Te loto pulea e aofia ei te mafai o

• taofiofi a mea e manako ki ei

• ‵teke ou manakoga

• fakaoti se galuega e se fiafia ki ei

• fakamuamua a nisi tino

A tama‵liki kolā e lasi te loto pulea i a latou e mafai o ‵teke atu a tofotofoga, faitalia me i te tofotofoga tenā se mea fakafiafia. E ‵kese mai i ei, a tama‵liki kolā e se lava te loto pulea ka mafai o

• kaitāua malosi

• loto mafatia

• ‵pusi io me fakaaoga ‵se a meainu ma‵losi io me ko vailakau tapu

• se fia ‵kai ki mea‵kai ‵lei

Ne iloa aka i se sukesukega ne fai me i tama‵liki e lasi te loto pulea i a latou, kafai ko olo aka o ma‵tua e faigata o pokotia i masaki, i fakalavelave i mea tau tupe, io me soli ne latou a tulafono. Te sukesukega tenā ne fai ei ke fai mai te Polofesa ko Angela Duckworth mai te University of Pennsylvania penei: “E sē se mea masei māfai koe e loto pulea.”

Tauloto ke iloa o fai atu ikai kae tausi ki ei.

FAKATAKITAKIGA MAI TE TUSI TAPU: “Ke fakauiga fua tau pati ‘Ao’ ki te ao, kae ko tau ‘Ikai,’ ki te ikai.” —Mataio 5:37.

E mafai o tofotofo ne tamā tama‵liki a fakaikuga a olotou mātua mai te tagi ‵losi atu—nisi taimi i mua loa o tino. Kafai e talia ne te mātua te manakoga o te tamaliki, ka iloa ne te tamaliki me i te tagi ‵losi se auala magoi ke ‵fuli ei te ikai ki te ao.

I te suā feitu, kafai e fai atu te mātua ikai kae tausi ki ei, ko tauloto ne te tamaliki se mea tāua i tena olaga—me e se mafai o maua ne tatou a mea e ma‵nako ki ei i taimi katoa. “E ofo tatou, me i tino kolā e tauloto ne latou te akoakoga tenā ko toe tino lotoma‵lie eiloa,” ko pati a Dr. David Walsh. “E sē se faifaiga alofa māfai e akoako ne tatou a ‵tou tama‵liki me ka maua faeloa ne latou so se mea e ma‵nako latou ki ei.” *

A te fai atu ikai ki tau tamaliki i te taimi nei ka fesoasoani  ki a ia ke fai atu ikai ki a ia eiloa māfai ko matua—pelā me se fakaakoakoga, māfai ko tofotofogina a ia ke fakaaoga a vailakau tapu, ke fai amioga fakatauavaga sē ‵tau, io me aofia i nisi faifaiga fakama‵taku.

Fesoasoani ki au tama‵liki ke malamalama i ikuga ‵lei io me ma‵sei ka maua ne latou.

FAKATAKITAKIGA MAI TE TUSI TAPU: “So se mea e ‵toki ne se tino, ka tau eiloa ne ia te mea tenā.”—Kalatia 6:7.

E ‵tau o malamalama tau tamaliki me isi ne ikuga o faifaiga e fai ne ia, kae ko te sē lava o te loto pulea ka maua eiloa mai ei a ikuga fakafanoanoa. E pelā me se fakaakoakoga, kafai tau tama e kaitaua faeloa māfai e se fiafia ki se mea, ka fai fua i ei ke ‵kalo kea‵tea a tino mai i a ia. I te suā feitu, kafai e galue a ia o taofiofi tena kaitaua—io me faitali mo te kufaki i lō te oso fakavave atu—ka fia‵fia a tino ki a ia. Fesoasoani ki tau tamaliki ke malamalama me ka ‵lei atu tena olaga māfai e fakaakoako a ia o kufaki.

Akoako tau tamaliki ke iloa ne ia a mea e ‵tau o fakamuamua.

FAKATAKITAKIGA MAI TE TUSI TAPU: ‘Fakamautinoa aka a mea kolā e sili atu i te tāua.’—Filipi 1:10.

A te loto pulea e se ko te taofiofi fua ne koe a koe eiloa mai te faiga o se mea ‵se; kae e aofia i ei te faiga o se mea e ‵tau o fai, faitalia me i te mea tenei e se fakafiafia io me e se gali. Se mea tāua ke iloa ne tau tamaliki a mea kolā e ‵tau o fakamuamua kae ke fai muamua ne ia a mea kolā e sili atu i te tāua. E pelā me se fakaakoakoga, e ‵tau o fai muamua ne ia ana mea a‵koga, ka oti ko fano ei o tafao.

Fai pelā me se fakaakoakoga ‵lei.

FAKATAKITAKIGA MAI TE TUSI TAPU: “Ne tuku atu ne au se fakaakoakoga mō koutou, tela la, e pelā mo te mea ko oti ne fai ne au ki a koutou, e ‵tau foki o fai koutou penā.”—Ioane 13:15.

Ka lavea ne tau tamaliki te auala e saga atu ei koe ki tulaga sē ‵lei kae faiga‵ta. Fakaasi atu i tau fakaakoakoga me i te loto pulea ka maua mai ei a ikuga ‵lei. E pelā me se fakaakoakoga, kafai ko tofotofogina tou kufaki ne tau tamaliki, e mata ka saga atu koe mo te kaitaua io me tumau koe i te kufaki?