Mea e Tauloto ne Tatou e Uiga ki te Atua Mai i Ana Pelofeta
I aso mua, ne fakaaoga ne te Atua ana pelofeta ke fakaoko atu ne latou ana fekau ki tino. E mata, e mafai o fakaasi mai ne fekau konei a te auala ke mafai o maua ne tatou a fakamanuiaga a te Atua? Ao, e mafai. Ke na onoono nei tatou ki mea e mafai ne tatou o tauloto mai pelofeta fakamaoni konei e tokotolu.
APELAAMO
A te Atua e se fakailoga tino kae e manako o fakamanuia a tino katoa.
Ne tauto atu te Atua ki te pelofeta ko Apelaamo me i “kāiga katoa o te lalolagi ka fakamanuiagina e auala i a [ia].”—Kenese 12:3.
Ne a mea e tauloto ne tatou mai i ei? A te Atua e alofa malosi mai ki a tatou, kae e manako ke fakamanuia ne ia a kāiga katoa o te lalolagi—tāgata, fāfine, mo tama‵liki—kolā e faka‵logo ki a ia.
MOSE
A te Atua e alofa fakamagalo kae e fakamanuia ne ia a tino kolā e taumafai ke iloa ne latou a ia.
Ne tuku atu ne te Atua Malosi Katoatoa ki te pelofeta ko Mose a te malosi ke fai a vavega fakaofoofogia. Kae ne ‵talo atu a Mose: “Fakaasi mai la ki a au ou auala, ko te mea ke iloa ne au a koe kae ke tumau koe i te fiafia mai ki a au.” (Esoto 33:13) Ne fiafia te Atua ki te fakamolemole a Mose, kae ne fai ne ia ke lasi tena iloa mo tena malamalama i Ana auala mo ana uiga. E pelā me se fakaakoakoga, ne tauloto ne Mose me i te Mafuaga se “Atua alofa fakamagalo kae alofa atafai.”—Esoto 34:6, 7.
Ne a mea e tauloto ne tatou mai i ei? A te Atua e manako o fakamanuia a tatou katoa—tāgata, fāfine, mo tama‵liki—māfai e taumafai tatou ke iloa faka‵lei a ia. E fakaasi mai ne ia i te Tusi Tapu a te auala ke tapuaki atu ki a ia, kae manako malosi a ia ke tuku mai ki a tatou tena taliaga mo tena fakamanuiaga.
IESU
Ne faka‵lei ne Iesu mo te alofa atafai a vaegā masaki katoa
E mafai o maua ne tatou a fakamanuiaga se-gata-mai a te Atua māfai e tauloto tatou e uiga ki a Iesu, mea ne fai ne ia, mo ana akoakoga.
E aofia i te Muna a te Atua a fakamatalaga e uke ki te olaga o Iesu mo ana akoakoga. Ne tuku atu ne te Atua ki a Iesu te ‵mana ke fai a vavega fakaofoofogia, pelā mo te faka‵leiga o tino ‵kivi, tino taliga ‵tuli, mo tino ‵pili. Ne faka‵tu foki ne ia a tino ‵mate. Tela la, ne fakaasi mai ne Iesu a fakamanuiaga kolā ka aumai ne te Atua ki tino katoa i aso mai mua. Ne fakamatala mai ne ia te auala e mafai ne tatou taki tokotasi o maua a fakamanuiaga konā: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi, e penā foki loa mo te tino telā ne uga mai ne koe, ko Iesu Keliso.”—Ioane 17:3.
A Iesu ne alofa kae atafai. Ne ualolo atu a fāfine, tama‵liki mo tino ma‵tua ki a ia ona ko tena ‵kamiga alofa: “Fakaakoako mai ki a au, me i a au e agamalu kae loto maulalo, kae ka maua ne koutou i ei se malosi fou.” (Mataio 11:29) E se pelā mo nisi tino i ona aso kolā ne fai fakamasei ne latou a fāfine, ne atafai kae āva malosi a Iesu ki fāfine.
Ne a mea e tauloto ne tatou mai i ei? Ne fakaasi mai ne Iesu a te alofa sili ki tino, kae ne tuku mai ne ia se fakaakoakoga tu ‵kese ki te auala e ‵tau o fai faka‵lei ne tatou a nisi tino.
A IESU E SE KO TE ATUA
E akoako mai te Tusi Tapu me “e tokotasi fua te ‵tou Atua” kae ko Iesu Keliso ko te avefekau loto maulalo a te Atua. (1 Kolinito 8:6) Ne fakaasi manino mai ne Iesu me i te Atua e maluga fakafia atu i a ia, kae ne uga mai ne te Atua a ia ki te lalolagi nei.—Ioane 11:41, 42; 14:28. *
^ pala. 17 Ke tauloto ki mea e tai uke atu e uiga ki a Iesu Keliso, onoono ki te vaega e 8 mo te 9 o te polosiua ko te Real Faith—Your Key to a Happy Life i te fakatuatusi i te itaneti ko te www.pr418.com.
