A te Potukau Pule se tamā potukau o Kelisiano ma‵tua ‵lei faka-te-agaga kolā e tuku mai ne latou a fakatakitakiga ki Molimau a Ieova i te lalolagi kātoa. E lua a vaega o te lotou galuega:

•   E onoono latou ki te fakatokaga o akoakoga faka-te-Tusi Tapu e auala i tusi, fakatasiga, mo akoga a Molimau a Ieova.​—Luka 12:42.

•   E tausi ne latou te galuega talai a Molimau a Ieova i te lalolagi kātoa mai te faiga ne latou o te takitakiga i te galuega talai mo te onoono faka‵lei ki te fakaaogaga o meaalofa.

 E tau‵tali atu a te Potukau Pule ki te fakatokaga ne fai ne “te kau apositolo mo toeaina i Ielusalema” i te senitenali muamua, kolā ne fai ne latou a fakaikuga tāua mō te fakapotopotoga Kelisiano kātoa. (Galuega 15:2) E pelā mo tāgata fakamaoni konā, a sui o te Potukau Pule e se ne takitaki o te motou fakapotopotoga saukātoa. E ‵kilo atu latou ki te Tusi Tapu mō fakatakitakiga, kae iloa ne latou me ne ‵tofi aka ne Ieova te Atua a Iesu Keliso e pelā me ko te Ulu o te fakapotopotoga.​—1 Kolinito 11:3; Efeso 5:​23.

 A sui o te Potukau Pule ko are Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, mo Jeffrey Winder. E ga‵lue latou i te motou laumua i Warwick, Niu Ioki, Amelika.

 E fakatoka ne te Potukau Pule a komiti e ono ke onoono ki vaega kese‵kese o te ‵tou galuega, kae e tavini atu a sui takitasi i se komiti e tasi io me lua.

•   Komiti o Kouotineita: E tausi ne latou a mea tau tulafono kae ‵saga fakavave atu latou ki fakalavelave ‵tupu, mea ‵tupu ki Molimau a Ieova kolā e fakasauagina ona ko olotou talitonuga fakalotu, penā foki mo mataupu tāua kolā e pokotia i ei a Molimau a Ieova.

•   Komiti o Tino Ga‵lue i Ofisa: E onoono latou ki fakatokaga mō sui o te kāiga Peteli.

•   Komiti ‵Lomi Tusi: E tausi ne latou te ‵lomiga mo te lafoatuga o tusi faka-te-Tusi Tapu, te faitega o fale tapuaki, ofisa ‵fulitusi mo ofisa lagolago.

•   Komiti o te Galuega Talai: E onoono latou ki te talaiatuga o te “tala ‵lei o te Malo.”​—Mataio 24:14.

•   Komiti o Akoakoga: E fakatonutonu ne latou a te fakatokaga o akoakoga faka-te-agaga kolā e tuku mai i fakatasiga, akoga, mo polokalame fakalogo‵logo mo vitio.

•   Komiti Tusi Tusi: E fakatonutonu ne latou a akoakoga faka-te-agaga kolā e tuku mai e auala i tusi mo te motou fakatuatusi i te itaneti kae onoono foki ki te galuega ‵fulitusi.

 I tafa o olotou galuega e auala i komiti konei, e maopoopo foki a te Potukau Pule i vaiaso takitasi ke mafau‵fau ki manakoga o te fakapotopotoga saukātoa. I fono konei, e sau‵tala a sui ki mea e fai mai i te Tusi Tapu kae taumafai o fakafetaui aka olotou mafaufauga ki te takitakiga a te agaga tapu o te Atua māfai ko lotoma‵lie latou katoa ki se fakaikuga.​—Galuega 15:25.

 A latou konei ko Kelisiano kolā e fakatalitonugina kae fesoasoani atu i komiti a te Potukau Pule. (1 Kolinito 4:2) E maua ne latou te malosi mo te atamai i te galuega telā e tausi ne te komiti e ga‵lue latou i ei, kae ‵kau atu foki latou ki fono a te komiti i vaiaso katoa. E tiga eiloa e se aofia latou i te faiga o fakaikuga, e tuku mai ne taina konei a pati fakatonutonu mo fakamatalaga aoga kae e fakagalue aka a fakaikuga e fai ne te komiti kae onoono foki latou ki ikuga mo te faiga o mea konā. Kāti e mafai foki o ‵tofi aka latou ne te Potukau Pule ke asi atu ki te motou kautaina i koga kese‵kese o te lalolagi io me ke fai ne latou a lāuga i maopoopoga ‵lasi e pelā mo te fono tausaga io me ko te pukega pepa i Kiliata.