E pelā me ne fanau a te tagata muamua ko Atamu, tatou katoa se kāiga e tasi. E tiga eiloa e fakamoe‵moe a tino o te kāiga ke fakaasi atu te alofa mo te āva o te suā tino ki te suā tino, kae i aso nei, ko faigata ke lavea atu te vaegā alofa tenā. E se tenei te mea e manako ki ei te ‵tou Atua alofa.

“E ‵tau mo koe o alofa ki tou tuakoi e pelā mo tou alofa ki a koe eiloa.”—LEVITIKO 19:18.

“Tumau i te a‵lofa ki otou fili.”—MATAIO 5:44.

Mafaufau ki te auala e fakamatala ei ne te Atua a te alofa i tena Muna i te 1 Kolinito 13:4-7:

“A te alofa e kufaki kae atafai.”

Mafaufau aka la: E pefea ou lagonaga māfai a nisi tino e kufaki kae atafai ki a koe kae e se kaitāua ki au mea ‵se e fai?

“A te alofa e se loto masei.”

Mafaufau aka la: E pefea ou lagonaga māfai a nisi tino e fakalotolotolua io me loto ma‵sei ki a koe?

A te alofa “e se tavae ne ia a ia eiloa.”

Mafaufau aka la: E pefea ou lagonaga māfai a nisi tino e āva ki au kilokiloga kae e se fakamalosi aka faeloa ne latou a olotou manatu totino?

A te alofa “e se ita fakamoemoe.”

Mafaufau aka la: A te Atua e toka o fakamagalo ne ia a tino kolā ne agasala ki a ia kae ko sala‵mo. “Ka se ‵sala faeloa a ia ki mea ‵se, io me nofo mo te ita fakamoemoe.” (Salamo 103:9) E fia‵fia tatou māfai e fakamagalo tatou ne se tino telā ne fakalogo‵mae ne tatou. Tela la, e ‵tau mo tatou o toka o fakamagalo a nisi tino māfai ko fakalogo‵mae ne latou a tatou.—Salamo 86:5.

A te alofa “e se fiafia ki amioga ma‵sei.”

Mafaufau aka la: Kafai e ‵tupu a mea ma‵sei ki a tatou, e se ma‵nako tatou ko tino ke fia‵fia mai ona ko ‵tou logo‵maega. Tela la, e se ‵tau o fia‵fia tatou māfai e logo‵mae a nisi tino, faitalia foki loa e fai fakamasei ne latou a tatou.

Ke maua a fakamanuiaga a te Atua, e ‵tau mo tatou o a‵lofa ki nisi tino faitalia olotou tausaga, fenua io me ko talitonuga. A te auala e tasi e mafai ne tatou o fai penā, ko te fesoasoani atu ki tino kolā e manakogina se fesoasoani.