NKHANI YA PA CHIKOPI
Kasi Mukutangwanika Chomene?
Kasi nyengo zose mukutangwanika chomene? Usange ni nthena, manyani kuti muli mwekha yayi. Magazini yinyake yikati: “Kulikose waliyose wakuwoneka wakutangwanika.”—The Economist.
MU CHAKA cha 2015, mu vyaru 8, ŵakafumba ŵanthu awo nyengo zose ŵakugwira ntchito. Ŵanthu aŵa ŵakati ntchakusuzga kufiska ivyo bwana wawo waŵaphalira. Kweniso vikusuzga kuchita makora milimo yapanyumba chifukwa ŵakutangwanika chomene ku ntchito. Ku United States, awo nyengo zose ŵakugwira ntchito, pa avereji ŵakugwira maora 47 pa sabata. Pa ŵanthu 5, yumoza wakati wakugwira ntchito maora 60 panji kujumphirapo.
Kafukufuku mu vyaru 36, wakalongora kuti pa ŵanthu 100, ŵakujumpha 25 ŵakujipulika kuti ŵachedwa nanga ni para ŵakupumura waka. Para vyaŵa nthena, ŵana nawo ŵakusuzgika.
Para mukuchita vinandi kuluska ivyo mungafiska, mungamba kwenjerwa chifukwa nyengo zose muwonenge kuti nyengo njichoko. Kweni kasi vingachitika kugaŵa makora nyengo? Kasi ivyo tikugomezga, kusankha, na vilato vithu vikukhwaska wuli nyengo yithu? Chakwamba, tiyeni tiwone vifukwa vinayi ivyo vikupangiska ŵanji kutangwanika chomene.
1 KUPWELELERA MBUMBA
Gary wakati: “Nkhagwiranga ntchito mazuŵa 7 pa sabata. Nkhakhumbanga kuti ŵana ŵane niŵagulirenge tunthu tuwemi. Nkhakhumbanga kuti ŵaŵenge na vinthu ivyo nkhaŵavya.” Nangauli ntchiwemi waka, kweni ŵapapi ŵakwenera kuwona ivyo ni vyakuzirwa chomene. Kafukufuku munyake wakalongora kuti awo ŵakutemwa chomene katundu na ndalama, ŵakukondwa viŵi yayi nesi kukhorwa, ndipo ŵakulwaralwara pakuyelezgera na ŵanji.
Ŵana awo ŵasambizgika kutemwa vinthu vyakuthupi ŵakukondwa viŵi yayi
Ŵapapi ŵanyake ŵakutangwanika chomene na ntchito kuti ŵana ŵawo ŵazakaleke kusuzgika. Kweniso ŵakuphalira ŵana ŵawo kuti ŵalimbikirenge ntchito. Buku linyake likuti para vyaŵa nthena “ŵapapi na ŵana ŵakutangwanika chomene na ntchito ndipo ŵakusuzgika.”—Putting Family First.
2 KUŴA NA VINANDI
Ŵamalonda ŵakukopa ŵanthu kugomezga kuti para ŵalije vinthu viphya ndikuti mbakukhalira chomene. Buku linyake likuti: ‘Mazuŵa ghano ivyo ŵamalonda ŵakupanga vyapangiska ŵanthu kuwona kuti nyengo njichoko. Vili nthena chifukwa ŵanthu ŵakutangwanika na kugura, kuwonelera, panji kusankha icho ŵakuwona kuti ntchakwenelera kurya.’—The Economist.
Mu 1930, kaswiri munyake wakati tekinoloje yizamovwira chomene ndipo ŵanthu ŵazamuŵa na nyengo yinandi yakupumulira. Kweni ndimo viliri yayi! Elizabeth Kolbert wakati: “M’malo mwa kuŵeruka ku ntchito mwaluŵiro, ŵanthu ŵakwamba kupenja vinthu vinyake vyasono, ivyo vikukhumba ndalama zinandi na nyengo.”
3 KUKONDWESKA ŴANJI
Ŵanthu ŵanyake ŵakulimbikira chomene ntchito kuti ŵakondweske mabwana ghawo. Kweniso ŵanji ku ntchito ŵangapangiska munthu kujiyimba mulandu chifukwa chakuti wakuŵeruka pa nyengo yake apo iwo ŵachali. Apo ŵanji ŵakugwira ntchito maora ghanandi chifukwa cha suzgo la vyachuma.
Ŵapapi ŵanyake ŵakuchichizgika kusintha vinthu vinyake kuti ŵambe kuchita vinthu nga ni mbumba zinyake. Para vyaŵasuzga ŵakujipulika nga kuti ŵana ŵakuŵanora vinthu vinyake.
4 KUMANYIKWA NA KUKHUMBA KUŴA NA KALIKOSE
Tim wa ku United States, wakati: “Nkhatemwanga chomene ntchito yane ndipo nkhalimbikiranga. Nkhakhumbanga kuti vinthu vyendenge makora chomene pa umoyo wane.”
Nga ni Tim, ŵanandi ŵakuwona kuti para ŵakutangwanika chomene na ntchito ndipo ŵakujipulika kuti mbakuzirwa. Kasi chikuchitika ntchivichi? Elizabeth Kolbert uyo tamuzunura kale wakati: “Wamunthu ukumanyikwa para ukutangwanika chomene. Para ukutangwanika chomene, ndipo ukujipulika kuti wuli wakuzirwa chomene.”
SAMBIRANI KUGAŴA MAKORA NYENGO
Baibolo likutichiska kuti tikwenera kulimbikira ntchito. (Zintharika 13:4) Ndipouli, pakukhumbikwa kugaŵa makora nyengo. Lemba la Mupharazgi 4:6 likuti: “Woko limoza lakuzura na chipumulo ndiwemi kuluska mawoko ghaŵiri ghakuzura na kuphyoka na kuchimbizga waka mphepo.”
Para tikugaŵa makora nyengo tikuŵa na umoyo uwemi. Kasi ntchamachitiko nadi kusintha panji kuchepeska vinthu vinyake? Enya. Wonani masachizgo ghanayi agha:
1 SANDANI IVYO NI VYAKUZIRWA CHOMENE
Waliyose wakukhumba kuŵa na ndalama. Kweni kasi munthu wakwenera kuŵa na ndalama zilinga? Kasi mungachita wuli kuti muŵe ŵakukondwa? Kasi munthu wakuŵa wakukondwa pekha para wali na ndalama panji katundu munandi? Munthu wangenjerwa para wakumalira nyengo yinandi kupumura panji kuchita vyakusanguluska.
Tim, uyo tamuzunura kale wakati: “Ine na muwoli wane tikasandaso ivyo tikachitanga na kuchepeskako vinthu vinyake. Tikalemba vinthu ivyo tichitenge kweniso vilato viphya. Tikadumbiskana ivyo vikuchitika sono chifukwa cha umo tikasankhira vinthu kumasinda kweniso umo tingafiskira vilato viphya.”
2 LEKANI KUGURA WAKA CHILICHOSE
Baibolo likuti tikwenera kuchita mwamahara na “makhumbiro gha maso.” (1 Yohane 2:15-17) Ŵamalonda ŵangatipangiska kuti tambe kukopeka waka na ivyo tawona. Ivi vingapangiska kuti tambe kugwira ntchito maora ghanandi panji kuchita vyakusanguluska vinyake ivyo ni vyandalama zinandi. Nangauli tingagega yayi kutegherezga panji kuwonelera vyamalonda, kweni tingachepeska nyengo iyo tikumalira pa vinthu ivi. Mungasandaso ivyo ni vyakuzirwa chomene.
Kuluwa yayi kuti ŵanthu awo mukuchezga nawo ŵangamusinthani. Usange nyengo zose ŵakuyowoya waka za katundu panji kutchuka, mungachita makora kwamba kuchezga na ŵanthu awo ŵakumanya kuti vyakuzirwa chomene ni vi. Baibolo likuti: “Uyo wakwenda na ŵavinjeru waŵenge wavinjeru.”—Zintharika 13:20.
3 GAŴANI MAKORA NYENGO YAKUGWILIRA NTCHITO
Phalirani abwana ŵinu ivyo ni vyakuzirwa chomene kwa imwe. Lekani kudandawura para mukugwira ntchito maora ghachoko waka. Buku linyake likuti: “Awo ŵakugaŵa makora nyengo yakugwilira ntchito na yakuchezgera na mbumba zawo panji kuŵa na nyengo yakupumulira, vinthu vikuŵayendera makora chomene ndipo ŵakudandawura yayi na ivyo ŵasankha.”—Work to Live.
Gary, uyo tamuzunura kale wakati wasanda makora vinthu wakasintha umoyo wake na kuchepeska maora ghakugwilira ntchito. Iyo wakati: “Tati tadumbiskana nga ni mbumba tikawona kuti ntchiwemi kuchepeska vinthu vinyake, ndipo ndivyo tikamba kuchita. Nkhadumbiskanaso na bwana wane na kumupempha kuti nigwirenge mazuŵa ghachoko waka mukati mu sabata, ndipo wakazomera.”
4 ŴANI NA NYENGO YAKUCHEZGA NA BANJA
Mfumu na muwoli ŵakwenera kuŵa na nyengo yakuchezgera, ndipo ŵapapi ŵakweneraso kuchezga na ŵana. Lekani kuyaniska banja linu na banja ilo nyengo zose likutangwanika. Gary wakati: “Patulani nyengo yakuchezga na kupumura, ndipo lekani kutangwanika na vyambura kuzirwa.”
Para mukuchezga, lekani kutangwanika na TV, mafoni, panji vinyake. Yezgani kulyera lumoza nga ni mbumba na kuyowoyeskana. Para ŵapapi ŵakuchita nthena, ŵana ŵakukondwa ndipo ŵakuchita makora ku sukulu.
Yezgani kulyera lumoza na kuyowoyeskana
Jifumbani kuti: ‘Kasi ni vinthu wuli ivyo ni vyambura kuzirwa kwa ine? Kasi nkhukhumba kuti mbumba yane yichitenge vichi?’ Usange mukukhumba kuŵa na umoyo uwemi na wakukhorweska, sandani ivyo ni vyakuzirwa chomene nga umo Baibolo likuyowoyera.
