loto ke matala ‵lei,” ko pati a Anne-Lise. Ko talitonu nei a Kazumi me i te fanatu ki se fakapotopotoga fou “ka lavea i ei ne koe te fesoasoani o Ieova i auala kolā e seki iloa muamua ne koe.” Kae pefea a Jules? Ne fai mai tou tagata: “A va fakataugasoa kolā ne ati aka ne au ne fesoasoani mai ke mo ma solopu au. Ko pili ‵ki au ki taku fakapotopotoga fou telā ko faigata foki ke tiakina ne au.”